6
Nohpo tomo
Omoro, oryximehxo exikety, imehnõ nohpo tõ motye, yna ezuhko:
aza nytono opyno exikety?
Otoko esemary nae?
Ãkorehmãko ynanase mokyro enetohme ropa oya.
Nohpo
Ypyno exikety tyhtose tutupi pona, tynarykatyã enese, otyro typoxine exikety.
Toky tõ kaneru tõ nahpãko mana tutupi po,
ekuru tõ, ririo tõ apoĩko roropa mana.
Ypyno exikety nypynume ase, jepeme roropa mã ynororo.
Toky tõ kaneru arõko mana onahpoty pona toto nahpatohme, ririo tõ rãnakuroko.
Eremiatoh omame exikety
Orutua
Kuku, opyno ase, oryxime mase,
enekure mase pata Jerusarẽ samo, kure ehtoh enetupuhpotohme mase pata Tiriza samo,
osenuruhkatohme sã roropa mase moro pata tõ asakoro ehtoh samo.
Jenepyra exiko, kuku, typoremãkase ywy oenuru tomo a.
Oũsety mirimirime potu mana, poti tõ tuhkãkõ samo, mokaro yhtoryhtao ypy Kireate poe.
Ozery karimutume mana, kaneru hpoty samo tysahkase ahtao, ikurikahpyry samo.
Moroto emero tosao mana, kure potu mana.
Oẽmyty kamirarame mana,
zemime mana kamisã notao.
Imepỹ pyra mana isã exikety sero nono po.
60me tuisa tõ pyxiã ahtao, 80me imehnõ nohpo tõ kurã maro,
oryximãkõ ikuhpỹme exiketõ maro!
Yrome toiro rokẽ pyno ase, atapuropyra exikety, utukuimo samo.
Jẽ ẽxiryme mã toirono,
nupunato jeny a mana.
Imehnõ nohpo tõ emero ynymenekahpyry eneryke tyya xine: “tãkye mana,” ekarõko mã toto.
Tuisa tõ pyxiamo, imehnõ nohpo tõ kurã roropa mokyro eahmãko mã toto. Ynara ãko:
10 “Onoky mose ro ẽmepyry ehtoh samo,
oryximehxo exikety nuno samo,
zemime exikety, xixi samo,
enekure moro asakoro zemime exiketõ samo xirikuato tõ maro kapu poko?”
 
11 Yhtoase utupi pona amẽtoeira tõ esaka,
otyro tõ enese jakanahmã po uwa zoko tõ ekutary enese roropa,
wewe tõ, romãzeira tõ ekutary enese roropa.
12 Tykytyky tykamexipose ywy oya.
Ose jexiryke rowohpe sã tyripose ywy oya, kahu arone sã etonatoh taka toytory se toehtoh samo.
Nohpo tomo
13 Osehko ropa, osehko ropa, suramita.
Osehko ropa; awary enery se ynanase.
Nohpo
Oty katoh jenery se hmatou
pytatoh watoh poko tuhkãkõ neneryme?