1 Nono ahkatoh nae parata outohme,

osa tõ nae roropa uuru zahkatoh tonõ ikurãkatohme.

2 Kurimene tõkehko touse mana nono ae,

topu tõ poe metau osenẽko, tuname tyrise ahtao apoto ke.

3 Tymaro xine ezuru arõko ahno mana nono zopikoxi;

moroto xinukutumao uuru tõkehko zupĩko mã toto.

4 Moe pata tõ poe eutary ahkãko mana, ahno esahpokoxi,

morotona ahno ytopyra ipunaka.

Toiroro erohnõko mana tyhwyme,

kywyh ãko mana.

5 Epoe tiriiku ahtãko tupito tõ po nono po,

yrome zopino emero tyxihkase sã mana, tykararahse.

6 Topu tõ ao sapira tõ nae mana,

nono ao uuru nae roropa mana.

7 Osema eutary aka nono aka onenepyra piano tomo,

morohne onenepyra kurumu tomo roropa.

8 Moro osema ae ytopyra kaikuxi tamuru tomo, imehnõ onokyro tõ orẽpyra exiketõ roropa, osekatõ komo.

9 Topu tõ tũpore exiketõ ahkãko ahno mana.

Ypy tõ akohnõko mã toto aryhnaka imity tõ ritohme.

10 Eutary tõ ahkãko mã toto topu tõ aka,

otyro kurã emero enẽko mã toto.

11 Ahkãko mã toto tuna enatyry tõ pona,

morohne osenepyra aexityã enehnõko mã toto saereme ehtoh aka.

12 Yrome otoko tuaro ehtoh enẽko sytatou?

Otoko zuaro ehtoh tukurãkase nae?

13 Tuaro ehtoh typyne exiry waro pyra ahno mana,

moro onenepyra roropa mã toto sero nono po.

14 Tuna konõto zueme ehtoh ynara ãko sã roropa:

“Tuaro ehtoh yna maro pyra mana,” ãko.

15 Tuaro ehtoh osepekahsaromepyra mana uuru ke te, parata ke roropa.

16 Uuru kurã motye mana,

topu kurã motye roropa typyne tuaro ehtoh mana, akata te, sapira tomo, enara.

17 Uuru motye tuaro ehtoh kure mana, kutehi kurã motye roropa.

Uuru risẽ kurano ipune pyra mana tuaro ehtoh epehmatohme.

18 Korau motye, kyrixtau motye, morohne motye tuaro ehtoh kure mana rupi tõ motye, perora tõ motye roropa.

19 Topazio motye Etiopia poe, uuru kurã roropa;

moro motye kuhse tuaro ehtoh mana.

20 Oty poe tuaro ehtoh oehnõko nae?

Otoko na zuaro ehtoh seromaroro?

21 Tuaro ehtoh onenesaromepyra isene exiketõ mã emero porehme.

Torõ tõ roropa, pohpohme ytoytoryhtao tuaro ehtoh onenesaromepyra mã toto.

22 Aorihtoh roropa enahkatoh maro ynara ãko sã mã toto:

“Tuaro ehtoh poko imehnõ otururu totase rokẽ yna a,” ãko.

23 Ritonõpo rokẽ zuaro mana tuaro ehtoh esemary poko.

Ynororo rokẽ tuaro ehtoh esary waro mana.

24 Sero nono etyhpyry tõ eneryke eya,

emero osa tõ enẽko mana,

sero nono põkõ nyriry roropa emero enẽko mana.

25 Tyryrykane jamitunuru tokarose ahtao eya,

tuna konõto zumo ehtoh tymerose roropa ahtao eya,

26 tõmiry omipona konopo tyripose ahtao eya,

tyryrykane esemary tyripose roropa ahtao eya,

27 morohne toehse ahtao tuaro ehtoh tonese eya,

tukuhse roropa eya, “Kure mana,” tykase ynororo ipoko.

28 Ynara tykase ynororo ahno a:

“Tuaro oexirykõ se awahtao xine,

Imehxo Ritonõpo Ehtoh enetupuhtoko aomiry omipona oehtohkõme;

zuaro ehtoh enetuputyry se awahtao xine popyra ehtoh irumekatoko.”