7
Orutua
1 Tuisa ẽxirymano! Enekure opupuru mana, asãtajã tamuruse ahtao!
Ãxiry te, awãtykyry roropa joia sã mana, aputyhpyry samo emese kure exikety a.
2 Oponuru eukuru ẽ pitiko sã mana,
moro ao eukuru enahpyra mana.
Awakuru tiriiku myhtoh sã roropa mana, tapuruse ekuru, ririo tõ ke zomye.
3 Kapau poenõ asakorõ exiketõ sã amanatyry mana, kamarame aenurutyã samo.
4 Opymyry tapyi kaetokohxo exikety sã mana, maafim risẽ samo.
Oenuru tõ tuna pẽkamã sã mã kehko pata Hexipõ po, moro pata imehxo exikety omõtoh pũto.
Oeunary nupunato mana, tapyi kaetokohxo exikety sã Ripano po.
Moro poe pata Tamaxiku osenẽko mana.
5 Oupuhpyry jũme tanỹse mana, ypy Karameru samo.
Oũsety kamisa kurã sã mana.
Moro kure ehtoh eneryke tuisa a tymyhse sã exĩko mana, anamotome samo.
6 Oryxime mase, kuku, enekure mase.
Yzamaro mase ipunaka, tãkye ase amaro jahtao!
7 Enekure mase, kuku, airiki mosa exikety samo,
amanatyry asakorõ epery tamara tõ oxikone aexityã sã mana.
8 Onuhnõko ase moro airiki pokona moro epery pohtohme.
Amanatyry uwa epery sã mana ya.
Õtary ixtaratu sã mana masã samo.
9 Opotapihpyry uwa eukuru jehnahpyry sã mana ya, anusasame potu.
Nohpo
Morara ahtao ah moro eukuru jehnahpyry ẽno ypyno exikety.
Ah moro eukuru rino tỹtaka, tyzery tõ pona roropa.
10 Ypyno exikety nymenekahpyryme ase,
yse mã ynororo.
11 Eropa, ypyno exikety, eropa tupito pona;
ẽmehnõko sytase uwa zoko tõ rãnao.
12 Owõnõko sytase pakeimo, uwa zoko tõ enese.
Otarame exipitõko mana.
Otarame ekutapitõko mana, imehnõ wewe tõ roropa.
Otarame romãzeira tõ ekutãko mana.
Moroto opyno jehtoh ekarõko ase oya.
13 Mãtarakora tõ typoxine mana.
Imepỹ epery tõ emero nae kytapyĩ omõtoh tao.
Ypyno exikety, epery tõ tukurãkase ya anapyryme, emero rokẽ epery exisenã tomo, asarahtyã roropa.