Eriu oturutopõpyry
32
Jo 32—37
1 Zae rokẽ toehtoh poko oturukehpyra Jo nexiase. Morara exiryke epe tõ oseruaõkõ tõturukehse toto, onezuhpyra toehse toh nexiase. 2 Yrome moroto imepỹ orutua nexiase, esety Eriu, Parakeu mũkuru, Puze ekyry, Rão ekyryme roropa. Tohne toehse Eriu nexiase Jo poko, zae rokẽ tõsekarose ynororo exiryke, zaẽkara sã Ritonõpo ekaroryke roropa eya. 3 Mokaro roropa, Jo epe tõ oseruaõkõ zehno roropa nexiase, Jo onezuhsaromepyra toto exiryke. Morara exiryke zae pyra Ritonõpo tokarose sã eya xine. 4 Toraximase Eriu a aporo, etyhpyryme rokẽ tõturutohme, tamuhpõmehxo mokaro exiryke. 5 Yrome Jo ezukuru waro pyra mokaro ehtoh eneryke tyya, tohne toehse Eriu rahkene.
Eriu oturupitory
(Jo 32—33)
Jamihmehxo Exikety Zuzenu tuaro kamexipõko
6 Mame Eriu, Parakeu mũkuru, Puze pary ynara tykase:
“Poetome ro ase, amarokõ tamuhpõmehxo matose.
Morara exiryke enaromỹke exiase,
josenetupuhtoh ekarory oya xine zuno exiase.
7 Ynara osenetuputyase:
Ah mokaro tamuhpomãkõ noturũ toto,
tuarohxo mã toto, ase.
8 Yrome tuzenuke ahno mana,
Ritonõpo Jamihmehxo Exikety Zuzenu tuaro kamexipõko mana.
9 Tuarohxo exipyra sytatose tamuhpõme toehse rokẽ kuahtao xine,
ahno nae, zae ehtoh waro pyra ro tytamuhpopãse toto ahtao.
10 Naeroro etatoko pahne jomiry.
Josenetupuhtoh ekarõko roropa ase.
Ritonõpo rokẽ Jo ezuhnõko mana
11 “Õtururukõ eraximase, mokyro ezuhtoh oya xine etatohme repe.
Omi kurã tymenekase ahtao oya xine,
12 õmirykõ etãko rokẽ exiase.
Yrome Jo osenetupuhtoh onytyoromara mexiatose,
aomiry onezuhpyra tokurehse mexiatose.
13 ‘Tuaro toehse ynanase,’ kasaromepyra matose.
Ritonõpo rokẽ, ahno kara, Jo ezukuru waro mana.
14 Mokyro onezuhpyra jexiry asã xine.
Yrome amaro xine oturũko Jo nexiase ymaro pyra.
Josenetupuhtoh ekarory se ase
15 “Jo, moxiã oseruaõkõ tõturukehse toto,
mynyhme toehse toh mana.
16 Tymynyhpãse mã toto, sekere kara toehse.
Eraximãko ro hano oturupyra toto ahtao?
17 Arypyra! Ezuhtoh ekarõko ase seromaroro.
Oturũko ase josenetupuhtoh moro poko.
18 Itamurume nae ase oturutohme,
mynyhme ehsaromepyra toehse ywy.
19 Oturupyra jahtao otarame ehmõko ase eukuru ẽ samo, eukuru jehnahpyry ke pehme exikety samo.
20 Oneanahtopyra toehse ywy,
jotururu se hano jetuhkopyra ehtohme.
Josenetupuhtoh ekarory se ase.
21 Zae rokẽ oturũko ase, ajohpe pyra ipunaka,
opyrypara xine ase ipunaka.
22 Jepyrypary waro pyra ase,
moro riryhtao ya, axĩ juãnohnõko Ritonõpo mana.