2 “Oturuxi oya, Jo, ajohpame samo.

Mynyhme exisaromepyra toehse ywy.

3 Tuhkãkõ tamorepase oya.

Ahno tõ tuhke takorehmase roropa oya tapotũkehse toto ahtao.

4 Tõsetapase ahno ahtao, totaehse toto ahtao,

jamihme pyra toehse toto ahtao, õmiry ke takorehmase,

toto tanỹse ropa xikihme.

5 Yrome seromaroro oetuarimatoh toehse mana,

oty katoh penekehnõko mah?

Oty katoh torẽse mahno?

6 Ritonõpo omipona oexiryke onenetupuhkehpyra exiko!

Zae ehtoh poko rokẽ oexiryke kure ehtoh eraximako!

7 Osenetupuhko imehnõ ahno kurã poko.

Zae exiketõ osenahkara mã toto.

Otara ahtao ajohpe pyra exiketõ tyyryhmase toh nexiahse?

8 Ynara rokẽ tonese ya:

tupito riry poko erohketõ sã mana,

popyra ehtoh arykaryhtao ahno a popyra ehtoh apoĩko mana.

9 Tyryrykane sã konõto toto enahkãko Ritonõpo mana zehno toehtoh ke.

10 Popyra exiketõ reão jamihmã sã kohtãko toh mã repe,

yrome toto mynyhpãkapõko Ritonõpo mana,

mokaro zery tahkãko roropa mana.

11 Tyere pyra reão ahtao urakanara mana,

orihnõko mana omise exiryke.

Imũkuru tõ sapararahme ytõko mã toto.

12 “Omi toehse ya, opore pyra,

totase ya ypanary ao puti puti katoh samo.

13 Koko, tynyhse imehnõ ahtao yronymyryme,

taosenehkase ywy, tõserehse exiase.

14 Enaromỹke toehse ywy,

tykytyky tykase joko porehme.

15 Tyryrykane toehse jẽmyty poro,

jũsety towõse sã,

ypihpyry tupupiarỹse roropa enaromỹke.

16 Ahno panõ nexiase moroto; osenuhmase,

yrome ahno onenepyra exiase.

Mynyhme rokẽ nexiase.

Mame omi etase, ynara tykase:

17 ‘Zae exĩko ahno nae Ritonõpo ẽpataka?

Kure nymyry ahno ehsaromepyra mana Ritonõpo neneryme?

18 Typoetory kapuaõkomo a tamonohse ahtao, moro enẽko mana.

Tynenyohtyã azahkuru toehse ahtao toto hxirõko mana.

19 Morararo kymarokomo, nono risẽme exiketomo, amonohnõko sytatose.

Takurihmosẽme exĩko sytatose, nuko samo.

Morohne enetupuhnõko Ritonõpo mana.

20 Isene sytatose tõmehse ahtao,

yrome mõtahtao orihnõko sytatose jũme rokene.

Otara kara imehnõ mana.

21 Orihnõko sytatose, tapyi epukary samo,

orihnõko sytatose tuaro exipyra ro kuahtao xine.’