42
Ritonõpo ezuhtopõpyry Jo a
(42.1-6)
1 Morarame Ritonõpo tozuhse Jo a. Ynara tykase ynororo:
2 “Enetupuhnõko ase, Ritonõpo, jamihmehxo mase.
Tyriry se oehtoh emero tyrĩko mase.
Oetypohkaposaromepyra imehnõ mana.
3 Mekaropono ya:
‘Onoky mose ro, aotururu enetupuhpõko nae tuaro hkopyra jekarõko nae?’
Ywy tuaro pyra exiketyme rokẽ ase.
Sekere ãko exiase tuaro pyra jehtoh poko, josenuruhkatoh tonõ poko roropa, morohne onenetupuhsaromepyra jahtao.
4 Õmiry etatohme tyripose ywy oya, oezuhtohme ya.
5 Apitoryme awaro exiase imehnõ omiry etaryke rokẽ ya,
yrome seromaroro oenẽko ase jenuru ke nymyry.
6 Morara exiryke ehxirõko ase joturutopõpyry poko emero.
Yyrypyry tõ ekarõko ase oya, taro typorohse jahtao nono pona, oruno htao.”
Jo ehtopõpyry etyhpyryme
42.7-16
Jo epe tõ oseruao
7 Mame tõturukehse Ritonõpo ahtao Jo maro tõturuse ynororo Eripaze maro, Temã pono. Ynara tykase eya:
— Tohne ase opoko oepe tõ asakoro natokõ maro, zae pyra tõturuse oexirykõke ypoko, ypoetory Jo sã pyra. 8 Seromaroro 7me pui orutua kõ apoitoko, 7me kaneru tõ maro ekarotohme Jo a. Mame onekarorykõme etapako toto jahkatohme opynanohtohkõme. Ypoetory Jo oturũko mana ya opoko xine. Aomiry etãko ase. Awãnohpyra xine exĩko ase oorypyrykõ emetakame, zae pyra õturutopõpyry ke ypoko, Jo nekarohpyry sã pyra.
9 Naeroro Eripaze, Temã pono te, Piutate, Sua pono te, Zopaa, Naama pono maro toytose toto tyritohme emero Ritonõpo nyripohpyry ae rokene. Mame Jo otururu totase Ritonõpo a.
Jo pyty toemũkuase ropa Jo poenõme
10 Moromeĩpo tõturuse Jo ahtao tope tõ oseruaõkõ poko, kure rokẽ Jo tyrise ropa Ritonõpo a, imõkomory itamurumehxo tokarose roropa Ritonõpo a. 11 Jo akorõ tõ maro, aoryxiry tõ maro, epe tõ roropa tooehse toh nexiase Jo tapyĩ taka, oseahmatoh taka, otuhtoh konõto pona. Tõturuse roropa toto tãkye pyra toexirykõ poko kure pyra Jo ehtopõpyry poko, enara. Mame Jo tomuhkehkase eya xine emero popyra ehtoh poko, Ritonõpo nenehpohpyry poko eya. Mame tineru tokarose eya xine Jo a omahtao roropa uuru risemy tynekaroryme eya.
12 Mame kure rokẽ Jo tyrise ropa Ritonõpo a apitoryme kure aehtopõpyry motye. Eky tõ tomãkase: kaneru tõ 14 miume toehse, kameru tõ 6 miume toehse, pui tõ asakoro miume, jumẽta tõ miume. 13 Toemũkuase roropa 10me ipoenomo, 7me orutua komo, oseruao ẽxiry tomo. 14 Osemazupu esety Jemima nexiase, zakorony Kaxia, imepỹ roropa Kerẽ-Hapuke. 15 Emero nono põkõ motye oryximehxo Jo ẽxiry tõ nexiase. Mame toto tyrise eya mõkomo esãme Ipirykõ maro.
16 Moromeĩpo Jo isene ro nexiase 140me jeimamyry typakomotyã enetohme, typakomotyã poenõ enetohme roropa eya. 17 Mame toorihse ynororo tamuhpõme toehse ahtao rahkene.