JONA
Jonas
Ekarotopo
Sero Jona, ekarõko Ritonõpo omipona pyra urutõ ehtopõpyry poko. Pata imehxo Niniwe kynexine, axirio tõ tuisary esaryme. Izyraeu epetõkara roropa mokaro kynexine. Mame Niniwe põkomo a Jona tonyohse Ritonõpo a tõmiry kurã ekarose inetarykõme repe. Yrome toytory se pyra Jona nexiase. Otarame toto pyno Ritonõpo exiry tonetupuhse eya, toto onenahkara ekurehnõko. Mame Ritonõpo omipona pyra toehse ynororo, yrome Jona tuãnohse Ritonõpo a. Moromeĩpo aomipona toehse.
Ritonõpo omiry tokarose ahtao eya Niniwe põkomo a toeramase toto tyyrypyrykõ winoino. Mame onenahkapopyra Ritonõpo toehse. Sero ekarõko kapu Esẽme Ritonõpo ehtoh poko, tuna konõto te, nono te, onokyro tomo te, ahno roropa. Ekarõko roropa sero nono põkõ pyno Ritonõpo ehtoh poko. Kypynanopyrykõ se mana. Eraximãko mana ahno rypyry korokatohme, juteu tõ pynanohtohme, juteutõkara roropa.
Sero pape ao
Jona epary Ritonõpo poe 1.1-17
Jona oturutopõpyry Ritonõpo a 2.1-10
Jona otururu Niniwe põkõ netaryme 3.1-10
Niniwe pyno Ritonõpo ehtopõpyry 4.1-11
1
Jona epatopõpyry Ritonõpo winoino
1 Morarame ynara tykase Ritonõpo Amitai mũkuru, Jona a:
2 — Aimo, atakimako oytotohme pata konõto Niniwe pona moro põkõ zurutohme. Mokaro wãnohnõko ase popyra toto ehtoh waro toehse jexiryke, tykase Ritonõpo.
3 Mame Jona tãtakimase repe, yrome toepase ynororo Ritonõpo winoino. Ytopyra ynororo toehse pata Niniwe pona. Toytose ynororo Jope pona, tuna konõto ehpikoxi. Moroto wapu tonese eya Expania pona ytokety, ytosasaka nexiase. Toytotoh topehmase eya, tõtyrise wapu aka ynororo toytotohme wapu aõkõ maro Expania pona myahxo Ritonõpo winoino repe. “Otarame jenepyra Ritonõpo mana wapu ao jahtao xinukutume exiryke moro ao,” tykase Jona otarame. 4 Toytopitose toh repe, yrome okynã pyra tyryrykane konõto tonehpose Ritonõpo a. Pohkane konõto roropa toehse tuna konõto po. Orẽpyra pohkane exiryke wapu toehkotyry se toehse. 5 Tonaroxitapãse wapu aõkomo. Kui tykase toto: “Yna akorehmako!” tykase toto, kohtãko tyneponãmarykomo a repe. Mame mõkomo typahpitose eya xine, zohzohmehxo wapu ehtohme. Jona rokẽ nyhnõko nexiase tuenikaroro wapu ao. Tuaro pyra nexiase.
6 Mame tyhtose wapu tuisary ahtao Jona tonese eya, ynara tykase:
— Oty katoh nyhnõko rokẽ mah? Owõko ty! Oturuko oneponãmary a, kypynanohtohkõme eya. Otarame kypyno xine ynororo ahtao kuorihmapopyra xine mana, tykase ynororo Jona a.
7 Mame ynara tykase wapu poko erohketõ oseya rokene:
— Imenekatoh sematone zae pyra exikety menekatohme, zuaro kuehtohkõme, onoky zae pyra ehtoh pokoino serara tyryrykane konõto kypona xine noehno.
Morara tyrise eya xine, mame Jona tymenekase. 8 Naeroro tõturupose toto eya, ynara tykase toto:
— Kaxiko yna a: onoky rypyry pokoino serara tyryrykane konõto noehno? Oty poko mah taro? Ozeino moehno? Otoko ononory nae? Onokãkõ oekyry tõ nae? tykase toto.
9 — Ywy ase epereume, tykase Jona. — Ritonõpo eahmaneme ase. Emero Rihpõme ynororo: kapu te, tuna konõto te, nono, enara.
10 Mame tõsekarose Jona toepary poko Ritonõpo, Tosẽ winoino. Morara kary etaryke tyya xine tõserehse toto wapu aõkomo itamurumehxo. Ynara tykase toto:
— To! Zae pyra mexiase ipunaka! tykase.
11 Orẽpyrahxo tyryrykane konõto exĩko nexiase popyrahxo pohkane roropa exĩko nexiase. Naeroro tõturupose wapu poko erohketõ Jona a:
— Otara orĩko ynanae tuna konõto mynyhpãtohme ropa? tykase toto Jona a.
12 Ynara tykase Jona:
— Kuematoko zue aka. Tomase jahtao nakuaka mynyhpãnõko tyryrykane mana, pohkane tõ roropa. Zuaro ase. Yyrypyry pokoino serara tyryrykane konõto noehno opona xine.
13 Aomipona toexirykõ se pyra wapu poko erohketomo. Koeh koeh tykapitose toto orẽpyra repe, wapu arory se toh nexiase tuna konõto ehpikoxi. Yrome tokurehse toto jamihmehxo tyryrykane toehse exiryke. 14 Naeroro tykohtase toto Ritonõpo a opore, ynara tykase toto:
— Ritonõpo yna anaorihmapopyra exiko mose tomase yna a ahtao. Omoro mase Ritonõpo, onyrihpyryme sero tyryrykane konõto. Mose emãko ynanase zue aka aomi poe ro sero tyryrykane mynyhpãtohme.
15 Moromeĩpo Jona tapoise wapu poko erohketomo a. Nakuaka tomase ynororo eya xine. Mame axĩ pohkane tymynyhpãse, tyryrykane roropa. 16 Moro eneryke tyya xine Ritonõpo zuno toehse toto. Okyno totapase eya xine tynekarorykõme Ritonõpo a, tõmirykõ totapose roropa eya xine Ritonõpo netaryme, aomipona toehtohkõme.
17 Mame kanaimo konõto tonyohse Ritonõpo a Jona enahtohme. Mokyro ao oseruao tõmehse ynororo kanaimo wakuru ao.