2 “Piutate, jamihme pyra ase,

tapotũkehse ywy.

Ohkato toehse mase jakorehmase!

3 Emese kure mase imepỹ akorehmary poko zae ehtoh waro ehtohme.

Tuarohxo oehtoh ke putupyra exikety ysã exikety amorepãko mase!

4 Onoky a takorehmase mano õtururu poko, moro samo?

Onoky zuzenu poe morohne poko ekarory waro mexino?”

5 “Aorihtyã zuzenu tõ tykytyky ãko mã toto enaromỹke toexirykõke, tunakuaõkomo nono zopino.

6 Ritonõpo a aorihtyã esary totapuruhmakase mana;

apuru pyra mana, morohne enẽko mana.

7 Kapu tyrise Ritonõpo a amerehmã epoe, inikahpozakoxi.

Sero nono tyhwyme sã tyrise eya amerehmã po.

8 Tuna rĩko mana akurũ aka, xinukutume ehtoh taka.

Yrome moro akurũ tõ ohpahpyra mã kehko omoxĩ tuna ahtao ro.

9 Nuno ẽmyty oxiõtõko mana akurũ ke zumome ahtao.

10 Saerehkatoh apiakãko mana ikohmamyry wino,

parihmã ke tymerose tuna konõto pokona.

11 Xikihme exiketõ, kapu apõ tõ enaroximaryhtao eya oserehnõko mã kehko,

tykytyky ãko mã kehko enaromỹke toehtohkõke.

12 Tyjamitunuru ke tuna konõto kuremãko mana.

Tuaro toehtoh ke ihpory Raape tonahkapose eya.

13 Pũ katoh ke kapu tukurãkase Ritonõpo a,

tomary ke Okoimo epakety totapase eya.

14 Yrome moro enetupuhpotoh pitiko rokẽ mã kehko, puti puti katoh sã rokẽ inyriry waro kuehtohkõme.

Ijamitunuru nymyry imehxo ehtoh waro ehsaromepyra ahno mana.”