33
Josenetupuhtoh ekarõko ase
1 “Naeroro, Jo, etako pahne jomiry,
otato exiko jotururu poko.
2 Tõsenetupuhse ywy,
josenetupuhtoh ekarory se ase oya.
3 Topohme josenetupuhtoh ekarõko ase oya,
ajohpe pyra ase.
4 Ritonõpo Zuzenu a tyrise ywy,
Ritonõpo Jamihmehxo Exikety oseremaryke isene ase.
5 “Kuezuhko jezukuru waro awahtao.
Ezuhtoh anonohko osezuhtohme.
6 Ritonõpo a oxisã sytase;
ywy roropa ase orino risemy.
7 Morara exiryke juno pyra exiko;
ãkurihmory se pyra ase.
Zae rokẽ oehtoh ekarõko mase
8 “Õmiry etase ynara karyhtao oya:
9 ‘Iirypyryme pyra ase, popyra ehtoh poko pyra jexiryke ipunaka.
Zae rokẽ ase; azahkuru pyra ipunaka
10 Ritonõpo ikonehmãko rokẽ mana etonatohme ymaro.
Topekarame jekarõko mana.
11 Upupuru tõ tymyhse eya keti tõ ke.
Jenekehpyra roropa mana ynyriry emero enetohme.’
Ritonõpo otururu osehta mana
12 “Yrome ynara ãko ase oya:
Azahkuru mase, tynyrihpyry ahnomãkõ motye Ritonõpo mana.
13 Oty katohme Ritonõpo hxirõko mah, ynara karyke:
‘Tykerekeremary kyya xine onetara mana?’
14 Osehta oturũko Ritonõpo mana,
yrome otato pyra sytatose.
15 Koko, nyhtoh po, tynyhse kuahtao xine yronymyryme, osenehtoh ae, aosenepotoh ae roropa,
16 oturũko Ritonõpo mana ahno a ipanary aka,
enaroximãko mana.
17 Oturũko mana ahno a iirypyrykõ rumekatohme, epyrypara toto ehtohme roropa.
18 Morararo ahno pynanohnõko mana orihpyra ehtohme, kuetapara xine imehnõ ehtohme.
Kukurãkatorỹko Ritonõpo mana
19 “Toitoine ahno wãnohnõko Ritonõpo mana kure pyra ehtoh ke, jetũ itamurume ehtoh ke, okynahxo roropa.
20 Mokyro kurãkara omise pyra exĩko mana,
tonahsẽ tomepore exikety enery se pyra exĩko mana.
21 Punatãnõko mana, osenahkãko mana,
ipihpyryme rokẽ exĩko mana,
jehpyry tõ osenẽko mã kehko;
22 orihsasaka mana,
okynã pyra ekepyry arõko mã toto zonẽtohme.
23 “Otarame ipynanohnõko Ritonõpo nenyokyhpyry mana.
Tuhke miumãkõ nae inenyohtyamo.
Ahno amorepãko mã toto zae ehtoh riry poko.
24 Ipyno tahtao oturũko mana Ritonõpo a:
‘Imyhpokako ropa, orihpyra aehtohme!
Sero mana ipynanohtoh epehpyryme.’
25 Mame ekurãkãko ropa mana,
jamihme zoko exĩko ropa, nuaseme exiketyme samo, poetome toehtopõpyry samo.
26 Aotururuhtao Ritonõpo a, etãko mana.
Tãkye toehtoh ke Ritonõpo eahmãko mana.
Ritonõpo zamaro exĩko roropa mana, zae exikety ehtoh samo.
27 Ynara ãko mana imehnomo a emero:
‘Iirypyryme exiase, zae pyra ehtoh poko exiase.
Yrome juãnohpyra Ritonõpo nexiase.
28 Typynanohse exiase eya orihpyra jehtohme.
Saereme ehtoh enẽko ro ase.’
29 “Morohne emero rĩko Ritonõpo mana kyya xine.
Mame tyrizomõko ropa mana.
30 Kuorihmapopyra xine mana.
Naeroro isene ro sytatose saerehkatoh enetohme kyya xine, saerehkatoh ao isene kuehtohkõme.
31 “Seromaroro, Jo, otato exiko;
oturupyra exiko jotururuhtao ro.
32 Ezuhtoh nae awahtao, kaxiko ya, tãkye jexiry zae oehtoh enetuputyryhtao ya.
33 Yrome arypyra ahtao mynyhme rokẽ exiko jomiry etatohme.
Ãmorepãko ase tuaro oehtohme.”