2 “Seroae ro Ritonõpo kerekeremãko ase;

pusuh kakehsaromepyra ase.

3 Zuaro jexiry se ase otoko oseporỹko ha imaro;

jytory se ase esaka,

4 oturuse jehtoh poko, ekarotohme zae jehtopõpyry poko emero porehme.

5 Zuaro jexiry se ase Ritonõpo omiry poko,

jezuhtoh se roropa ase eya.

6 Otarame tyjamitunuru ke yporemãkãko mana.

Otarame arypyra!

Ynara enetupuhnõko ase:

jotururuhtao jomiry etãko mana.

7 Ajohpe pyra exiketyme ase.

Otarame osekarõko ase emero porehme inetaryme.

Mame jũme rokẽ iirypyryme pyra jekarõko mana.

8 “Ritonõpo zupiryhtao ya xixi tũtatoh wino, moroto pyra mana;

jytoryhtao xixi omõtoh wino, onenepyra ase.

9 Toerokuru poko ynororo ahtao inikahpozakoxi, ikurenaka roropa, moroto onenepyra ekurehnõko ase.

10 Yrome jytojytory waro mana ipunaka;

tukuhse jahtao eya, uuru kurã sã exĩko ase ineneryme.

11 Esemary ae ytõko ase,

inenepohpyry ya ekahmãko ase aomiry omipona,

zae ehtoh esemary onurumekara ase.

12 Anamonohpyra ase Ritonõpo nyripohpyry omipona jehtoh poko;

ise Ritonõpo ehtoh sehxo hano, ypenetatoh se jehtoh motye.

13 “Tyriry se Ritonõpo ehtoh rĩko mana,

tõsenetupuhse ynororo ahtao tyritohme, onytyoromara imehnõ mana.

14 Tõsenetupuhtoh ritohme ymaro tyrĩko mana etyhpyry pona.

Imehnõ riry se aehtoh tuhke rĩko roropa mana.

15 Morara exiryke orẽnõko ase ẽpataka.

Moro poko osenetuputyryhtao enaromỹke exĩko ase.

16-17 Ikohmamyry a tonurẽkara sã tyrise ywy;

yrome Ritonõpo Jamihmehxo Exikety mã jerehpõko mana,

ikohmamyry a jerehpopyra mana.