3 “Popyra kahpyry moro ẽmepyry tyripoko, jenurutopõpyry!

Popyra kahpyry moro kohmamyry tyripoko, morara tykase ahtao:

‘Tonuruse! Orutuame mana!’ tykase ahno tomo.

4 Moro ẽmepyry tyripory se ase ikohmamyryme konõto!

Moro ẽmepyry wenikehkapory se ase Ritonõpo a Kapu ao, jũme ẽmehpyra ehtohme, saerehkara roropa ehtohme!

5 Moro ẽmepyry kohmanohpory se ase, xinukutume rokẽ ehtohme,

moro ẽmepyry oxiõtory se ase akurũ tõ ke, xixi ezehkatohme.

6 Moro koko jũme ẽmehpyra exiry se ase, tykorokase ehtohme karẽtariu poe.

7 Moro kohmamyry toiroro exiketyme se ase, emynyhmatohme atãkyemaketõ kohtary onetara moro ae ehtohme.

8 Moro koko popyra tyripory se ase pyaxi tomo a,

mokaro tyjamitunuru ke onokyroimo Rewiatã, zakareimo kuremary waro exiketomo a!

9 Moro ẽmepyry ae maparukawa tozehse aexiry se ase ẽmehpyra ehtohme.

10 Popyra moro ẽmepyry tyripoko, moro ae tonuruse jexiryke.

Aja a jenurumara jahtao sero jetuarimary exipyra exiry.

11 “Oty katohme toorihse enurupyra exiahse?

Oty katoh tonuruse jahtao orihpyra exiahse?

12 Oty katoh tonao tapoise ywy aja a?

Oty katoh tauhpase ywy aja a tysuhsuru ke?

13 Toorihse jahtao jenururuhtao,

seromaroro oseremakety sã exiry torẽtyke pyra.

14 Tuisa tõ sã exiry, imehxo exiketõ samo tytapyĩ konõto rinanõ samo.

15 Otarame kowenatu sã exiry tytapyĩkõ pehkananõ uuru ke, parata maro.

16 Otarame poeto aepukahpyry ropa sã exiry,

tonuruse exikety toorihse;

tonẽse, ẽmepyry saerehkatoh onenepitopyra exikety samo.

17 Aorihtyã esao popyra exiketõ tyyrypyrykõ poko pyra exĩko mana,

moroto totaehse exiketõ oseremãko.

18 Moroto ãpuruhpyry tao exiketõ oseremãko oximõme,

tyrohmanohponanõ kohtary onetara mã toto.

19 Moroto emero rokẽ mã toto, tuisamehxo exiketomo te, tuisame pyra exiketomo.

Moroto ahno poetory tõ namotome pyra mã toto.

20 “Oty katoh isene ro etuarimaketõ nae?

Oty katohme emynyhmaketõ ẽmehnõko nae?

21 Toorikyrykõ eraximãko toh mã repe,

yrome oehpyra, mõkomo kurã motye isehxo toto ahtao ro.

22 Atãkyemãko mã toto, tãkye exĩko mã toto.

Etyhpyryme toorihtohkõ po toehse ahtao.

23 Ritonõpo poe zuaro pyra mã toto imeĩpo toto ehtoh poko,

ipoe tapuruse sã mã toto zomye.

24 “Tyoro tynahke ase, yxitaryke.

Pusuh kakehpyra ase, tuna kuamyry sã ya.

25 Popyra ehtoh zuno jehtopõpyry toehse ya.

Enaromỹke jehtopõpyry a tapoise ywy.

26 Oserekohmãko ase, oseremasaromepyra ase;

jerekohmakehpyra mana.”