“Ypoetory mose ro, tyjamihtanohse ynororo ya,

ynymenekahpyryme mana, yzamaro Exikety!

Juzenu ekaroase eya;

zae ehtoh enehnõko mana imeimehnõ nonory põkomo a emero porehme.

2 Kohtara exĩko mã ynororo,

opore oturupyra exĩko roropa mana.

Tõtururu opore onetapopyra exĩko mana jarao osema taõkõ netaryme.

3 Amoriry etahkasẽ onemapopyra exĩko mana,

ezuru aryry ezehsasaka ahtao onezehkapopyra exĩko ynororo mana.

Tyyrypyrykõke iporemãtyã pitiko zemime exikety sã mana;

mokaro pynanohnõko mana.

Etuarimaketõ pynanohnõko roropa mana pitiko rokẽ enetuputyryhtao ro eya xine,

toto zehno pyra exĩko mana,

toto akorehmãko roropa mana itamurumehxo tonetupuhtohme toto a.

4 Apotũkehpyra exĩko mana,

orẽpyra exikehpyra exĩko roropa mana,

zae pyra ehtoh enahkapõko mana.

Imeimehnõ nonory põkõ eraximãko mã toto inamorepatary etatohme, Tosẽkõme mokyro enetupuhtohme.”

5 Kapu tyrise Ritonõpo a, myahxo rahkene;

sero nono tyrise roropa eya itaõkõ maro emero porehme,

isene ahno tyrise eya oserematohme.

Seromaroro ynara ãko mã ynororo typoetory a:

6 “Ywy, Ritonõpo, kykohmase,

yjamitunuru ekaroase oya zae ehtoh ripotohme sero nono po,

sero nono põkõ pynanohtohme oya.

Kuenehpoase ynetapohpyry ae ro ypoetory tõ Izyraeu tomo a,

imeimehnõ nonory põkõ emero juaro ehtohme oenetuputyryke eya xine;

7 tonurãkara enuru etapuruhmakãko mase,

ãpuruhpyry taõkõ myhpokãko mase,

tapuruse aexityã xinukutumao tũtanohpõko ropa mase.

8 Ywy ro rokẽ Ritonõpome ase:

morome jesety mana!

Imehxo jehtoh onekaropyra ase imehnomo a;

imehnõ neponãmary oneahmapopyra ase ipunaka.

9 “Jomihpyry ae ro emero toehse,

seromaroro tyrisenã ehtoh poko ourutorỹko ase,

morohne waro oehtohkõme exipyra ro ahtao.”

10 Eremiatoh kasenato ke eremiatoko Ritonõpo eahmaryme!

Imehxo ynororo ehtoh poko eremiatoko, sero nono po porehme:

eahmatoko wapu ae ytoketomo tuna konõto poro ytoketomo eahmatoko inyrityã emero tuna konõto kuao,

ahno a roropa moe imeimehnõ nonory põkõ porehme!

11 Ona tonorẽ po, ipatary tõ po roropa ah Ritonõpo eahmã toto,

ah pata Ketaa põkõ neahmã toto!

Amarokõ pata Sera põkõ, atãkyematoko,

eremiatoko ypy tõ emory po!

12 Ah Ritonõpo toahmase nexino,

ah mokaro moe nono põkõ saeremehxo Ritonõpo ehtoh poko nekarõ toto!

13 Ritonõpo ytõko mana etonakety samo,

emero tyrikehse eya etonatoh taka toytotohme.

Kohtãko mana toetonatohme,

topetõkara poremãkapõko mana tyjamitunuru ke.

“Okynahxo oturupyra exiase,

mynyhme rokẽ exiase, ypoetory tõ onezuhpyra;

yrome seromaroro kohtãko ase nohpo samo tonururuhtao,

jetũ toehse ahtao xitãko mana pusuh ãko.

15 Emorymãkõ tohtohkãko ase

toto enahkãko ase ypy tõ maro,

jomi poe otyro emero anorỹko mã kehko wewe tõ maro.

Tuna tõ maro jakanahmã tõ rĩko ase ona tonorẽme,

tuna pẽkamã tõ emero tonore tyripõko ase.

16 Tonurãkara arõko ase imepỹ osema ae,

moro ae ytopitopyra ro toh nexiase.

Toto kohmamyry myakamãko ase saerehkatoh ke.

Osema tupimãkõ tupime pyra tyrĩko ase toto esemaryme.

Morara tyrĩko ase, totapose ya exiryke.

Morara tyrĩko ase rahkene, ekurehpyra ase.

17 Yrome tyneponãmarykõ eahmananõ te,

tynaxikatyã riryhtao tosẽkõme,

mokaro typoremãsẽme exĩko,

ehxirõko mã toto, ynara kananomo tyneponãmarykomo a:

Omoro mase yna rihpono.”

“Etatoko pahne, otato pyra exiketomo!

Enetoko ke, tonure pyra exiketomo!

19 Ypoetory tõ Izyraeu motye tonurãkara nae?

Jomiry aroneme ynaropohpyry motye otato pyra exikety nae?

Arypyra;

20 Izyraeu tomo, itamurume meneatose repe,

yrome onenetupuhpyra mexiatose;

omi tuhke totase oya xine repe

yrome zuaro pyra sã mexiatose.”

21 Ritonõpo Oesẽkõ mã typoetory tõ pynanohneme Exikety,

morara exiryke tynyripohpyry tokarose eya,

toto amorepatohme, tõmiry waro toto ehtohme,

omipona se toto ehtohme.

22 Yrome ipoetory tõ tyyryhmase,

imõkomory tomatonanohse, tõmase toto ãpuruhpyry taka,

moro tao tymyhse toh nexiase.

Epetõkara a tarose toto tynamotokõme,

typynanohneke pyra toh nexiase.

23 Sero jomiry etary se exikety sehxo ase.

Taroino tomeseke sã jomiry etane sehxo ase.

24 Onoky a Izyraeu tõ tokarose epetõkara a?

Onoky omi poe tomatonanohse toh nexiase?

Ritonõpo poe nexiase,

ineneryme yna rypyry poko toehse ynanexiase.

Zae ehtoh poko se pyra sexiatose,

aomiry omipona se pyra sexiatose tamorepase kuahtao xine eya.

25 Naeroro kyzehno xine toehtoh ke tuãnohse sexiatose,

toetuarimase roropa sexiatose etonatoh tao.

Kyzehno xine aexiry apoto sã nexiase

zahnõko Izyraeu tõ rãnao.

Yrome zuaro pyra sexiatose.

“Otara exĩko nae?” tykase,

onenetupuhpyra sexiatose ipunaka.