NAUM
Naum
Ekarotopo
Naum urutõme kynexine isene ro Apakuke ahtao Sowonia roropa. Sero ao Naum ekarõko pata Niniwe poremãkatoh poko. Pata imehxo Niniwe kynexine, Axiria nonory esẽ esaryme. 150me jeimamyry ae imeimehnõ nonory põkõ esẽme Axiria kynexine. Mame 612mã po oehpyra ro Jezu Kyrixtu ahtao, Niniwe typoremãkase papironio tomo a. Moro poko, axirio tõ wãnohtopõpyry Ritonõpo a, tonetupuhse Naum a, Izyraeu tõ tyyryhmase eya xine exiryke pitiko rokẽ pyra. Orẽpyra sã Naum tõturuse Niniwe poremãkatoh poko.
Sero pape ao
Niniwe põkõ apiakary poko 1.1-15
Pata Niniwe poremãkatopo 2.1—3.19
1
Naum nymerohpyry Niniwe tõ poko
1 Sero mã Ritonõpo omihpyry Niniwe tõ poko, enepotoh tokarose ahtao Naum a, pata Euko pono a.
Tohne Ritonõpo ehtoh Niniwe põkõ poko
2 Ritonõpo Kuesẽkõ toiro mana,
imehnõ ritõ panõ se pyra mana ipunaka.
Topetõkara wãnohnõko mana, toto zehno toexiryke.
Topetõkara epehmãko Ritonõpo mana,
tohne tahtao toto wãnohnõko mana.
3 Inehmỹke pyra Ritonõpo mana,
axĩ pyra tohne exĩko,
yrome jamihme mana,
popyra exiketõ enẽko mana,
toto wãnopyry eya ekurehpyra mana.
Tyryrykane konõto maro ytoytõko mana,
tyryrykane jamihmãkomo;
akurũ putoh kane sã mana tanỹse ipupuru a.
4 Tuna konõto mynyhpãkapõko Ritonõpo mana, anorỹko mana.
Tuna tõ apaikapõko Ritonõpo mana.
Onahpoty ona Pasã po te, ypy Karameru po roropa orihnõko mana,
ekuru tõ ypy Ripano po aremãnõko kehko.
5 Ritonõpo ẽpataka, ypy tõ tykytyky ãko mana,
somohmã tõ atakuhmõko mã kehko.
Oseneporyhtao nono tykytyky ãko,
ipõkõ emero nono pona epukãko mana.
6 Zehno Ritonõpo ahtao xikihme ẽpataka
ehsaromepyra mã toto, isene ro ehsaromepyra sytatose emero.
Zehno aexiry kuãnõko mana iporiry sã apotoimo, ẽpataka topu tõ ehmõko rokene.
7 Kure Ritonõpo Kuesẽkõ mana.
Popyra ehtoh toehse ahtao,
typoetory tõ pynanohnõko mana.
Mokaro pyno exĩko mana tupise ahtao eya xine osewomapotohme.
8 Tuna zueme ehtoh samo topetõkara enahkãko mana.
Tyzehno exiketõ enyohnõko mana aorihtyã esaka.
Ritonõpo toto zehno ehtopo
9 Oty poko osenetupuhnõko matou
tyritohme Ritonõpo a, iporemãkatohme?
Morohne enahkapõko mana porehme.
Ritonõpo epetõkara owõpyra ropa mã toto!
10 Omoxino tõ emuhxihmase sã kaetoko,
onahpoty sã toorihse ahtao,
amarokõ porehme tonahkasẽme exĩko matose!
11 Pata Niniwe poe orutua tooehse popyra ehtoh riry se exikety, etonatoh se mokyro mana Ritonõpo poremãkary poko. 12 Yrome ynara ãko Ritonõpo mana typoetory, Izyraeu tomo a:
“Axirio tõ tonahkasẽme exĩko mã toto,
jamihme toto ahtao ro, tuhke roropa,
osenepyra exĩko mã toto.
Amarokõ tynomose ya etuarimatohme repe,
yrome moro onyripyra ropa ase.
13 Seromaroro opynanohtorỹko ase axirio tõ winoino,
jamihme toto ahtao ro.
Omyhpokatorỹko ase toto poetoryme pyra oehtohkõme.”
14 Axiria tuisary poko ynara tykase Ritonõpo:
“Emũkuara exĩko mana,
naeroro mokyro esety poko wenikehnõko mã toto.
Ritõ panõ enahkapõko ase,
oneponãmarykõ eahmatoh tao.
Axirio tõ ekepyry zonẽtoh ahkãko ase typahsẽme sã rokẽ toto exiryke.”
15 Enetoko ke! Ypy tõ poro omi arone oehnõko mana. Omi kurã enehnõko mana, omi kurã osepeme ehtoh poko. Juta tomo, oseahmatoh tyritoko. Onekarorykõ enehtoko onekaroryme Ritonõpo a, omihpyry ae ro. Ononorykõ pona jũme popyra exiketõ omõpyra ropa exĩko mã toto; tonahkase porehme exiryke.