2 “Jo, oty katoh sekere kakehpyra mahno?

Mynyhme exiko, otatõme oehtohme,

mame oturũko sytatose oximaro.

3 Oty katohme tuaro pyra exiketõme yna ekarõko mah,

okyno sã yna ekarõko?

4 Onyetũ ke atapurõko rokẽ mase.

Tohne oexiryke sero nono patãpome exĩko nae?

Opokoino ypy tõ syryhmapõko Ritonõpo nae? Nary.

5 “Popyra exiketõ orihnõko mã toto, saerehkatoh ezehkary samo, apoto sã roropa tozehse ahtao.

6 Ezuru itapyĩ tao tozehsẽme exĩko, saerehkara roropa mana.

Saerehkane esahpokoxi, xinukutume exĩko mana.

7 Jamihme exikety sã ytoytõko nexiase,

yrome seromaroro osetapãko mana.

Tõsenetupuhtoh riry poko epukãko mana.

8 Tarãpa pona toytoryhtao, ipupuru tõ apoĩko mana.

9 Ihtainy tapoise apoitopo a, tũtara ropa aehtohme.

10 Apoitoh tonẽse nexiase nono po, osema tao, mokyro esemary ao.

11 Popyra ehtoh toto zomye toto enaroximãko,

toto ekahmãko roropa aytorykohtao.

12 Tytineruke nexiase,

yrome seromaroro omise mã toto;

mokaro enahkary eraximãko popyra ehtoh mana mokaro apoitohme.

13 Tyrohsẽ popyra orihmatõ emãnõko mana zoko tõ poko,

naeroro jaxiry tomo, apory tõ roropa motãko.

14 Tousẽme exĩko mã toto tytapyĩkõ htae, moro

tao torẽnase toh nexiase towomase sã roropa,

mame tysyryhmasẽme exĩko mã toto Tuisa Orihtoh ẽpataka.

15 Itapyinỹpyry tukurikasẽme exĩko ẽxofere ke nuriame pyra ehtohme,

mame imeĩpo imepỹ moro taka omõnõko mana, moroto ehse.

16 Wewe sã toorihse aexihpyry sã exĩko mana, tonore imity tõ poe amoriry tõ pona.

17 Mokyro poko wenikehnõko imehnõ mana.

Esety poko roropa wenikehnõko mã toto inonory põkomo.

18 Mokyro taroposẽme exĩko mana isene exiketõ esary winoino.

Saereme ehtoh winoino roropa taroposẽme exĩko mana xinukutumã aka.

19 Tumũkue pyra exĩko mana,

typakõke pyra roropa exĩko itapyinỹpyry tosẽke pyra ehtohme.

20 Mokyro orihtoh poko zuaro exiketõ, xixi tũtatoh winoino xixi omõtoh pona,

tykytyky ãko mã toto, enaromỹke toexirykõke.

21 Moro sã popyra exiketõ orihnõko mã toto, Ritonõpo se pyra exiketomo.”