RAMẼTASÃO
Ihnamotopõpyry
Lamentações
Ekarotopo
Ramẽtasão mã 5me emynyhmatoh tonõ nae, pata Jerusarẽ enahkatopõpyry poko jeimamyry 586mã po oehpyra ro Jezu Kyrixtu ahtao. Izyraeu nonory tonahkase te, moro põkõ tarose imehnõ namotome. Sero ekarõko juteu tõ emynyhmatopõpyry poko, ekarõko roropa Ritonõpo enetuputyry ropa poko eya xine, kure ehtoh eraximary poko roropa. Ekarõko juteu tõ otuhpyra ehtoh poko tõturutohkõme Ritonõpo a, wenikehpyra ehtohme jeimamyry ae pata Jerusarẽ enahkatopõpyry poko.
Sero pape ao
Jerusarẽ põkõ emynyhmary 1.1-22
Jerusarẽ põkõ wãnopyry 2.1-22
Zuãnohtoh te, kurã eraximary 3.1-66
Pata Jerusarẽ tonahkase 4.1-22
Ritonõpo a ipynanohpotohme 5.1-22
1
Ihnamotopõpyry Jerusarẽ poko
Myhene! Myhene! Jerusarẽ turumekase mana.
Apitoryme tẽme nexiase ahno ke!
Pata kure potu nexiase.
Enese tooehse mã toto moino, nono etyhpyry poe,
yrome seromaroro pytỹpome sã toehse mana.
Tuisa ẽxiryme sã nexiase pata tõ rãnao,
yrome imehnõ namotome sã toehse mana.
 
Tyxitary poko ẽmehnõko Juta tõ mana;
ixity sukururu ãko mana ẽmyty poro.
Epe tõ, pakatokõ tonahse, oxinomopyra mã toto ipunaka emuhkehkatohme.
Towokase Juta tõ mana epẽpyry tomo a.
Epeme pyra toehse mã toto seromaroro.
 
Juta tõ imehnõ namotome toehse mã toto,
tytapyĩ tae tarose toh nexiase.
Imeimehnõ nonory po tooehse mã toto,
tosake nymyry pyra toh mana.
Tapuruse mã toto epetõkara a,
epasaromepyra mã toto.
 
Seromaroro oehpyra ahno Ritonõpo Tapyĩ taka, eahmatohme Otuhtoh konõto po.
Osema tõ Xião pona mynyhme rokẽ mã toto, omõtoh tonõ tytaõke pyra roropa.
Nohpo tõ eremiaketõ Ritonõpo Tapyĩ tao xitãko,
oturuketõ pusuh ãko.
Pata põkõ etuarimãko mã toehse oximõpyra mã toto osema tao ahno pyra exiryke.
 
Epetõkara mokyro tuisaryme toehse,
orẽpyrahxo exĩko mã toto.
Jerusarẽ põkõ rohmanohpõko Ritonõpo mana iirypyryme itamurume toehse toto exiryke.
Imũkuru tõ tapoise epetõkara a, toto arotohme mya esarykõ poe.
 
Pata Jerusarẽ enekure ehtopõpyry pake tonahse.
Ituisary tõ kapau sã mã toto tomitapãse exiketomo,
epãko mã toto urakanaketõ zuno toexirykõke,
yrome tapotũkehse mã toto.
 
Seromaroro tãkye pyra oseanahtõko, Jerusarẽ põkõ mana, etuarimãko.
Wenikehpyra mã toto tymõkomohpyrykõ kurã poko pake ahtao.
Tapoise ahtao epetõkara a takorehmaneke pyra nexiase,
tounohse rokẽ ynororo epetõkara a.
 
Jerusarẽ tyyrypyhpyke toehse yronymyryme,
nuriame toehse.
Ise aehtyã ise pyra toehse mã toto,
tonese ynororo eya xine tupoke pyra.
Pusuh kakehpyra mana.
Tõmyty apurũko mana toehxirose toexiryke.
 
