NEEMIA
Neemias
Ekarotopo
Sero pape Neemia atapiakãko nase oseruao: 1) Jerusarẽ apuru ritopõpyry ropa poko Neemia tomo a, tyripose exiryke Perexia esemy a kowenatume tyrise ynororo ahtao Juta tõ nonory po. 2) Ritonõpo Omiry sekerematopõpyry Extara a te, ahno imoihmãkõ osekarotopõpyry roropa iirypyryme toehtohkõ korokapotohme. 3) Neemia nyrityã tõkehko poko kowenatume ynororo ahtao. Yronymyryme Ritonõpo tonetupuhse eya Tosẽme, oturukehpyra ehse ynororo eya.
Sero pape ao
Neemia oepyry ropa 1.1—2.20
Apuru ritopõpyry ropa 3.1—7.73
Aomiry sekeremary 8.1—10.39
Neemia nyrityã tõkehko 11.1—13.31
1
Jerusarẽ poko Neemia otururu Ritonõpo a
1 Sero nase Neemia, Hakaria mũkuru ehtopõpyry poko.
Nuno kisereu po, jeimamyry 20mã po tuisame Arataxerexe ahtao, Perexia esẽme, Susã po exiase, pata tamuru po, kowenu esary po. Ywy ase Neemia. 2 Mame jakorõ Hanani toeporehkase Juta nonory poe imehnõ juteu tõ maro. Naeroro tõturupose toto ya moero ehtoh poko te, Jerusarẽ poko, morotõkõ poko roropa, Papironia poe aytotyã poko. 3 Ynara tokarose toto ya: “Juteu tõ akoĩpyry etuarimãko mã toto. Toto htomãko roropa imeimehnõ nonory poe morotona aytotyamo. Pata Jerusarẽ apuru tõ tykararahse mã kehko, omõtoh roropa onukurãkara tyahse rokẽ mã kehko apoto ke.” 4 Morara kary etaryke ya, typorohse rokẽ exiase tyxitase ywy.
Sã tyxitase, sã tyxitase ywy. Otuhpyra toehse ywy omise pyra jemynyhmaryke. Ynara tykase ywy Ritonõpo Kapu Esemy a:
5 — Ritonõpo, Kapu Esemy! Tuisa Imehxo mase. Osenuruhkãko ynanase onyrityã eneryke yna a. Õmihpyry omipona exikehpyra mase. Opoetory tõ pynanohnõko mase, opyno exiketomo, Õmihpyry omipona exiketõ roropa. 6 Kueneko, Ritonõpo, jotururu etako. Oturukehpyra ase oya saereme, koko roropa opoetory, Izyraeu tõ poko. Osekarõko ase oya. Yna, Izyraeu tõ, tyyrypyhpyke toehse oneneryme. Ytamuru tõ maro ywy iirypyryme toehse. 7 Ynanyrityã iirypyryme oya mana. Õmihpyry omipona pyra toehse yna. Onyripohpyry yna a, Moeze, opoetory nymerohpyry ae, omipona pyra toehse yna. 8 Wenikehpyra exiko õmihpyry poko eya: “Jurumekaryhtao oya xine, Izyraeu tomo, amarokõ pahnõko ase imehnõ nonory poro. 9 Yrome moromeĩpo toeramase ropa awahtao xine jomipona oehtohme ropa ynyripohpyry ritohme oya xine, oenehtorỹko ropa ase osa ynymenekahpyry pona jeahmatohme, sapararahme toehse awahtao xine ro nono etyhpyry pona,” katopõpyry oya Moeze a. Moro onymoipyra toehse yna.
10 — Ritonõpo, opoetoryme moxiã mã toto, onymenekatyamo. Typynanohse toto oya imehnõ winoino ajamitunuru ke orẽpyra oexiryke. 11 Seromaroro jotururu oya etako opoetory tõ otururu roropa emero oeahmary se exiketomo. Kuakorehmako seroae ise jehtoh apoitohme ya kure rokẽ tuisa konõto ehtohme ya.
Morara ahtao erokuase tuisa okuru poko.