2
Jerusarẽ pona Neemia ytotopõpyry
Morarame 4me nuno taropose ahtao, jeimamyry 20me tuisame Arataxerexe ahtao ynara toehse ya; Tuisa Arataxerexe otuhnõko nexiase kokonie pukuro. Uwa eukuru jehnahpyry tapoise ya ekarotohme tuisa a. Akye pyra jehtoh onenepitopyra tuisa nexiase. Naeroro tõturupose ynororo, ynara tykase ya:
— Oty katohme sekese pyra mahno? Akuruhtara mase; naeroro tãkye pyra rokẽ mase.
Mame tõserehse ywy. Ynara tykase ywy eya:
— Tuisa, jũme isene oehtoh se ase! Tãkye nymyry ehsaromepyra ase ytamuru tõ zonẽtopõpyry, pata Jerusarẽ tyhtomase ahtao, omõtoh tonõ tyahkase roropa ahtao apoto ke?
— Oty se hma? tykase tuisa ya.
Oturuase Ritonõpo Kapuaono a. Mame ynara tykase ywy tuisa a:
— Azamaro jahtao, ynekaropory oya ekarory se awahtao, kuaropoko Juta nonory pona, ytamuru tõ zonẽtopõpyry pona, tykase ywy.
Mame tuisa konõto, ipyty typorohse imaro, ỹme nexiase. Tõturupose ya ynororo: “Otãto nuno, otãto jeimamyry roropa aropory oya oehtohme ropa?”
Moro ekaroase eya. Mame ynara ekaropoase eya:
— Ajohpame sã pape ekaroko ya arotohme kowenatu tõ neneryme Eupyrati-Oeste nonory po, zurutohme kure jytotohme Juta nonory pona. Pape ekaropoase roropa Asape neneryme, itu erasemy, wewe ekaropotohme eya tapyi jamihmã omõtoh ritohme Ritonõpo Tapyĩ ewomatohme te, pata apuru ritohme roropa, ytapyĩ roropa ritohme jesaryme. Morohne emero tokarose tuisa a ya ynekaropohpyry eya, ymaro Ritonõpo exiryke.
Soutatu tõ tamuximãkõ taropose tuisa konõto a ymaro toto ytotohme te, soutatu tõ roropa kawaru po ytoketomo. Naeroro ynanytoase Eupyrati-Oeste nonory pona. Moroto pape tõ ekaroase kowenatu tõ neneryme tuisa konõto nymerohpyry. 10 Yrome Sãparate, Pete-Horõ pono te, Topia maro, Amõ nonory esẽ tohne toehse zuaro toehse ahtao ahno oepyry poko Izyraeu tõ akorehmase.
11 Toeporehkase ywy Jerusarẽ pona. Mame oseruao ẽmepyry ae 12 josenetupuhtoh onekaropyra exiase imehnomo a, Ritonõpo nyrihpyry ukurohtaka pata kurãkary ropa poko. Towõse ywy koko jytotohme onoa, imehnõ ymaro exiketõ maro. Toiro rokẽ okyno aroase, jumẽtu rokene, epo jytotohme. 13 Tutũtase ywy koko Omõtoh Jakanahmã ae xixi omõtoh wino, ytoase ikurenaka Tuna eutary Zakareimo kuroko Omõtoh Typahsẽ pona. Ytoytoryhtao pata apuru enẽko exiase tytohkase aexityã te, omõtoh tonõ roropa jahkatyã apoto ke. 14 Morotoino toeramase ywy inikahpozakoxi Omõtoh Tuna Enatyry pona te, Tuisa Tunary Pẽkamã pona roropa. Moroto jeky, jumẽtu tosemary onenepyra tokurehse typahsã rãnakuroko, 15 morara exiryke tyhtose ywy jakanahmã Keterõ pona. Moro irãnakuroko ytoase pata apuru enẽko rokẽ exiase. Mame eramase ropa jesemahpyry ae ropa. Pata pona tomõse ropa ywy Omõtoh Jakanahmã ae.
16 Pata tuisary tõ zuaro pyra toh nexiase jytotopõpyry poko te, ynyrihpyry poko, enara. Morara ahtao juteu tõ onurupyra ro exiase: oturuketomo te, tuisa tomo te, kowenu poetory tomo te, imehnõ roropa imeĩpo pata kurãkary poko akorehmary se exiketomo. 17 Yrome ynara tykase ywy eya xine:
— Enetoko ke! Etuarimãko sytatose! Kypatarykõ Jerusarẽ tytohtohkase mana. Omõtoh tonõ tyahkase kehko. Ehmaropa apuru tõ ritohme ropa ehxiropyra kuehtohkõme.
18 Mame toto zuruase kure jyritopõpyry poko Ritonõpo a te, jakorehmatopõpyry poko roropa eya. Ekaroase roropa tuisa konõto omihpyry poko ya.
— Ehmaropa erohpitose apuru tõ riry ropa poko, tykase toto.
Tãtakimase toto erohpitotohme.
19 Yrome zuaro toehse Sãparate ahtao, Topia maro, arape Jesẽ roropa yna erohtoh poko, toexianase toto. Yna tounohse roropa eya xine. Ynara tykase toto:
— Oty riry se hmatou? Tuisa konõto epetõkarame exĩko matou? tykase toto.
20 Ynara tykase ywy eya xine:
— Ritonõpo Kapuaõ yna akorehmãko mana yna erohtoh poko otyhkatohme kure. Ipoetoryme ynanase. Erohpitõko ynanase pata apuru riry poko. Yrome tosake pyra matose Jerusarẽ po, moro tao tapyi esẽme ehsaromepyra matose. Izyraeu tõ ekyryme pyra roropa matose. Ritonõpo tapyĩ poko te, okyno zahkary poko ynanekaroryme Ritonõpo eahmaryme, morohne poko ehsaromepyra matose ipunaka.