1 “Jomihpyry etapoase ya ro imepỹ nohpo onenepyra jehtohme ipoko ipenetaryino.

2 Moro jomihpyry omipona pyra toehse jahtao, oty rĩko Ritonõpo Jamihmehxo Exikety nae juãnohtohme?

Oty ke kuepehmatorỹko nae kynyrirykõ emetakame.

3 Popyra ehtoh enehpõko mana, iiryhmatoh roropa popyra exiketõ wãnohtohme.

4 Ynyriry emero waro Ritonõpo mana.

Jytojytory enẽko roropa mana.

5 “Popyra ehtoh poko exipitopyra exiase,

imehnõ onenekunohpitopyra roropa exiase.

6 Jukukuru se ase Ritonõpo a ikuhtoh ajohpe pyra exikety ke.

Zae rokẽ jehtoh enẽko mana.

7 “Zae ehtoh poko turumekase ahtao ya, iirypyryme jehtoh poko typenetase jahtao imepỹ kyryry tapoise ahtao ya,

8 ah imehnõ notuhno toto ynarykahpyry epery poko.

Ah ynarykahpyry enahno toto.

9 Typenetase jahtao imepỹ pyty poko,

tõtonẽse jahtao itapyĩ omõtoh enery poko,

10 moro sã jahtao ah ypyty imepỹ namotome nexino.

Ah imehnõ ipoko nexĩ toto.

11 Moro popyra ehtoh tyrise ahtao ya,

zae exiry tapiakase jahtao,

joorikyry ke tuãnohse roropa jahtao,

12 moro rypyry apoto konõto sã exiry, tapyi zatyry samo, popyra ipunaka, ỹkyryry tõ kurã emero enahkatohme.

13 “Tykerekeremase jahtao ypoetory a zae oturuase imaro moro kurãkatohme atae yna ehtohme.

14 Moro sã pyra jahtao otara ykary Ritonõpo a tapiakase jahtao eya?

Otara ezuhnõko ha tõturupose jahtao Ritonõpo a ynyrihpyry poko?

15 Ritonõpo ro, Yrihpono ypoetory tõ Rihpõme roropa mana.

16 “Tymõkomokãkara anakorehmakehpyra exiase, pytỹpo tõ roropa ixitarykohtao aetuarimarykohtao.

17 Toiroro otuhpyra exiase,

tonahsẽ ekaroase poetõpome aexityamo a.

18 Toto pyno exiase ypoenõ pyno jehtoh samo,

pytỹpo tõ towomase roropa ya nexiase.

19 Ahno eneryhtao ya orihnõko, kuenime toehse exiryke, tupoke pyra axitunety ke exiryke,

imepỹ tytineruke pyra exikety tonese ahtao ya tãtyke pyra,

20 upo axitunety ekaroase eya kaneru hpoty risemy, jeky tõ poe.

Tãkye toehse ynororo toahmase ywy eya yronymyryme.

21 Poetõpo tyyryhmase ahtao ya takorehmase jahtao juize tomo a,

22 ah japory tõ tytahkase nexino,

ah japory tõ touse nexĩ kehko ymotary tõ poe.

23 Morohne onyripitopyra exiase juãnopyry Ritonõpo a zuno jexiryke,

ytosaromepyra exiase mokyro Imehxo Exikety ẽpataka.

24 “Uuru onyripitopyra exiase Ritonõpo myakãme, ipoko penetatohme orẽpyrahxo jehtohme.

25 Epyrypapitopyra exiase itamurume tineru esẽme jehtoh poko, itamurume tineru apoiry poko roropa ya.

26 Xixi enease saereme ahtao, nuno roropa enekure kapu kuroko aytoryhtao,

27 yrome toto oneahmapitopyra exiase ukurohtao ro, tokare pyra roropa.

Jemary onypohpyra exiase toto eahmaryme.

28 Morohne tyrise ahtao ya iirypyryme jexiry Ritonõpo Imehxo Exiketyme pyra ekaroryke ya,

mame tuãnohsẽme jexiry rahkene.

29 “Atãkyemapitopyra exiase jepetõkara etuarimary poko, mokaro ryhmatopõpyry poko roropa.

30 Oturupitopyra exiase Ritonõpo a mokaro etapapotohme.

31 “Ypoetory tõ zuaro mã toto imehnõ toahmase

ya, kure tõtuhse toto tõsẽ kurano ynekarohpyry eya xine.

32 Imepỹ nono poe aepyhpyã jarao onynomopyra exiase osema tao ẽmehtohme,

osa ekaroase eya xine nyhtohme ytapyĩ tao.

33 Azahkuru jehtopõpyry ononẽpitopyra exiase, imehnõ sã pyra.

34 Imehnõ omiry zuno pyra exiase;

Otonẽpyra exiase ytapyĩ tao,

mynyhme pyra exiase ykerekeremary kurũke eya xine.

35 “Jomiry etary sehxo hano imehnomo a!

Oturukehnõko ase zae jehtopõpyry poko;

jezukuru sehxo hano Ritonõpo Jamihmehxo Exikety a!

Jyhxirotoh tymerose ahtao moro enery se exiry.

36 Morohne yriry ymotary po epyrypakety samo,

jupuhpyry pona morohne yriry roropa parimã samo.

37 Ritonõpo a ynyrihpyry emero ekarory, ẽpataka xikihme jexiry, ihximyra, tupuehme kara.

38 “Ynonory onematonanohpyra exiase esẽ wino.

Tomatonanohse ahtao ya,

39 otyro epery tonahse ahtao ya topehke pyra,

ipoko aerohtyã onepehmara jahtao,

tomitapãkapose toto ahtao ya,

40 ah omoxino tõ nahtano tiriiku myakãme, ãtarykahme roropa sewata myakãme.”