SAUMU
Izyraeu tõ Eremiatopõpyry
Salmos
Ekarotopo
Saumu pehme mana eremiatoh ke, oturutoh ke roropa Ritonõpo a. Saumu tõ tymerose imeronanomo a 700me jeimamyry ae (miume jeimamyry ehtoh poe 333me jeimamyry ehtoh pona oehpyra ro Jezu Kyrixtu ahtao). Senohne Saumu tõ tysekeremase juteu tomo a tõximõse toto ahtao Ritonõpo eahmatohme.
Nae Saumu tomo osehta: eremiatoh tonomo, Ritonõpo eahmatoh tonõ, oturutoh tonõ Ritonõpo a akorehmapotohme, osewomapotohme, ipynanohtohme; iirypyry korokapotohme te, “Kure mase,” katohme Ritonõpo a inyrihpyry pokoino; kure tuisa ripotohme Ritonõpo a; ahno amorepatohme zae ehtoh poko; epetõkara wãnohpotohme; oturutohme Ritonõpo a typoko te, oturutohme roropa Ritonõpo poetory tõ poko porehme.
Sero pape ao
Saumu tomo atapiakãko 5me imerohpyry tõme:
Saumu 1—41
Saumu 42—72
Saumu 73—89
Saumu 90—106
Saumu 107—150
1
Tãkye ehtoh poko
1 Tãkye exĩko matose popynõ omihpyry
omipona pyra awahtao xine,
iirypyrymãkõ onypoenohpyra roropa awahtao xine,
Ritonõpo kerekeremananõ maro oximõpyra
roropa awahtao xine.
2 Yrome Ritonõpo nymeropohpyry omipona
oexirykõ poko atãkyemãko matose,
inymeropohpyry poko osenetupuhnõko matose
saereme, koko, enara.
3 Moro sã awahtao xine wewe tõ sã exĩko
matose tarykase ahtao tuna ehpio;
ahtãko mana, eperytãko roropa
toperytatoh po toehse ahtao,
zary mã aremãpyra roropa mana.
Moro sã orẽpyra exĩko matose,
onyrirykõ kure exĩko roropa mana emero.
4 Yrome Ritonõpo omipona pyra exiketõ
moro sã pyra mana;
otupĩko mã toto, tyryrykane a arexi pihpyry
arory sã exĩko mã toto.
5 Naeroro tõmipona pyra exiketõ
apiakãko Ritonõpo mana,
ameke exĩko mã toto
Ritonõpo omipona exiketõ winoino.
6 Ynara exiryke, tõmipona exiketõ
pynanohnõko Ritonõpo mana,
yrome popyra exiketõ wãnohnõko mana.