Mokyro nuriame ehtoh osenẽko mana, zupõ xikurome exiryke.
Yrome oty kara nexiase, torẽtyke pyra imeĩpo toexiry poko.
Mokyro poremãkatopõpyry popyra nexiase ipunaka,
emuhkehkananõ pyra nexiase.
“Ritonõpo, kueneko ajohpame samo,
etuarimãko ase jepetõkara orẽpyra toehse exiryke.”
 
10 Ikyryry tõ kurã emero tarose epetõkara a;
aomomyrykõ tonese eya Ritonõpo Tapyĩ kurã taka,
moro taka juteutõkara onẽmapopyra Ritonõpo nexiase.
 
11 Jerusarẽ põkõ pusuh ãko mã toto, tonahsẽ zupĩko.
Tymõkomory kurã ke tonahsẽ epehmãko mã toto isene ro toto ehtohme.
“Kueneko, Ritonõpo, jetuarimary eneko!” ãko mã toto.
Mokaro etuarimary
12 Ikuroko ytoketomo a Jerusarẽ põkõ ynara ãko:
“Kuenetoko ke!
Imehnõ etuarimapitopyra nexiase jetuarimary saaro.
Zehno toehse toehtoh po tuãnohse ywy Ritonõpo a sero samo.
 
13 “Apoto tonehpose eya ypona yzahkatohme ukurohtao.
Ahno apoitoh tyrise eya japoitohme,
tomase ywy eya nono pona.
Imeĩpo jurumekase jetuarimatoh tao jũme samo.
 
14 “Yyrypyry tõ emero oximõme tyripose eya tymyhse sã toto ehtohme, ypymyry pokona, omoxinety samo.
Tapotũkehse ywy.
Tokarose ywy eya jepetõkara a,
toto onyporemãkasaromepyra exiase.
 
15 “Ypoetory tõ jamihmehxo exiketõ typoihtose Ritonõpo a.
Imehnõ soutatu tõ tonehpose eya ypoetory tõ nuasemãkõ enahkapose.
Ahno kurã tutũmase eya uwa epery akurihmory samo, eukuru riryhtao.
 
16 “Morara exiryke xitãko ase,
jenuru tõ pehme nase yxity ke.
Jemuhkehkapone pyra mana,
jãkyemasaromepyra mã toto ipunaka.
Jepetõkara a typoremãkase ywy,
ypoetory tõ patãpo po toehse mã toto.
 
17 “Jemary tõ anỹnõko ase jakorehmapotohme repe.
Yrome jakorehmary se pyra imehnõ mana.
Emero rokẽ poe jepetõkara tonehpose Ritonõpo a jyyryhmatohme.
Nuriame exiketyme jekarõko mã toto.
 
18 “Yrome Ritonõpo zae mana,
tuãnohse ywy eya, aomiry omipona pyra toehse jexiryke.
Imeimehnõ nonory põkõ, etatoko ke!
Sam katoh ya enetoko!
Jẽxiry tomo, umũkuru tõ maro tarose mã toto mya imehnõ namotome.
 
19 “Jepe tõ tykohmase ya,
yrome towokase exiase eya xine.
Ritonõpo maro oturuketõ toorihse osema tõ ae, kowenu maro erohketõ maro,
tonahsẽ zupiryhtao eya xine isene ro toto ehtohme.
 
20 “Eneko ke, Ritonõpo, sam katoh ya,
emynyhmãko ase yronymyryme!
Xitãko ase ukurohtao yyrypyry poko, õmiry omipona pyra toehse jexiryke.
Imehnõ etapãko mã toto jarao, osema tõ ao.
Tapyi tao roropa orihnõko mã toto.
 
21 “Ritonõpo, pusuhkatoh ya etako.
Jemuhkehkananõ pyra nase.
Jepetõkara atãkyemãko mã toto juãnohtopõpyry oya eneryke tyya xine.
Moro ẽmepyry enehpoko, õmihpyry ae ro,
jepetõkara sam kamexipoko ya sam katoh samo.
 
22 “Mokaro epehmako popyra toto ehtopõpyry emetakame.
Zuãnohko toto juãnohtopõpyry sã oya yyrypyry emetakame.
Pusuh kakehpyra ase, kure pyra roropa ase ukurohtao.”