27
Jo oturutopõpyry tope tomo a
(27.1-12)
Zae jehtoh poko oturukehpyra ase
1 Mame Jo tõturuse ropa, ynara tykase:
2 “Jomiry etapõko ase Ritonõpo Jamihmehxo Exikety netaryme,
zae jyriry se pyra mã ynororo,
itunety rokẽ ekarõko ya mana, ukurohtaka.
3 Ritonõpo poe oseremãko ro jahtao,
4 zae pyra ehtoh oturupyra exĩko ase,
ajohpe exipyra roropa ase.
5 ‘Zae mexiatose jyhxiroryhtao,’
kara ase jũme.
Isene ro jahtao, zae rokẽ jehtoh poko kakehpyra ase.
6 Etyorõmara ase,
zae rokẽ jehtoh poko oturukehpyra ase, ehxiropyra jexiryke ukurohtao.
Jepetõkara wãnopyry se ase Ritonõpo a
7 “Ah jepetõkara emero popyra jyriry se exiketomo tuãnohse nexĩ toto popyra exiketõ samo, iirypyrymãkõ samo.
8 Oty kure ehtoh eraximãko Ritonõpo waro pyra exiketõ nae aorihtoh toehse ahtao?
9 Popyra ehtoh toehse ahtao eya xine,
kui karyhtao takorehmapotohkõme
aomirykõ onetara exĩko Ritonõpo mana.
10 Atãkyemara mã toto Ritonõpo poko,
oturupyra roropa mã toto Ritonõpo Jamihmehxo Exikety a.
11 “Ãmorepatorỹko ase Ritonõpo Imehxo Exikety jamitunuru poko,
mokyro Jamihmehxo Exikety osenetupuhtoh ritoh ekarõko ase oya xine.
12 Yrome ãmoreparykõ se pyra matose ya, morohne tonese oya xine exiryke.
Morara exiryke oty katoh putupyra exiketõ sã sekere ãko matou?
Zopaa oturutopõpyry asakoropanemano
(27.13-23)
Popyra exiketõ wãnohnõko Ritonõpo mana
13 “Popyra exiketõ, imehnõ ryhmananõ wãnopyry poko Ritonõpo Jamihmehxo Exikety a ekarõko ase oya.
14 Ipoenõ emitapãnõko mã toto,
imũkurukõ tuhke toto ahtao ro orihnõko mã toto etonatoh poko;
15 akoĩpyry isene ro exiketõ tyrohsẽ ke orihnõko mã toto.
Mame ipytỹpyrykõ xitara exĩko mã toto tyniokõ hnamotohme.
16 “Parata itamurume apoiryhtao eya, nono samo, upo roropa apoiryhtao eya kaetoko exikety samo,
17 imepỹ zae ehtoh poko exikety moro upo amurũko mana,
mame ajohpe pyra exikety moro parata esẽme exĩko mana.
18 Popyra exikety wewe xihpyrymã ke tapyi amõko mana.
Okynã pyra exĩko mana, arakaku nyrihpyry samo, tupito erase nyrihpyry sã roropa tupito po.
19 Etyhpyryme ataxikãko mokyro mana itamurume tineru esẽme mã repe,
yrome typakase ropa ynororo ahtao pake itinerũ tõtuenikase.
20 Popyra ehtoh mokyro pona oehnõko mana tuna zueme exikety samo.
Koko tarosẽme exĩko mana tyryrykane konõto a.
21 Itapyĩ tae tarosẽme exĩko mana tyryrykane jamihme exikety a xixi tũtatoh wino.
22 Tyryrykane konõto ahno ryhmãko yronymyryme toeparykõ se ahtao ro.
23 Tururume ytõko mana torehse toexiryke,
jamihme exiryke emero enahkãko mana.”