43
“Opynanohtorỹko ase,” ãko Ritonõpo mana
1 Yrome seromaroro Ritonõpo, Orihpono, ynara ãko Izyraeu a:
“Enaromyra exiko, opynanohnõko ase;
kykohmase oesety ae, ypoetoryme mase.
2 Tuna zuemã rãnakuroko oytoryhtao, amaro ase,
nerypyra exĩko mase.
Apoto rãnakuroko oytoryhtao zahpyra exĩko mase.
3 Ritonõpo Oesẽkõme jexiryke, Izyraeu tõ Rihpono kurano, Opynanohnekomo.
Ejitu ekaroase, Etiopia roropa, Sepa maro, oepehpyryme ypoetoryme oehtohme.
4 Imehnõ nonory põkõ, ahno tytororo ekarory opynanohtohme, typynehxo oexiryke ya,
opyno jexiryke, imehxo oriry se roropa jexiryke.
5 Enaromyra exiko; amaro jexiryke!
“Moino xixi tũtatoh wino te, moino roropa xixi omõtoh wino oekyry tõ enehnõko ropa ase inonorykõ pona.
6 Inikahpoẽkomo a ynara tyripõko ase: ‘Ah mokaro nytõ toto,’
Ikurenaẽkomo a roropa: ‘Mokaro anapoipyra ehtoko.’
Moino nono moe exiketõ poe ah umũkuru tõ noehno ropa toto, jẽxiry tõ roropa tosaka xine!
7 Mokaro emero ypoetoryme mã toto;
toto tyrise ya isene toto ehtohme, imehxo jehtoh enepotohme imehnomo a.”
Izyraeu tõ Ritonõpo zae ehtoh enenanõme
8 Ritonõpo Kuesẽkõ ynara ãko:
“Ypoetory tõ enehtoko toto apiakatohme.
Tonure ro toh mã repe, yrome tonurãkara sã mã toto.
Typanare toh mã repe,
yrome otato pyra exiketõ sã mã toto.
9 Imeimehnõ nonory põkõ ahno tõ emero enehpotoko oximõme toto ehtohme Apiakatoh tao.
Onoky neponãmary imeĩpo ehtoh ekarory waro nae?
Onoky a tokarose pake serara ehtoh poko seromaroro?
Ah mokyro enenanõ noehno toto
xiaro zae toehtohkõ waro imehnõ ehtohme,
ajohpe pyra aomirykõ waro roropa imehnõ ehtohme.”
10 Ritonõpo ynara ãko: “Izyraeu tomo, omoro jeneneme mase;
kymenekase ypoetoryme oehtohme, juaro oehtohme,
jenetupuhtohme, ywy ro rokẽ Ritonõpome jehtoh waro oehtohme.
Osemazuhme imepỹ ritõ pyra kynexine.
Ymaro imepỹ ritõ pyra mana,
imeĩpo jũme imepỹ ritõ exipyra roropa exĩko mana.
11 Ywy ro rokẽ Ritonõpome ase,
ywy rokẽ opynanopyrykõ waro ase.
12 Jomihpyry etapoase oya xine: ‘Imeĩpo opynanohtorỹko ase.’
Mame kypynanopyatose jomihpyry ae ro.
Moro poko eneneme matose,
morara onyripitopyra imepỹ ritõ nexiase amaro xine.
13 Ywy Ase Ritonõpo, jũme exikehpyra exĩko ase.
Ahno tõ emero epasaromepyra mã toto yjamitunuru wino.
Tyriryhtao ya onytyoromasaromepyra imehnõ mana.”
Papironia poremãkatopõpyry
14 Ynara ãko Ritonõpo, Opynanohnekomo, Izyraeu tõ Esẽ Kurano, typoetory tomo a:
“Opyno xine jexiryke soutatu tõ tuhkãkõ enyohnõko ase Papironia poremãkase.
Ahno atãkyemary ikohtary myakamãko mana ixitarykõke.
15 Ywy ase Ritonõpo Oesẽkõ kurano,
Orihpõkõme ase, Otuisarykõme ase.
16 Pake ahtao osema tyrise Ritonõpo a tuna konõto rãnakuroko,
oesemarykõ tuna zueme exikety rãnakuroko.
17 Soutatu tõ jamihmãkõ typoremãkase eya, tuhkãkomo, kahu tõ osetapaketõ maro te, kawaru tõ maro.
Toepukase toto jũme owõpyra ropa ehtohme;
tozehse toto nãparina ezetyry samo!”
18 Yrome seromaroro ynara ãko Ritonõpo Kuesẽkõ mana typoetory tomo a:
“Wenikehtoko pake ehtopõpyry poko,
emynyhmara ehtoko pake ynyrityã poko.
19 Seromaroro ynyriry tyrisenã sã tyrĩko ase,
okynã pyra morara exĩko mana,
mame mõtoino rokẽ moro enẽko matose.
Osema rĩko ase ona rãnakuroko,
iporiry tõ ekarõko ase oya xine ona tonorẽ po.
20 Onokyro tomo a toahmasẽme exĩko ase, kaikuxi tomo a, torõimo awexituruze tomo a roropa,
soesoekane rĩko ase ona tonorẽ po,
iporiry tõ serere ãko nono tonorẽ poro, tuna ekarotohme aukurukõme ynymenekatyamo a ypoetory tõme exiryke.
21 Mokaro ynyrityãme mã toto ypoetoryme toto ehtohme jeahmatohme.”
Iirypyryme Izyraeu tõ toehse
22 Ynara ãko Ritonõpo mana typoetory tomo a:
“Amarokõ typenekehse mexiatose ypoko,
mame jeahmara mexiatose.
23 Okyno tõ kaneru tõ onenehpyra mexiatose jahkatohme onekarorykõme ya,
imehxo jyripyra mexiatose onekarorykõ ke.
Orohmanohpopyra xine exiase tiriiku tõkehko enehporyke oya xine:
‘Ixtaratu jahkatoko’ kara exiase.
24 Ixtaratu onepekahpopyra exiase oya xine ekarotohme ya,
oeky tõ kasery roropa onekaropopyra exiase oya xine tãkye jyritohme.
Mãpyra totaehse kyriatose oorypyrykõ ke,
tapotũkehse tykamexipose ywy oya xine azahkuru ehtoh poko oexirykõke.
25 “Yrome ywy, ywy roro, Ritonõpo Oesẽkõme ase,
naeroro oorypyrykõ korokãko ase,
oorypyrykõ poko wenikehnõko roropa ase.
26 Ypoetory tomo, yhxirotoh nae awahtao xine, ehmaropa Apiakane ẽpataka;
yhxirotoh enepotoko!
Tuaro ehtoh enehtoko zae oexirykõ waro kuehtohkõme!
27 Atamurukõ tyyrypyhpyke toehse;
urutõ kõ roropa iirypyryme toehse toh kynexine yneneryme,
28 Ytapyĩ Kurã nuriame tyripose otuisarykomo a.
Morara exiryke Izyraeu tõ tonahkapose ya,
ypoetory tõ typoremãkapose ya.”