2 “Pake ehtopõpyry poko penetãko ase, towomase jehtopõpyry Ritonõpo a!

3 Morarahtao jesemary pona saereh tykase Ritonõpo,

ezuru ae ytoase ixinukuturu htoko.

4 Moro ẽmepyry tõ ae kure rokẽ exiase,

osepeme jehtopõpyryke Ritonõpo maro ytapyĩ towomase nexiase.

5 Ritonõpo Jamihmehxo Exikety ymaro nexiase,

ypoenõ roropa tytapyĩke toh nexiase ytapyĩ pũto.

6 Ytapyĩ tao suhsu nae nexiase pitiko rokẽ pyra, azeite roropa,

azeitona zoko tõ roropa tahtase topu tõ rãnao.

7 Toytose jahtao oximõtoh taka apiakatoh tao, typorohse jahtao juize tõ maro,

8 nuasemãkõ tãtapiakase toh nexiase jesemary etapuruhmakatohme jytotohme,

tamuhpomãkõ roropa towõse toh nexiase.

9 Ahno tuisary tõ tymynyhpãse toh nexiase,

sekere kara toehse;

10 tamuximehxo exiketõ mynyhme toehse tuisamehxo jekaroryke eya xine.

11 “Jotururu etaryhtao imehnomo a kure rokẽ tyripose ywy eya xine,

jenenanõ tõturuse kure ypoko.

12 Tymõkomokãkara takorehmase ya takorehmarykõ se exiketomo,

poetõpo tõ pyno exiase, towomaneke pyra exiketomo.

13 Kure rokẽ tyripose ywy etuarimaketomo a,

pytỹpo tõ tãtãkyemase takorehmarykõ poko ya.

14 Zae rokẽ exiase imehnõ poko, ajohpe pyra

roropa exiase. Upo amururu sã torẽnase exiase zae rokẽ imehnõ riry poko.

15 Tonurãkara enurume sã exiase, pupume exiase ahmitahpyryme exiketomo a.

16 Jũme exiase tymõkomokãkara a; ewomaneme

exiase imehnõ nonory poe aepyhpyamo a.

17 Imehnõ ryhmananõ jamitunuru tonahkapose ya, iiryhmatyã typynanohse ya.

18 “Ynara osenetuputyase:

‘Okynahxo isene ro exĩko ase.

Imeĩpo orihnõko ase ytapyĩ tao jetũ pyra, tãkye rokene.

19 Wewe sã exiase tymise exikety,

imity tõ ytõko tuna pona,

amoriry tõ tohxikase mã kehko konopo ke.

20 Kure rokẽ jekãtõko imehnõ mana,

ywy jamihme exikehpyra exĩko ase, orẽpyra exiketyme roropa.’

21 Imehnõ turuse ya ahtao, otatõme toh nexiase mynyhme rokene.

Tomeseke sã jomiry totase eya xine.

22 Tõturukehse jahtao jezuhpyra toh nexiase.

Osenetupuhnõko rokẽ toh nexiase jomihpyry poko.

Konopo sã jomiry nexiase etananomo a.

23 Toto zamaro jomiry nexiase,

konopo oepyry sã tupito esẽ zamaro eina pyra ro ahtao.

24 Tõseahmase ywy mokaro maro, typenekehse aexityã kurãkõ eraximary poko.

Otarame jẽmyty eneryke tyya xine tõseanahtose nexiase toto.

25 Mokaro tuisaryme sã exiase,

toto esemary menekãko,

toto nyriry menekãko roropa.

Toto maro tuisa sã exiase tysoutatu tõ maro,

toto arõko etonatoh taka;

toto emuhkehkãko roropa exiase ihnamoryhtao.