1 “Okohtako, Jo! Otarame oezuhnõko imepỹ mana.

Onoky Ritonõpo nenyokyhpyry kohmãko mah?

2 Otyme kure imehnõ zehno oexiry?

Oorihmapõko rokẽ mana.

Toiparo rokẽ torẽtyke tuaro pyra exikety mana imehnõ poko.

Orihnõko mana, imehnõ zumoxike toexiryke.

3 Tuaro pyra exikety enease ekurãkãko samo, otyro ahtary samo.

Yrome axĩ popyra ehtoh toehse itapyĩ taõkõ pona.

4 Imũkuru tõ osewomasaromepyra mã toto;

apiakane tõ ẽpataka tuãnohsẽme mã toto,

zae ehtoh poko toto ahtao ro,

toto onewomara roropa imehnõ mana.

5 Omise exiketõ mokyro narykahpyry enahnõko mã toto,

omoxino rãnao otyro ahtao ro.

Imõkomory poko penetãko roropa mã toto.

6 Tupito nonory poe etuarimatoh exipyra mana,

popyra ehtoh tamoreme exipyra roropa mana.

7 Kypokoino xine popyra ehtoh oehnõko kyya xine mana.

Ajohpe pyra ikarany poko samo,

apoto poko ahtao ikarany pisarara onuhnõko kakoxi mana.

8 “Jo, omorome jahtao eramary ropa Ritonõpo a popyra jehtoh ekarotohme eya.

9 Inyriry tõ osenuruhkatoh enetupuhsaromepyra sytatose.

Inyrihpyry tõ tyjamitunuru ke enahpỹme mã kehko.

10 Konopo enehpõko Ritonõpo mana nono pona,

tuna kuãnõko mana tupito tõ pona, ona pona roropa.

11 Osenetaonohpyra exiketõ anỹnõko mana tuisamehxo toto ehtohme.

Xitaketõ anỹnõko mana osa towomase exikety pona.

12 Tuaro exiketõ osenetupuhtoh enahkapõko Ritonõpo mana.

Jamihme pyra toto ripõko mana tyriry se toehtohkõ onyrisaromepyra aehtohkõme.

13 Zuarohxo exiketõ tapoisẽme exĩko zuaro

toehtopõpyrykõke; ekurehnõko mã toto tynyrirykõ poko.

14 Tãxiahtao tykohmãse eya xine mana,

tonurãkara sã tomarykõ ke osema zupĩko mã toto.

15 Tymõkomokãkara pynanohnõko Ritonõpo mana orihpyra toto ehtohme;

etuarimaketõ pynanohnõko mana orẽpyra exiketõ winoino.

16 Naeroro kure ehtoh eraximatoh ekarõko Ritonõpo mana jamihme pyra exiketomo a.

Popyra exiketõ mynyhme tyripõko mana.

17 “Tãkye mokyro mana, tukurãkase exikety Ritonõpo a!

Naeroro tohne pyra exiko tuãnohse awahtao Ritonõpo Jamihmehxo Exikety a.

18 Apurõko Ritonõpo mana,

yrome epinohnõko roropa mana.

Iiryhmãko mana,

yrome tomary ke ro ikurãkãko ropa mana.

19 Tuhke ẽmepyry ae opynanohnõko Ritonõpo mana popyra ehtoh wino,

oryhmapopyra roropa mana popyra ehtoh oryhmaryino.

20 Omise ehtoh konõto toehse ahtao opynanohnõko mana oorikyryino,

etonatoh toehse ahtao opynanohnõko mana oetaparyino.

21 Oewomãko mana omi xihpyry a oryhmaryino,

enaromyra exĩko mase enahkatoh toehse ahtao.

22 Etonatoh toehse ahtao exianãko mase,

omise ehtoh konõto toehse ahtao roropa,

onokyro tõ itu htaõ kõ zuno pyra exĩko roropa mase.

23 Otupi tõ po topu tõ ãkorekehkara exĩko mana,

onokyro tõ oesekara roropa mã toto.

24 Atapyĩ tao torẽtyke pyra exĩko mase,

okyryry tõ eneryhtao emero moroto exĩko mana.

25 Emũkuãko mase tuhke,

apakomotyã emãnõko mã toto onahpoty ary samo ona po.

26 Tamuhpõme orihnõko mase, jamihme ro,

otyro epery toehsehxo ahtao samo.

Moro samo tamuhpõme orihnõko mase, jamihme ro.

27 Etako pahne, Jo, morohne enease zae ehtoh waro jehtohme.

Ajohpe pyra mana.

Moro poko osenetupuhko tuaro oehtohme.”