1 Zehno toehse Ritonõpo ahtao, pata Jerusarẽ tyõtose eya akurũ xinukutumã ke.

Pata Jerusarẽ tyripose eya ypyme typahsẽme rokene.

Apitoryme pata kurãme nexiase, kapu ao aexihpyry samo,

toepyrypase Izyraeu tomo typatarykõ poko.

Yrome typenekehse Ritonõpo ahtao moro turumekase eya.

Tytapyĩ kurã roropa turumekase eya.

2 Juta pyno pyra toehse Ritonõpo, ipatary tõ

tonahkapose eya tapyi jamihmãkõ maro.

Zehno toexiryke tomase toto eya nono pona.

Toehxirose Juta tõ tuisary tõ nexiase, kowenume erohketõ maro.

3 Zehno toehse Ritonõpo exiryke Izyraeu tõ jamitunuru tonahkapose eya.

Yna epetõkara tooehse ahtao yna akorehmary se pyra nexiase.

Yna takorekehkase eya apoto samo, tomye exiketõ zahkary samo emero.

4 Yna epekara sã typyre potyry tyrise eya yna winakoxi.

Tyjamitunuru ke ahno taorihmapose eya yna ekyry tomo, emero porehme isehxo exiketomo yna a.

Taro Jerusarẽ po kuãnopyrykõ jetuhxo nexiase yna a apoto samo kyzehno xine toehse ynororo exiryke.

5 Epekara samo Ritonõpo a Izyraeu tõ tonahkase.

Itapyĩ tõ jamihmãkõ tomapose eya, tuisa tapyĩ konõto maro.

Ihnamotoh tonehse eya, tãkye pyra ehtoh maro, ixitatopo enahpỹme samo Juta tomo a.

6 Tytapyĩ kurã tomase Ritonõpo a,

tomase nono pona tupito samo.

Toahmatoh esary tonahkase eya.

Otuhtoh konõto tomo ẽmepyry kurã po te,

oserematoh po roropa tuenikehkapose eya Xião po.

Tuisa tomo oturuketõ roropa jetũ toehse toh nexiase zehno aexiryke.

7 Tykyryry apoto apõ poko typenekehse Ritonõpo nexiase,

Tytapyĩ kurã turumekase eya.

Ineneryme moro apuru tõ tahkananõme toh nexiase.

Moroto tykohtase toh nexiase orẽpyra toehtohkõ poko, Ritonõpo eahmatopõpyry yna a esahpokoxi.

8 Jerusarẽ apuru tõ emary se toehse Ritonõpo nexiase.

Toto enahkapory poko tõsenetupuhse ynororo.

Oseremara mana toto enahkary pona.

Apuru tõ maro kaetokohxo exiketõ typahse mã kehko nono pona.

9 Omõtoh apuru tõ tonẽse mã kehko typahsẽ ao,

ikyryry tõ tytahkase mana.

Tuisa tarose tamuximãkõ maro imepỹ nono pona.

Ritonõpo omiry poko anamorepara toehse,

urutõ komo a enepotoh onekaropyra toehse Ritonõpo mana.

10 Jerusarẽ põkõ tamuhpõmehxo exiketõ nono po typorohse mã toto, mynyhme.

Tupuhpyrykõ pona nono tyrise eya xine toemynyhmarykõme,

kamisa topuxiximã risẽ upo ke tõtupohtose mã toto.

Nohpo tõ poetome exiketõ, tosekumurukõ po typorohse mã toto zupuhpyrykõ nono pona.

11 Jenuru tõ osenuhmara nase kehko yxity ke;

ukurohtao torẽtyke ase.

Jemynyhmaryke tapotũkehse ywy wekyry tõ tonahkase exiryke.

Poetohti tõ pisarara enẽko ase

orihnõko omise konõto toexirykõke pata esemary tõ ae.

12 Mokaro poetohti tõ ynara ãko:

“Aja, omisehxo hano!

Aja, tuna sehxo puh ano!” ãko mã toto.

Mame epukãko mã toto osema tõ tao tapurose exiketõ samo.

Mame okynã pyra orihnõko mã toto tysekõ enao.

13 Pata Jerusarẽ põkomo, nupunato aexihpyry, otara ãko ha ãkorehmatohme?

Otãto oemuhkehkapõko hano, Xião põkomo?

Imehnõ etuarimapitopyra nexiase asamo.

Oporemãkatopõpyry itamurume mana tuna konõto zumohxo ehtoh samo.

Opynanohsaromepyra imehnõ mana.

14 Urutõ kõ a ajohpe rokẽ enepotoh tokarose oya xine oenekunohtohkõme.

Jarao oorypyrykõ tonepose ahtao eya xine ohxirotohkõme,

tyoro sã oehtohkõ exiry seromaroro,

kurehxo exiry oya xine.

Mokaro urutõ komo a tonekunohse mexiatose,

ajohpe toto omiry ke.

15 Ytoytoketõ pata kuroko oeunohnõko mã toto.

“To!” ãko mã toto opoihtotorỹko roropa mã toto, Jerusarẽ põkomo.

“Ajohpe pyra, sero pata tosehtose:

‘Pata Kurãme, Enekure Potu?’ nary.”

“Sero pata kure ehtoh poko epyrypãko toh nexiase, imehnõ nonory po porehme?”

16 Emero oepetõkara ohxirõko mana,

oeunohnõko mã toto.

Ozehno toexirykõke ynara ãko mã toto:

“Jerusarẽ tonahkase yna a!

Sero ẽmepyry eraximãko sexiatose!

Morohne ynanenease porehme,” ãko mã toto!

17 Tyriry se Ritonõpo ehtopõpyry tyrise eya,

kuenaroximatopõpyrykõ eya moino ro, tyrise eya.

Izyraeu tõ tonahkapose eya, onypynanohpyra.

Kuepekõkara tonehpose eya kyporemãkatohkõme,

atãkyematohme roropa kyporemãkatopõpyrykõ poko.

18 Pata Jerusarẽ, ah ãpuru tõ nykohtã toto Ritonõpo a akorehmapotohme!

Xitakehpyra exiko saereme, koko, iporiry sã oxity tõ ehtohme.

Oseremara exiko. Onyhnamokehpyra exiko!

19 Koko owõko ikohmatohme Ritonõpo a ãkorehmapotohme.

Yronymyryme ekaropoko eya, õtururukõme eya opoenõ pynanohtohme eya.

Orihnõko mã toto osema tõ ao omise konõto toexirykõke.

20 Eneko ke Ritonõpo, yna Esemy!

Oty katohme yna wãnohnõko mah sero samo?

Nohpo tõ typoenõ õnõko mã toto, toto pyno toto ahtao ro.

Urutõ kõ, oturuketõ roropa totapasẽme exĩko mã toto Atapyĩ kurã tao!

21 Nuasemãkõ ekepyry tynomose osema tõ ao, tamuhpomãkõ ekepyry roropa.

Ypoenõ totapase epetõkara a, oryximãkomo, nuasemãkõ roropa.

Moro ẽmepyry toehse ahtao, zehno toehse awahtao, omoro Ritonõpo mokaro metapase.

Onypynanohpyra mexiase ipunaka.

22 Emero rokẽ poe jepetõkara menehpoase,

popyra exiketomo, oximõme tooehse toh nexiase otuhtoh konõto poko oeahmatohme samo.

Moro ẽmepyry ae zehno toehse oexiryke epasaromepyra toh nexiase

tonahkase toto emero porehme.

Epetõkara a ypoenõ tonahkase toh nexiase,

ipyno xine jehtoh ke tuãtanohse toto ya.