2 “Tuaro exiketomo, tamorepase exiketõ roropa, etatoko ke jotururu.

3 Tõsẽ kurã waro sytatose tomepore ahtao kyya xine, ahno omiry etaryhtao kyya xine zae aomiry ehtoh kuhnõko sytatose.

4 Naeroro seromaroro Jo ehtoh poko satamorepatone zae ehtoh waro kuehtohkõme.

5 “ ‘Zae rokẽ ase,’ ãko Jo mana;

‘Ya zae ehtoh onyripyra Ritonõpo mana,’

ekarõko roropa mana.

6 Ekaropõko mana:

‘Otyme kure ajohpe jotururuhtao, azahkuru jekaroryhtao?

Kure pyra ase, ekurãkapỹme, iirypyryme pyra jahtao ro.’

7 “Sero nono po imepỹ pyra mana Jo sã exikety.

Eya Ritonõpo kerekeremary tupime pyra mana, tuna enyry samo.

8 Popyra exiketõ maro ytoytõko mana,

zae pyra exiketõ maro oximõnõko roropa mana.

9 Ynara ãko roropa mana:

‘Toiparo rokẽ mana Ritonõpo zamaro ehtoh kukuruhtao kyya xine.’

10 “Seromaroro, tuaro exiketomo, jomiry etatoko.

Azahkuru ehtoh rĩko Ritonõpo nae?

Ritonõpo Jamihmehxo Exikety zae pyra ehtoh onyripyra mana.

11 Zae kuepehmatorỹko mana kynyrihpyrykõ epehpyryme, kure kuehtopõpyrykõ emetakame.

12 Ritonõpo Jamihmehxo Exikety popyra ehtoh onyripyra mana.

Zae ehtoh poko rokẽ mana imehnomo a emero porehme.

13 Onoky a tyjamihtanohse Ritonõpo nae?

Onoky omi poe kapuaõkõ Esẽme emero toehse roropa nae?

14 Ise Ritonõpo toehse ahtao, kuoserematohkõ puxihkãko ropa mana;

15 moro toehse ahtao ahno emero orihnõko oximõme,

nonome exĩko ropa mã toto.

16 “Seromaroro, Jo, tuaro awahtao jomiry etako,

otato exiko.

17 Zae ehtoh se pyra Ritonõpo ahtao otãto senohne emero tõmiry omipona tyrĩko nae?

Iirypyryme mokyro riry se hma,

zae Exiketyme ynororo ahtao ipunaka, Jamihme Exiketyme roropa mana?

18 Tuisa tõ wãnohnõko Ritonõpo mana, kowenume erohketõ roropa zae pyra toto ahtao,

toto wãnohnõko mana popyra toto exiryke.

19 Kurehxo tuisame exiketõ onyripyra Ritonõpo mana, tamuximãkõ roropa,

popyrahxo tymõkomokãkara onyripyra roropa mana, emero ahno tyrise exiryke eya.

20 Ahno orikyry otarame oehnõko mõtoino rokene, otarame onoa.

Eano mynyhpãnõko mana,

mame orihnõko mokyro mana.

Takorehmane se pyra Ritonõpo mana tuisame exiketõ etapatohme.

21 Ynara exiryke kynyrirykõ emero enẽko mana.

Kuenetorỹko roropa mana ytoytõko kuahtao xine.

22 Osa pyra mana, otonẽtohme xinukutumehxo exikety, iirypyryme exikety otonẽtohme onenepyra Ritonõpo ehtohme.

23 Ẽmepyry menekary se pyra Ritonõpo mana zae ahno apiakatohme, iirypyrykõ emero zuaro mana.

24 Tamorepary se pyra roropa mana tuisamehxo exiketõ kuhtohme, toto enahkatohme, esarykõ ekarotohme imehnomo a.

25 Ynara exiryke, mokaro nyriry waro Ritonõpo mana; koko toto akohnõko mana, toto akurihmõko roropa mana.

26 Jarao, emero rokẽ neneryme, toto wãnohnõko Ritonõpo mana popyra exiketõ wãnopyry samo.

27 Irumekary se toehse toto exiryke, inyripohpyry tõ omipona pyra toehse roropa toto exiryke.

28 Tymõkomokãkara kui tykamexipose eya xine Ritonõpo netaryme,

aomirykõ totase eya, tykohmary takorehmatohkõme.

29 “Yrome Ritonõpo mynyhme toehse ahtao, ‘Popyra mana,’ kasaromepyra exĩko imehnõ mana.

Tõmyty tonẽse ahtao eya takorehmaneke pyra kymarokõ exiry, towomaneke pyra roropa.

30 Moro toehse ahtao osewomara exĩko sytatose popyra tuisa tõ winoino,

kowenume toto exĩko, kynonorykõ ryhmatohme.

31 “Jo, oorypyry epehpyryme oetuarimary ehtoh menetupuhno Ritonõpo ẽpataka.

Õmiry etapõko mah eya oorypyry poko pyra ropa oehtohme?

32 Mekaropoase Ritonõpo a azahkuru oehtoh enepotohme oya?

Oorypyry tõ rumekary se mexino morohne poko pyra ropa oehtohme?

33 Ritonõpo nyriry se pyra awahtao, oty katohme ise oehtoh eraximãko mah inyriryme?

Omoro rokẽ ezuhnõko mase, ywy kara.

Kaxiko seromaroro, õsenetupuhtoh tonõ ekaroko yna a.

34 “Tuaro exiketõ atae mã toto emero,

zuaro se exiketõ roropa jomiry etaryke eya xine ynara ãko mã toto:

35 ‘Jo zuaro pyra exikety sã oturũko mana;

sekere ãko rokẽ mana.

36 Aomiry etaryhtao kyya xine enetupuhnõko sytatose:

ajoajohpe exikety sã rokẽ ezuhnõko mana.

37 Jo tyyrypyhpyke mana, tyyrypyry rumekary se pyra roropa mana.

Kynetarykõme Ritonõpo kerekeremãko mana.

Sekere kakehpyra mana Ritonõpo hxiroryme, zae pyra Ritonõpo ekaroryme.’ ”