2 “Jo, otara ahtao moro sã sekere kakehnõko mah?

Õmiry tyryrykane konõto sã mana, otara ahtao mynyhme exĩko mah?

3 Ritonõpo zae ehtoh onytyorõmara mana.

Ritonõpo Jamihmehxo Exikety popyra ehtoh onyripyra mana.

4 Ajohpe pyra omũkuru tõ iirypyryme toehse Ritonõpo neneryme,

naeroro tuãnohse toto eya, popyra toto ehtohtamitume.

5 Seromaroro eramako ropa Ritonõpo a, oturuko Jamihmehxo Exikety a.

6 Iirypyryme pyra awahtao, ajohpe pyra roropa,

axĩ oehnõko Ritonõpo mana ãkorehmase ropa,

atapyĩ ekarõko ropa oya mana zae rokẽ oexiryke.

7 Pitiko sã rokẽ okyryry tonahkase mana:

morohne motye kuhse ekarõko Ritonõpo oya imeĩpo.

8 “Ekaropoko kytamuru tomo a.

Atamorepako mokaro ehtopõpyry poko.

9 Pake hkopyra tonuruse kymarokomo,

tuaro pyrahme sã sytatose.

Isene sytatose sero nono po axĩtao rokene jerutumã samo.

10 Ah kytamuru tõ noturũ toto oya, ãmorepatohme.

Tuaro toehtohkõ poe ynara ãko mã toto:

11 ‘Wezamo ahtara mana tuna esaryme pyra ahtao,

tamutamuimo roropa tuna kuao rokẽ ahtãko mana.

12 Tuna tonore toehse ahtao ahtaryhtao ro,

onysahkara ahtao,

anorỹko mã kehko axiny,

imehnõ otyro sã pyra.

13 Moro sã exĩko mokaro a,

tuenikehse exiketõ Ritonõpo poko.

Toiparo rokẽ kure ehtoh eraximãko popyra exiketõ mana.

14 Eary pisarara jamitunuru enetupuhnõko mã toto.

Ipune, ãko toh mã repe.

Yrome arakaku etuety sã rokẽ mana.

15 Epona omoxinety riryhtao atamohnõko mana.

Eary apoiryhtao anakorehmara mana xikihme aowõtohme.’

16 “Popyra exiketõ ahtãko ãtarykahme sã xixime ahtao.

Ãtarykahme sã tupito po emãnõko mã toto.

17 Imity tõ osexihnõko topu tõ pona,

topu konõto pokona roropa.

18 Yrome touse ahtao, mokaro a tuaro pyra exĩko imehnõ mana.

‘Oty nexiase moroto?’

kara mã toto ipoko.

19 Moro rokẽ tãkye ehtoh nae popyra exiketõ mana.

Mokaro mykapo imehnõ oehnõko mana,

morotona osesarise, toto esahpyry pona.

20 “Zuaro sytatose, zae ehtoh poko exiketõ onurumekara Ritonõpo mana.

Popyra exiketõ anakorehmara roropa mana.

21 Ritonõpo poe exianãko ropa mase,

kui ãko roropa mase ãtãkyemaryke.

22 Yrome ozehno exiketõ otupĩko mã toto.

Popyra exiketõ tapyĩ tõ osenahkãko mana.”