1 “Typenekehse ywy isene jehtoh poko.

Emero tyrĩko ase aryhnaka,

sam ykary poko, ukurohtao,

sekere ãko ase.

2 Ritonõpo, popyra exiketyme jekaropyra exiko!

Kuruko oty poko jyhxirõko mah?

3 Omoro ro kyriase.

Kure oya nae yyryhmary?

Jyhtomary roropa?

Kure roropa oya jyhtomary popyra exiketomo a?

4 Oenuru ahno enuru sã nae?

Ahno sã rokẽ osenuhmãko mah?

5 Ahno sã orihnõko mah okynã pyra ahtao?

Arypyra.

6 Naeroro oty katoh yyrypyry tõ emero enẽko mah?

Oty katohme ynyrityã xihpyry zupĩko mahno?

7 Zae rokẽ jehtoh waro mase,

ypynanohne pyra jexiry waro roropa mase jewomatohme owinoino.

8 “Oya tyrise ywy,

mame seromaroro jenahkãko mase.

9 Wenikehpyra exiko orino risẽme kyriase;

ikurepatome jyrĩko ropa mahno?

10 Papa tyrise oya aja maro emũkuatohme, isene jehtohme.

11 Joko tapuhse oya zehpo maro, imity tõ maro.

Tyõtose ywy oya upũ ke ypihpyry maro.

12 Isene kyriase,

ypyno roropa mexiase.

Ypyno oexiryke, isene ro ase.

13 Yrome seromaroro zuaro ase,

osenetupuhnõko mexiase okurohtao ynara tyritohme tokare pyra:

14 Jenery se mexiase iirypyryme toehse jahtao,

moromeĩpo popyra jehtoh onykorokara oehtohme.

15 Iirypyryme jahtao juãnopyry eraximãko rokẽ ase oya;

zae jahtao, jupuhpyry anymyry zuno ase,

ehxirõko roropa ase jetuarimatoh eneryke ya.

16 Jupuhpyry anymyryhtao ya, epyrypary zae rokẽ jehtoh poko, omoro, reão samo, jekahmãko mase;

ajamitunuru enepõko mase yyryhmatohme.

17 Enenanõ onenehkehpyra mase jyhxirotohme.

Yzehno oehtoh emãnõko mana.

Osetapakehpyra mase ymaro soutatu tõ imoihmãkõ samo.

18 “Ritonõpo, oty katohme jenurutopõpyry tyripose oya?

Kurehxo exiry toorihse jahtao jenepyra ro imehnõ ahtao.

19 Topohme jytotopõpyry aja wakuru poe zonẽtoh pona, jenuru toh pyra exiry.

20 Orihsasaka ywy.

Naeroro kurumekako ty!

Tãkye pixo ehxi,

21 ytopyra ro jahtao, oehpyra ropa jehtoh pona,

ytopyra ro jahtao kohmãtoh pona, xinukutume ehtoh pona,

22 jerutume ehtoh nonory pona, otupitoh pona.

Moroto saereme ehtoh ikohmamyry sã mana, xinukutume rokene.”