2 “Morohne panõ emero etase pake.

Jemuhkehkara matose,

jerekohmãko rokẽ matose.

3 Sekere kakehpyra hmatou, jũme?

Oty katoh jyhtomary se hmatou?

4 Jesao awahtao xine, oesarykõ po jahtao roropa,

ywy sekere kary oya xine asã xine.

Jupuhpyry kywyh kywyh ykamexipory asã xine tuaro exikety samo.

Morararo openekehkatorỹko ase jomiry ke, asã xine.

5 Mãpyra omi kurã ekaroryhtao emuhkehkananomo a, emynyhmara oehtohkõme, jetuhkopyra oetuarimarykõ exiry.

6 Yrome jotururuhtao jetũ jehtoh onymynyhpãkara mana,

morararo mynyhme jahtao jetuarimary onymynyhpãkara roropa mana.

7 “Ritonõpo, opoe tapotũkehse ywy,

ytapyĩ taõkõ tonahkase oya.

8 Typoremãkase ywy oya, yzehno exiketyme mase.

Tupune pyra toehse ywy, ipihpyry rokene zehpo maro,

morara exiryke jyhxirõko mã toto, iirypyryme jekarõko.

9 “Zehno toexiryke tyxihkase ywy Ritonõpo a;

jenẽko mana yse pyra toehtoh ke.

Onokyro samo jekahmãko mana, jenaroximãko.

10 Imehnõ emero jenaroximãko mã toto,

ẽtakãko mã toto ykerekerematohme,

ypipohnõko mã toto jẽmyty pokona.

11 Ritonõpo jekaroase ajoajohpãkomo a, popyra exiketõ emahpokoxi tokarose ywy.

12 Torẽtyke pyra exiase, osepeme imehnõ maro,

yrome jakurihmoase Ritonõpo;

jesenary ae japoiase ynororo,

tytahkase ywy eya.

Tuotohme exikety sã tyrise ywy eya.

13 Emero rokẽ poe tuose ywy eya typyre ke;

jepyasyhny tuose eya, typosohkase,

ypyno pyra nexiase, juahxirirĩ wino jeresukuru toekuãse nono pona.

14 Soutatu oehtoh sã tooehse ynororo ya. Jyyryhmãko roropa nexiase, ywy tytahtahkase porehme eya.

15 “Jemynyhmaryke upo, topuxiximã risẽ, amuruase. Mame typorohse ywy nono pona, typoremãkase jexiryke.

16 Tyxitase ywy itamurume.

Jẽmyty tõpire toehse,

jenuru tõ tyaose roropa, ikohmamyry samo, xinukutume.

17 Yrome imehnõ onyryhmara exiase,

oturũko exiase Ritonõpo a zae rokẽ ehtoh poko.

18 “Nono, zae pyra yyryhmatopõpyry imehnomo a ononẽpyra exiko!

‘Zae kuapiakako!’ ikohmaryhtao ya, jomiry onymynyhpãkapopyra exiko!

19 Jewomane nae ase kapu ao, moro waro ase.

Mokyro oturukety, jakorehmane moroto mana.

20 Jepe tõ ykerekeremãko mã toto; eramãko ropa ase Ritonõpo a yxitaryme.

21 Tope ewomary sã imepyny a,

moro sã jewomane se hano zae jehtoh ekarotohme Ritonõpo a.

22 Jeimamyry tõ, tuhke pyra toehse,

tõtyhkase ahtao ytõko ase moro osema ae oehpyra ropa jehtohme.