3
Ihnamotoh Niniwe enatyry poko
1 Awãnohtoh oehnõko oya xine,
Niniwe põkomo, myhene!
Imehnõ ryhmahpõkõme matose,
apatarykõ ajohpe ehtoh ke pehme mana,
imeimehnõ etapananõ ke roropa,
imehnõ onyryhmakehpyra matose.
2 Etatoko ke: kawaru tõ pipohnõko mã toto axihxo toto ytotohme,
panaikato kahu tõ pupuru tomo!
Kawaru tõ tururume oehnõko,
kahu tõ maro etonatoh kyryryme oehnõko mã toto.
3 Kawaru po ytoketõ osetapapitõko mã toto,
tytapemake zemime exiketomo,
tywaratake zemime exiketõ roropa.
Aorihtyã ekepyry emero rokẽ po,
tuhke ekepyry tomo, miu motye, ikuhpỹme.
Osetapãko soutatu tomo aorihtyã ekepyry tõ pona.
4 Pata Niniwe, imeimehnõ poko exikety sã, tuãnohsẽme exĩko mana!
Enekure exiketyme, enekunohto roropa.
Pyaxime toehtoh ke tõmiry omipona
imehnõ nonory põkõ tyripose eya,
osepeme toto maro ehxĩpo,
tymyhpose toto eya.
5 Ritonõpo, Jamihmehxo Exikety ynara ãko:
“Niniwe, awãnohnõko ase.
Oupõ oũko ase, tupoke pyra oenepotohme imehnõ nonory põkomo a emero porehme,
ohxirory enetohme eya xine.
6 Popyra exiketyme sã orĩko ase,
xikurome ehtoh emãko ase opona;
oenekehpyra exĩko tuhkãkõ mana,
osenuruhkãko mã toto, enaromỹke.
7 Oeneryke epãko mã toto emero,
ynara ãko mã toto:
‘Niniwe tonahkase mana!’
Onoky ipyno exĩko nae?
Onoky mokyro emuhkehkapõko nae?”
8 Niniwe põkomo, pata Tepa motye kure osekarõko matou, Ejitu kowenu patary? Apatary sã towomase moro pata nexiase tuna ke: tuna Niro apuru sã nexiase, pata ewomãko. 9 Pata Tepa imehxo nexiase Ejitu kowenu esaryme, Etiopia esẽme roropa; imehnõ pata tõ emero motye nexiase sero nono po, Ripia põkõ roropa osepeme nexiase imaro. 10 Moro sã ahtao ro Tepa põkõ tarose imepỹ nono pona imehnõ namotome; tynonorykõ poe tarose toh nexiase; ipoenõ takurihmose osema tõ ae emero. Imenekatoh tomase epetõkara a tamuximãkõ apiakatohme typoetoryme toto ehtohme, imeĩpo tarose toto tymyhse keti ke tynamotokõme.
11 Niniwe, omoro roropa toetỹse exiketyme ytoytõko mase, oepary kuhnõko mase otonẽtohme oepetõkara winoino. 12 Osoutatu tõ tapyĩ tõ jamihmãkõ emero wikeira zoko sã mã toto, topere, pehme epery tahpirãse ahtao: zoko kywyh kywyh karyhtao ohpahnõko mana ise exikety mytaka. 13 Osoutatu tõ jamihme pyra mã toto, nohpo tõ samo, pata omõtoh tonõ totapuruhmakase mã kehko. Omõnõko oepetõkara mana, ise tahtao xine, omõtoh ikiritihmatoh tonõ tyahkase exiryke apoto ke.
14 Tuna ikurãkatoko ẽ tõ ao enahpyra ehtohme pata tapuruse ahtao epetõkara soutatu tomo a, jamihmehxo soutatu tõ tapyĩ tyritoko. Orino itũtũmatoko, apuhtoh tonõ ikurãkatoko roropa tijoro tõ ritohme. 15 Moro riryhtao ro oya xine orihnõko matose apoto ke, apoto ke pyra ahtao osetapanohtao orihnõko matose; oenahkatorỹko oepekõkara mana, tykyrysã enahkary sã taparara tomo a.
Emãtoko taparara tõ samo, emãtoko wexixi tõ samo! 16 Amaro xine mõkomo ekamonanõ tuhke toehse, ikuhpỹme xirikuato sã kapu ao. Yrome seromaroro toytose toto, taparara tõ samo: taporihke pohpoh ãko mã toto, esyryhmãko mã toto. 17 Otuisarykõ, kowenu poko erohketõ roropa taparara sã etypohnõko mã toto apuru tõ pokona kuenime toehse ahtao; yrome xixi tõnuhse ahtao taporihke ytõko mã toto aza rokẽ, zuaro pyra matose.
18 Axiria tuisary, otuisary tõ toorihse mã toto, kowenatu tõ maro, soutatu tõ tuisary tõ roropa toorihse toto. Opoetory tõ sapararahme mã toto ypy tõ po, toto pyno exikety pyra mana, toto oximõme enehpotohme ropa. 19 Opi pyra mana ãpurotopõpyry tõ epinohtohme; naeroro ekurãkasaromepyra mã toto. Oehxirotopõpyry etaryke imeimehnomo a atãkyemãko mã toto, tahtah ãko mã toto. Ynara exiryke: ahno emero sam tykamexipose oya xine, popyra oehtohkõ enahpỹme nexiase.