“Papironia põkomo, oyhtoko tuisa apõ poe,

nono pona oporohko.

Pake oryximã sã mexiase, orutua poko exipitopyra exikety samo,

pata onyporemãkapỹme mexiase;

yrome oryximã sã pyra mase toehse,

opihpyry amiamime pyra toehse.

Imehnõ namotome toehse mase!

2 Topu konõto, tiriiku apotoh ikirĩmako; apoko!

Kamisa oẽmyty apuru touko! Oupõ kurã roropa touko!

Omety anỹko iporiry tõ akuohtohme!

3 Tupoke pyra oenẽko imehnõ mana,

toehxirosẽme oehtoh enẽko,

epyrypara oehtoh enẽko mã toto.

Omỹpõko ase, opynanohsaromepyra exĩko imehnõ mana.”

4 Kypynanohnekõme Ritonõpo mana, Jamihmehxo Exikety, Izyraeu tõ Esẽ kurano.

“Mynyhme oporohko, ytoko ikohmamyry aka,

taroino Nohpo Tuisamã, Ahno tõ Esẽme oesehtopyra ropa exĩko mã toto.

6 Ypoetory tõ poko tyekĩtapãse exiase, ynymenekatyã poko;

morara exiryke typoremãkase toto ya,

toto ekaroase oya xine. Yrome toto pyno pyra mexiatose;

tytamuhpopãse exiketõ tyrohmanohpose oya xine yronymyryme.

7 Jũme tuisame oexiry poko tõsenetupuhse mexiase repe,

ynyriry poko osenetupuhpyra mexiase,

sero etyhpyry poko osenetupuhpyra roropa mexiase.

8 Etako pahne, zae pyra ehtoh poko penetakety,

torẽtyke pyra mase,

popyra ehtoh oepyry zuno pyra roropa mase.

Okurohtao ynara ãko mase: ‘Ywy ase tuisame;

imepỹ ypanõ pyra mana.

Pytỹpome exipyra ase,

ypoenõ orihpyra mã toto,’ ãko mase repe.

9 “Yrome seromaroro jomiry etako pahne:

axiny, toiro saereme ahtao morohne asakoro exĩko oya,

onio orihnõko mana opoenõ roropa,

oneponãmarykõ poko awahtao ro,

pyaxi tõ poko roropa awahtao ro.

10 Orẽpyra mosekaroase oorypyry poko awahtao,

imehnõ onyriry onenepyra mekaroase repe.

Yrome tuarohxo oehtoh ke mosenekunopyase.

Ynara tõsenetupuhse omoro: ‘Ywy imehxo ase,

imehnõ ysã pyra mã toto.’

11 Naeroro popyra ehtoh oehnõko oya,

pyaxi poko oehtoh anakorehmara moro popyra ehtoh oehpyra ehtohme.

Oenahkatoh oehnõko mana,

mame epasaromepyra exĩko mase.

Moro oryhmatoh kehko onenepitopyra ro mase,

oehnõko oya mana tuamekaro awahtao.

12 Pyaxime oehtoh poko ehtoh ikuhko;

opoetoae ro ipoko oehtoh torẽnase mase.

Otarame ãkorehmãko mã kehko,

otarame morohne ke oepetõkara erehnõko mase.

13 Tyjamitunuru ke pyra mase ipunaka,

imehnõ tuaro exiketõ omiry etaryhtao ro oya epasaromepyra mase.

Ah mokaro xirikuato poko atamorepaketõ noehno toto opynanohtohme!

Kapu poko atamorepãko mã toto,

xirikuato tõ onenekehpyra mana,

ekarotohme emero nuno punero: otara exĩko oya.

14 Onahpoty tonore sã mã toto;

toto zahkãko apoto mana,

osepynanohsaromepyra exĩko mã toto.

Zemimehxo moro apoto exĩko mana, osũtoh sã pyra.

15 Morara exĩko mana,

mokaro xirikuato poko atamorepaketomo,

eya xine mekaropoase moino ro tarona.

Yrome orumekãko mã toto, toytotohkõme tosemarykõ ae rokene;

opynanohsaromepyra exĩko mã toto, emero.”