2
Pata Niniwe poremãkatoh poko
1 Niniwe põkomo, oepetõkara toeporehkase,
oryhmane toehse osetapase amaro xine.
Erase tõ tyritoko tapyi kaetokohxo exiketõ taka;
osema tõ enetoko roropa!
Soutatu tõ enehpotoko typyrekõ apoitohme etonatohme.
2 Izyraeu tõ imehxo ehtoh enehpõko ropa Ritonõpo mana, Kuesẽkomo. Imehxo toehtopõpyry sã exĩko ropa mana, tymõkomory kurã emero anaropyra ro epetõkara ahtao, sero nono onynomopyra ro ahtao wewe amorihkahpyry exikety samo.
3 Osewomatoh tahpire exiketõ arõko epetõkara soutatu tõ mana,
zupõkõ kamirarame roropa mana.
Typyreke mã toto pata Niniwe põkõ maro etonatohme.
Ikyryry tõ, kahu tõ etonatoh zemime mã kehko, apoto samo,
jeky tõ kawaru tõ penekehnõko mã toto tehme toehtohkõ poko.
4 Axiny kahu tõ etonatoh kyryry ytõko mana osema tõ ae,
xiaxiake ytõko mã toto amerehmã akuohnõko.
Ezuru sã mã toto saereh ãko nenenehkane samo.
5 Tyripotoh ekarõko epetõkara tuisary typoetory tomo a,
tamuximãkomo a;
tururume ytõko mã toto pata apuru tõ pona,
ipuipurohmãko mã toto tururume toytorykõke.
Apuru tõ rĩko mã toto, tõsewomatohkõme.
6 Apurutoh tonõ tuna kuao totapuruhmakase,
tuisa tapyĩ konõto tao oserehnõko emero mã toto.
7 Tuisa neponãmary tapoise,
tarose epetõkara a;
ipoko exiketõ pusuh ãko,
xitãko utukuimo samo,
tupuropurukõ etapãko mã toto ihnamoryme.
8 Tuna tũtary samo, tuna apuru tytahkase ahtao,
moro sã tururume epãko mã toto pata Niniwe poe!
“Oetypohko! Oetypohko!” kohtãko imehnõ mã repe,
yrome eramara mã toto emero porehme.
9 Parata apoitoko! Uuru arotoko!
Pata pehme mana mõkomo kurã ke,
miu motye otytyko kurãkõ nae mana.
10 Pata Niniwe tonahkase, turumekase, patãpome toehse!
Ikurohtao xine enaromỹke,
esekumurukõ tykytyky ãko,
tyjamihkehse mã toto.
Ẽmytykõ karimutume mã toto.
11 Otara toehse moro Axiria patary nae?
Reão tõ esaryme sã nexiase.
Moro tao reão poenõ tynahpase.
Moroto reão tõ toytose tynohpory maro ipoenõkõ
towomase, imehnõ zuno pyra.
12 Okyno tosekase reão a,
ipũ tapiakase eya tynohpory zohme ipoenõ zohme roropa;
tosary pehme toehse ikarimory ke.
13 Ynara tykase Ritonõpo, Jamihmehxo Exikety Niniwe põkomo a:
— Ywy oepekõkara ase. Okyryrykõ kahu etonatoh zahkapõko ase. Osoutatu tõ orihnõko mã toto õsetaparykohtao. Omõkomohpyry emero tomatonanohse oya xine imehnõ wino, arõko ase mya. Mame jũme typoetory tõ anaropopyra ropa otuisary exĩko mana imehnõ nonory tõ pona.