13
Nono enenanõ 12mãkomo
(Teuteronomiu 1.19-33)
1 Ritonõpo Izyraeu tõ Esẽ ynara tykase Moeze a:
2 — Orutua kõ aropoko Kanaã nonory enetohme, moro nono ekarõko ase Izyraeu tomo a. Toiro orutua imenekako tuisame exikety Jako poenomotyã punero.
3 Ona Parã poe mokaro tonyohse Moeze a nono enetohme Ritonõpo Tosẽkõ nyripohpyry ae ro. Tuisame toh nexiase Izyraeu tõ oxiekyrymãkõ tuisaryme 4-15 Ynara toh nexiase:
Rupẽ tõ tuisary Samua, Zakua mũkuru.
Ximeão tõ tuisary Sapate, Hori mũkuru.
Juta tõ tuisary Karepe, Jepone mũkuru.
Isakaa tõ tuisary Ikau, Joze mũkuru.
Eparaĩ tõ tuisary Ozeja, Num mũkuru.
Pẽjamĩ tõ tuisary Pauti, Rapu mũkuru.
Zepurõ tõ tuisary Katieu, Soti mũkuru.
Manase tõ tuisary Kati, Suxi mũkuru.
Tã tõ tuisary Amieu, Kemari mũkuru.
Asea tõ tuisary Setua, Mikaeu mũkuru.
Napatari tõ tuisary Napi, Wopixi mũkuru.
Kate tõ tuisary Keueu, Maki mũkuru.
16 Moro sã mokaro orutua kõ esety nexiase. Mokaro tonyohse Moeze a nono enetohme. Ozeja, Num mũkuru esety tymyakãmase eya Jozueme.
17 Mokaro tonyohse ahtao Moeze a nono enetohme ynara tykase eya xine:
— Ytotoko inikahpozakoxi nono ikurenae poro, onuhtohme ypy tõ poro. 18 Enetoko kure moro nono ehtoh poko. Ahno, moro nono põkõ enetoko: jamihme toh nae? jamihme pyra? tuhke nae? tuhke pyra? 19 Enetoko roropa moro nono: otyro zamaro nae? Otyro zamaro pyra nae? pata tõ enetoko: apuru tõ nae? arypyra nae? 20 Nono enetoko ropa, oty sã nae? Kure arykatohme? Popyra? Wewe tõ roropa enetoko. Orẽpyra ehtoko otyro epery enehtatoko roropa moro poe (Uwa epery tõ toehse ehtoh exipitõko nexiase).
21 Naeroro mokaro orutua kõ toytose toh nexiase nono enese ona Zim poe inikahpozakoxi Reope pona, onuhtoh Hamate pũtokoxi. 22 Toytose toto nono ikurenae poro Eperõ pona. Moroto anakĩ tõ nexiase ahno konõto pakomotyamo: Aimã te, Sesai te, Taumai, enara. (Eperõ pata tyrise kynexine osemazuhme, okomino 7me jeimamyry taropose ahtao pata Zoã tyrise Ejitu po.) 23 Moromeĩpo toeporehkase toto jakanahmã Exikou pona. Moroto uwa amoriry tysahkase eya xine uwa epery tõ maro zumo, omoxihxo, asakoro orutua kõ se nexiase ipuimatohme tyhwyme mara poko. Imehnõ epery tõ tarose roropa eya xine: romã tomo, fiku tomo, enara. 24 (Moroto tosehpase eya xine Jakanahmã Exikoume, uwa amoriry konõto tysahkase moroto exiryke eya xine.)
25 Morarame moro nono tonese ahtao eya xine 40me ẽmepyry ae, 26 toytose ropa toto. Tooehse ropa toto Kate pona, ona tonorẽ Parã pona. Moroto Moeze nexiase, Arão maro, Izyraeu tõ maro emero. Tõturuse toto imaro xine tynenehpyrykõ poko. Moro epery tõkehko tonepose eya xine, tynenepyhpyrykõ moro nono poe. 27 Ynara tykase toto Moeze a:
— Ynanytoase moro nono pona yna aropotopõpyry ae ro oya. Ajohpe pyra, otyro zamaro moro nono mana, kure kuhse mana. Seny otyro epery kehko. 28 Yrome moro põkõ jamihme mã toto, ipatarykõ zumo mana, tapuruse roropa. Moro motye roropa ahno konõto pakomotyã ynanenease moroto. 29 Amarekita tõ moroto nono ikurenae po. Heteu tõ ypy tõ po mã toto, jepuseu tõ maro te, amoreu tõ maro. Kanaã põkõ tuna konõto Metiteraneu pũto mã toto, tuna Joatão ehpiõ po roropa.
30 Mame Moeze tykerekeremase toto a yrome toto tymynyhpãkapose Karepe a ynara karyke:
— Ehmaropa etonatohme seromaroro moro nono põkõ poremãkatohme. Jamihme sytatose, orẽpyra exĩko sytatose!
31 Yrome imehnõ mokaro imaro aytotyã ynara tykase:
— Arypyra. Osetapasaromepyra sytatose mokaro maro, jamihmehxo mã toto, kymotye xine.
32 Moro ke ajohpe omi tokarose eya xine Izyraeu tomo a moro nono poko tynenehpyrykõ poko. Ynara tykase toto:
— Moro nono põkõ osenahkãko mã toto. Mosahxo roropa moro põkõ tonese yna a. 33 Moroto ahno konõto ynanenease roropa, Anake pakomotyamo. Mokaro pũto taparara sã ynanexiase yna a. Eya xine roropa taparara sã rokẽ ynanexiase.