2 “Ahno tuarohxo ahtao ro ipunaka, Ritonõpo akorehmaneme ehsaromepyra mana.

3 Tãkye exĩko Ritonõpo Jamihmehxo Exikety nae ajohpe pyra ehtoh poko awahtao?

Zae rokẽ awahtao emero onyriry poko, Ritonõpo akorehmãko nae?

4 Awãnopyryhtao Ritonõpo a, okohmaryhtao apiakatoh taka, Ritonõpo eahmaryke oya awãnohnõko nae? aomiry omipona oexiryke roropa?

5 Arypyra. Tyyrypyhpyke oexiryke pitiko rokẽ pyra, onyrihpyry tõ popyra ikuhpỹme roropa exiryke, awãnohnõko Ritonõpo mana.

6 Axĩtao rokẽ otinerũ mekaroase imehnõ ononory põkomo a repe,

yrome zupõ tapoise oya,

tupoke pyra toto tynomose oya, oepehmapotohme ropa eya xine.

7 Tuna onekaropyra mexiase tapotũkehse exiketomo a,

tonahsẽ onekaropyra mexiase omise exiketomo a roropa.

8 Ajamitunuru ke, imehxo oexiryke roropa nono esẽme toehse mase.

9 Poetõpo tõ winoino ijamitunuru tomatonanohse oya,

pytỹpo tõ anakorehmara mexiase ipunaka.

10 Morara exiryke seromaroro popyra ehtoh tuhke ãpurũko mana,

mõtoino rokẽ enaroxitapãnõko mase.

11 Tykohmãse opona, osenuhmasaromepyra mexino,

tuna zueme toehse opona.

12 “Ritonõpo kaehxo mana kapu ao;

zopikoxi osenuhmãko mana xirikuato tõ pona, kae kuhse kehko ahtao ro kyya xine.

13 Yrome ekaropõko mase:

‘Oty waro Ritonõpo nae?

Akurũ tõ xinukutumãkõ moroto mana, irãnao.

Otãto kuapiakatorỹko nae?’

14 Jo, kuenesaromepyra xine Ritonõpo ekarõko mah akurũ xinukutumãkõ pokoino, kapu kuroko aytoryhtao?

15 “Popyra exiketõ esemary ae oytory se hma?

Moino ro tynyrirykõ popyra onyrikehpyra toh nexiase.

16 Mõtoino rokẽ toorihse toh nexiase, tarose samo tuna zueme exikety a.

17 Ynara tykase toto Ritonõpo a:

‘Yna inomoko torẽtyke pyra!’

Ynara tykase roropa:

‘Oty rĩko Ritonõpo Jamihmehxo Exikety nae kypoko xine?’

18 Yrome Ritonõpo a, popyra exiketõ tapyĩ tõ pehme tyrise mõkomo kurã ke,

naeroro mokaro omiry zae pyra mana ya.

19 Popyra exiketõ enahkary eneryke zae exiketomo a

exianãko mã toto tãkye toexirykõke, toto eunohnõko mã toto,

20 popyra exiketõ mõkomory enahkary eneryke tyya xine.

‘To! Myhene! Kuepetõkara tonahkase mã toto!’

ãko mã toto.

21 “Jo, osepeme exiko Ritonõpo maro,

oepekara sã mokyro onyripyra exiko,

morarame kure rokẽ orĩko ropa mana.

22 Otatõme exiko ãmoreparyhtao Ritonõpo a,

aomiry ikurãkako okurohtao.

23 Oeramary ropa ahtao Jamihmehxo Exikety a oesekumuru po, popyra ehtoh enahkaryhtao oya atapyĩ tao emero porehme,

24 otinerũ uuru tõkehko pyno nymyry pyra awahtao, morohne tomase ahtao oya nakuaka,

25 Ritonõpo Jamihmehxo Exikety uurume sã exĩko mã oya, parata kurãme sã roropa itamurume oya exĩko mana.

26 Morarame atãkyemãko mase Ritonõpo poko,

enaromyra exĩko mase ajoajohpãkarame oexiryke.

27 Õtururu eya etãko mana,

õmihpyry ae ro onekarory tõ enehnõko mase ekarotohme eya.

28 Onyriry tõ emero kure rokẽ exĩko mana.

Saereme exikehpyra exĩko mana oesemary ae.

29 Epyrypaketõ ime pyra tyrĩko Ritonõpo mana.

Yrome epyrypara exiketõ pynanohnõko mana.

30 Opynanohnõko Ritonõpo mana popyra ehtoh poko pyra awahtao, zae ehtoh poko rokẽ exikehpyra awahtao.”