48
Imeĩpo ehtoh poko
1 Etatoko pahne, Izyraeu tomo!
Juta pakomotyã, etatoko!
Õmirykõ etapõko matose Ritonõpo netaryme repe:
“Izyraeu Esẽ eahmãko ase,” ãko roropa matose repe,
yrome ajohpe matose, õmirykõ zae pyra mana.
2 Pata kurã põkõme osekarõko matose, Ritonõpo, Izyraeu tõ Esẽ enetupuhnanõme roropa,
mokyro esety Jamihmehxo Exiketyme mana.
3 Ynara ãko Ritonõpo mana oya xine:
“Pake kuruatose imeĩpo ehtoh poko,
jarao morohne poko kuruatose exipyra ro ahtao, zuaro oehtohkõme.
Mõtoino rokẽ tyrise ya,
morohne toehse rahkene ynekarohpyry ae ro.
4 Putupyra oehtohkõ poko tuaro exine,
opymyry kurimene sã tũpore mana,
opery metau sã roropa tũpore mana.
5 Morara exiryke morohne poko kuruatose pake;
exipyra ro ahtao tõturuse ywy oya xine.
Naeroro ynara kasaromepyra matose:
‘Ynaneponãmary tomo a serara tyripose;
ynanaxikahpyry a, ynanyrihpyry a, uuru risẽ tõkehko.’
6 “Emero toehse jomihpyry ae ro, morohne enẽko matose.
Naeroro zae jomihpyry ehtopõpyry enetupuhtoko.
Yrome seromaroro kasenato ehtoh poko ourutorỹko ase:
tokare pyra exiketomo, ipoko zuaro pyra ro matose.
7 Seromaroro rokẽ senohne tyripõko ase;
senohne poko onetapitopyra ro matose,
naeroro ynara kasaromepyra matose:
‘Morohne waro exiase moino ro.’
8 Ajohpe oehtohkõ waro exiase;
onekunohtõme mexiatose oenurutopõpyry poe ro.
Morara exiryke sero poko onetapitopyra mexiatose,
moino ro zuaro pyra mexiatose senohne ehtoh poko.
9 “Awãnopyrykõ se jahtao tuãnohse oexirykõ ya,
oenahkaporykõ se jahtao pake tonahkase mexitory ya,
yrome morara ahtao jeahmara sero nono põkõ exiry.
Mãpyra penekehpyra exiase opoko xine,
Ritonõpome jexiryke jeahmary oya xine zae mana.
10 Kukukuatose apoto ao samo,
parata zatyry sã apoto htao kurehxo ehtohme,
sam mykamexipoatose ya.
Yrome parata sã pyra matose, popyra rokẽ matose.
11 Ypokoino rokẽ tyrĩko ase;
ywy nuriame kamexipopyra ase imehnomo a,
imehxo jehtoh onekaropyra ase imepyny a,
imehxo jehtoh anapiakara ase imepỹ eahmatohme ysamo. Ywy ro rokẽ imehxo ase.”
Izyraeu tõ pynanohnõko Ritonõpo mana
12 Ynara ãko Ritonõpo mana:
“Etatoko pahne Izyraeu tomo, ynymenekatyamo!
Ywy ase Ritonõpo, apitorymano te, etyhpyrymano.
Ywy ro rokẽ ase Ritonõpome.
13 Jemary ke sero nono esaka yrine,
kapu mya yrine roropa.
Tyripose ya, mame senohne emero toehpitose rahkene.
14 “Oximõtoko amarokõ emero jomiry etatohme!
Oneponãmarykõ emero ourusaromepyra toh nexiase ynyriry poko:
orutua tymenekase ya,
yjamitunuru ke osetapãko mana pata Papironia maro,
ypenetatoh tyrĩko mana.
15 Ya ro tykohmase ynororo; tonehpose ya,
mame toehse ynororo.
Inyriry emero zae tyripõko ase orẽpyra mokyro ehtohme.
16 Seromaroro, osehtoko xiaro jomiry etatohme:
apitorymã poe jarao oturuase,
otonẽpyra, tokare pyra oturupyra exiase.
Mame emero tyrise ya jomihpyry ae ro.”
(Seromaroro Tuzenu tokarose Ritonõpo a ya, mame tonyohse ywy.)
Ritonõpo osenetupuhtoh typoetory tõ poko
17 Ynara ãko Ritonõpo, Izyraeu tõ Esẽ kurano, toto Pynanohnekomo, typoetory tomo a:
“Ywy ase Ritonõpo Oesẽkomo.
Ãmorepatorỹko ase kure rokẽ oehtohkõme, zae ehtoh ritohme oya xine.
18 Pake otato awahtao xine ynyripohpyry omipona, kure rokẽ ehtoh oehkehpyra exiry iporiry samo, jũme apaipyra exikety samo,
orẽpyra oehtohkõ exikehpyra exiry pohkane sã tuna konõto kuao.
19 Opoenõ te, apakomotyã maro ikuhpỹme exiry isawã samo tuna konõto ehpiõ po;
jũme toto wenikehpyra jexiry,
mame ywy roro toto ewomaneme exiry, jũme jẽpataka toto ehtohme.”
20 Ytotoko Papironia poe, epatoko moro poe!
Okohtatoko tãkye oehtohkõke
omi kurã ekãtotoko emero pata tõ poro:
“Typoetory tõ Izyraeu typynanohse Ritonõpo a!”
21 Typoetory tõ tarose ahtao Ritonõpo a ona tonorẽ rãnakuroko tuna zehnara toh nexiase;
topu ae tuna tutũtanohpose aukurukõme,
topu tyrakase xororokatohme tuna tũtatohme.
22 Yrome popyra ehtoh poko exiketomo a ynara ãko Ritonõpo mana:
“Amaro xine osewomatoh pyra mana.”