1 Apotũkehnõko ase.

Isene jehtoh enahsasaka mana;

jekepyry zonẽtoh jeraximãko mana seromaroro.

2 Jeunohnanõ japurũko mã toto,

aomirykõ eanahtõko ase.

3 “Ritonõpo, omoro rokẽ jakorehmãko mase;

imepỹ pyra ase zae jehtoh enetupuhponeme.

4 Osenetupuhsaromepyra mokaro tyrise oya, ypoihtonanomo, onenetupuhpyra toto ehtohme senohne poko;

yporemãkapopyra exiko eya xine.

5 Tuaro aexihpyry omihpyry samo:

‘Mokyro mũkuru tõ omise exĩko mã toto, tineru poko tope tõ towokase exiketyme ahtao.’

6 Moro omihpyry ekarõko mã ahno tomo ya,

mame ituh ãko mã toto jẽmyty pona.

7 Tonurẽkara sã exĩko ase jemynyhmaryke,

waxiry tomo japory tõ roropa jerutumã sã rokẽ mã kehko.

8 Jeneryke zae ehtoh poko exiketõ osenuruhkãko mã toto.

‘Ritonõpo turumekase eya,’ ãko mã toto ypoko.

9 Zae exiketyme osekaroketõ mokaro, tamuximehxo exiketomo, orẽpyrahxo zae ehtoh poko exikehpyra mã toto.

Nuriame ehtoh poko pyra exiketõme, orẽpyrahxo zae exiketõme osekarõko mã toto.

10 Yrome aepyry ropa toto ahtao xiaro, toiro tuaro exikety onenepyra jexiry toto maro.

11 “Isene jehtoh enahnõko mana;

josenetupuhtopõpyry tõ torẽse mã kehko,

kure ehtoh eraximary se jehtopõpyry tonahse mana.

12 Yrome jepe tõ mã koko ekarõko ẽmepyryme;

moe hkopyra ẽmepyry ekarõko mã toto,

yrome zuaro ase xinukutumao ro ase.

13 Aorihtyã esary riryhtao ya ytapyĩme,

moroto ataxikãko ase jynyhtohme xinukutumao.

14 Jekepyry zonẽtoh papame ekarõko ase,

moromoro ajame ekarõko ase, woryxiry tõme roropa, morara ahtao

15 otoko kure ehtoh eraximary ya?

Onoky kure ehtoh eraximatoh enẽko nae?

16 Kure ehtoh eraximary ya yhtopyra mana ymaro nono zopikoxi aorihtyã esaka?”