1 “Isene ehtoh sero nono po tupime mana,

soutatu tõ erohtoh samo;

erohnõko mã toto emero porehme yronymyryme,

2 namoto samo penetãko jerutume exikety poko wewe myhto,

erohkety sã roropa toerohtamitu eraximary samo.

3 Tuhke nuno rokẽ tõsenekunohse exiase,

tykohmãse ahtao jetuarimary poko ẽmehnõko ase.

4 Jataxikaryhtao nyhtohme okynahxo nyhpyra ase.

Eraeramakehpyra ase ẽmehtoh pona.

Ekaropõko rokẽ ase: jowõtoh pune hna?

5 Upũ tyyryhmase ahtao moromoro tomo a,

wewe pihpyry sã jerukoimory tõ mana;

ypihpyry tyrakase mana, kunu tũtãko mana.

6 Isene jehtoh axĩ enahnõko mana.

Kure ehtoh eraximakehnõko ase.

7 Ritonõpo, wenikehpyra exiko, isene jehtoh puu katoh sã rokẽ mana.

Jenuru ke jũme tãkye ehtoh onenepyra ropa exĩko ase.

8 Jenẽko mase seromaroro,

yrome zomory jenekehnõko mase.

Jupĩko mase repe, yrome ywy tonahse.

9 “Akurũ samo osenepyra toehse ahtao,

moro sã ahno orihnõko mana,

ytõko aorihtyã tõ esaka oehpyra ropa ehtohme jũme.

10 Oehpyra ropa exĩko mana tytapyĩ taka;

ipoko wenikehnõko mokyro waro aexityamo.

11 Morara exiryke, mynyhme ehsaromepyra ase.

Etuarimãko ase, sekere kary se ase.

Ikerekeremary se ase,

sam karyke yronymyryme ukurohtao.

12 Oty katoh jenẽko mah tuna konõtome jahtao samo?

Ihporyme jekaroryke tuna konõto kuao, otarame?

13 Ataxikãko ase jynyhtoh po, oserematohme,

nyhtohme pitiko, jetuhkopyra jehtohme,

14 jerehnõko mase josenehtoh ke,

josenehkary ke jenaroximãko mase.

15 Kurehxo ya josesenamyry;

joorikyry kurehxo, isene jehtoh sero joko ao popyra mana.

16 Isene jehtoh se pyra ase ipunaka;

jorikyry se ase. Kurumekako, toiparo rokẽ isene ase.

17 “Oty katohme imehxo exikety sã yna enẽko mah?

Oty katoh ahno poko osenetupuhnõko mah?

18 Kokoro rokẽ yna enẽko mase,

yna onukuhkehpyra roropa mase.

19 Otara ahtao jenekehnõko mah,

axĩtao rokẽ toiroro jehtohme?

20 Ahno Eneneme, iirypyryme jahtao, oty tyrise ya oryhmatohme?

Oty katoh opyre ke juõko mah?

Otarame omoxihxo toehse hano oya?

21 Oty katohme yyrypyry onykorokara mah,

popyra jehtopõpyry onukurikara mah?

Okynã pyra tonẽsẽme exĩko ase nono aka;

jupiryhtao jenepyra exĩko mase, arypyra jexiryke.”