2 “Mose Jo sekere kary onezuhsaromepyra sytatou?

Itamurume sekere karyke zae aexiry ekarõko sytatou?

3 Jo, onezuhsaromepyra yna ekarõko mah?

Yna poihtory oya yna mynyhpãtoh ekarõko mah?

4 Õsenetupuhtoh zae rokẽ ekarõko mase.

Ritonõpo a iirypyryme pyra oehtoh ekarõko roropa mase.

5 Ritonõpo otururu etary se ase,

oezukuru eya etary se,

6 Ãmorepary roropa tuaro ehtoh poko, tokare pyra ro ahtao ro, itamurume zuaro ehtoh nae ro mana.

Yrome zuaro ehsaromepyra sytatose.

Tamorepase awahtao eya ynara enetupuhnõko mase:

zokonaka rokẽ awãnohnõko Ritonõpo mana onyrihpyry emetakame.

7 “Imehxo Ritonõpo ehtoh tonẽse mana.

Moro enery se mahno?

Emero Ritonõpo Jamihmehxo Exikety ehtoh poko zuaro ehsaromepyra mase.

8 Kapu atapurupyra mana Ritonõpo omõpyra ehtohme.

Yrome morotona ytosaromepyra mase.

Aorihtyã esary waro Ritonõpo mana.

Yrome moro waro pyra mase.

9 Sero nono zumo ehtoh motye mana,

tuna konõto zumo ehtoh motye roropa.

10 Toytory se Ritonõpo ahtao ahno apoise arotohme apiakatoh taka,

‘Moro poko pyra exiko, Ritonõpo,’

kasaromepyra sytatose.

11 Ahno tõ popyra exiketõ waro Ritonõpo mana;

inyrirykõ popyra ehtoh onenekehpyra mana.

12 Jumẽta ona pono emũkuasaromepyra mana ikuremahpyryme exikety.

Moro saaro putupyra exiketõ tuaro ehsaromepyra mã toto.

13 “Jo, okurohtao eramako ropa Ritonõpo a.

Oemary tõ anỹko õtururume eya.

14 Onyriry xihpyry irumekako.

Oorypyry, nuriame exikety, onyripyra exiko atapyĩ tao.

15 Morararo ehxiropyra exĩko mase,

kure rokẽ ytoytõko mase,

imehnõ zuno pyra.

16 Wenikehnõko mase oetuarimatopõpyry poko, zueme tuna ehtopõpyry samo.

Tãpaise ropa ahtao axĩ tuenikehse ropa mana.

17 Mame isene oehtoh saereh ãko mana xixime ehtoh samo tãxiahtao.

Oemynyhmatoh tonõ ikohmamyry sã tymyakãmase ẽmehtoh samo.

18 Towomaneke exĩko mase, torẽtyke pyra,

kure ehtoh eraximãko rokẽ mase.

Oewomãko Ritonõpo mana, kure rokẽ nyhnõko roropa mase koko.

19 Enaromyra exĩko mase imehnõ poko, õseremaryhtao.

Tuhkãkõ oehnõko mã toto takorehmapotohkõme oya.

20 Yrome popyra exiketõ tỹkakoxi osenuhmãko mã toto, enaromỹke,

otonẽtoh zupĩko mã toto epatohme repe.

Yrome onenepyra mã toto;

toorikyrykõ rokẽ eraximãko mã toto.”