1 Ana Sulemanu u kotsoi kuma'a A̱'isa̱ a gbayin a Vuzavaguɗu koɓolo n kefeku ko mogono ali n ili i na u cikalai kuma'a dem, 2 ɗa Vuzavaguɗu u ta̱wa̱i u Sulemanu a̱ uta̱wi u ire, tsu na u sa'wai kuta̱wa̱ wa̱ ni na ɗe a Gibiyon. 3 Vuzavaguɗu u danai ni,

<<M pana ta̱ avasa n ufolu u na vi ya'in a̱ kuta̱wa̱ wa̱ va̱, me erengu ta̱ a̱'isa̱ a nampa a na vu ma'i va a̱ ubuta̱ u na a e kuneke kula ku va̱ tsugbayin ayin babu uteku. A̱shi a̱ va̱ n ka̱ɗu ka̱ va̱ o kuyongo ta̱ ɗe ayin tutu. 4 Avu tamkpamu, vu wala baci a uye u va̱ n kasingai n ka̱ɗu ka̱ nu derere tsu na eshevu Dawuda u ya'in, ɗa feu vi ya'in ili i na n danai ali n vu tonoi wila̱ koɓolo n kadanshi ka̱ va̱, 5 Gogo mi ta̱ a kuzuwa kakuba ko tsugono ka̱ nu a̱ ubuta̱ wa aza a Isaraila ali ayin babu uteku, tsu na n ya'ankai eshevu Dawuda uzuwakpani n danai, <Va kusa'wa kunamba vuza na u kuda̱sa̱ngu a kakuba ko tsugono wa aza a Isaraila ba.> 6 Ama avu ko muku n nu i zuwakai mu baci kucina̱ ɗa kpamu i kpa̱ɗa̱i kutono kadanshi ka̱ va̱ ko wila̱ u va̱ u na n zuwai, ɗa i kucukpai i bonoi i tonoi a̱ma̱li o yoku ali i cikpai le, 7 mi ta̱ a kutakpa aza a Isaraila a iɗika i na n nekei le ka̱ta̱ kpamu n iwan a̱'isa̱ a nampa a na me erengi n kula ku va̱. Aza a Isaraila i ta̱ o kubono ka̱ca̱pa̱ ka̱ta̱ kpamu o kpo ili i ma̱ka̱n a̱ ubuta̱ u uma dem. 8 Ka̱ta̱ a̱'isa̱ a nampa o bono agali, aza a na a kuwala lo dem i ta̱ a kuya'an kadanshi ke mereve koɓolo m ma̱ka̱n a kudana, <Yiɗa̱i i zuwai ɗa Vuzavaguɗu u ya'ankai iɗika ya ili i nampa koɓolo n a̱'isa̱ a?> 9 Uma i ta̱ a̱ kushuku, <Adama a na a̱ ka̱sa̱kpa̱ ta̱ Vuzavaguɗu Ka̱shile ke le a̱yi na wu uta̱ka̱i ikaya i le a Masar, ɗa o bonoi a̱ ka̱na̱i a̱ma̱li o yoku ali ɗa a cikpai a ɗa n o tonoi a ɗa. Ɗaɗa i zuwai Vuzavaguɗu u tuka̱ le ta̱ n kawuya ka nampa dem.> >>

10 Sulemanu u ya'an ta̱ a̱ya̱ kamanga a̱yi kuma'a A̱'isa̱ a gbayin koɓolo n kefeku ko tsugono. 11 Sulemanu mogono u nekei Hiram mogono ma Taya likuci kamanga i na yi a̱ uɓon u Ga̱lili, adama a na Hiram va u zamaka yi ta̱ nɗanga n sida ra̱ka̱, n ogboli, koɓolo n azanariya n a̱bunda̱i tsu na u cikalai. 12 Ama ana Hiram u ka̱sa̱kpa̱i Taya adama a na u bana we ene likuci i na Sulemanu u nekei ni, ɗa wu enei i ɗa i ya'in ba. 13 Ɗa u danai, <<Likuci i yiɗa̱i tamkpamu na i na vi nekei mu, vuza va̱?>> Ɗa u ne'i likuci ya kula iɗika i Kabulu*9:13 Kabulu N kelentsu ka aza a Yahuda ɗaɗa ili i kavama., kula ku ɗaɗa ku buwai ali a̱ kuta̱wa̱ anana. 14 Hiram u su'uki mogono n Azanariya a na a̱miki e le a yawai ngura amangatawun n kamanga (120). 15 Na ɗa ukuna wu ulinga u tsugbashi u na Sulemanu u ɗanai adama a kuma'a ka̱ a̱'isa̱ a Vuzavaguɗu, n kefeku ka̱ ni, nu nsongolimo ma akambu, m mashilya ma Urushelima n ma̱ likuci i Hazo m Magido, koɓolo n Geza. 16 Firi'auna mogono ma Masar ma lya'a ta̱ Geza n kuvon, ali ɗa u songi likuci ya n akina. Wu unai aza a Kana'ana a na i punu a̱ ida̱shi ɗa u nekei i ɗa vuka vu Sulemanu mekere ma̱ ni tsu ili i kune'e i kanna ko yolo. 17 Ɗa Sulemanu u ma'asakai Geza. U ma'i kpamu likuci i ka̱ɗa̱ki i Betu-horon, 18 m Balata, koɓolo n Tadamoru na ɗe e meremune, dem punu a iɗika i Yahuda, 19 koɓolo n likuci yi a̱ ubuta̱ u kuzuwa u ni ra̱ka̱, n likuci ye ekeke o odoku a̱ ni koɓolo n odoku a, ali n ili i na u cikalai kuma'a a Urushelima dem, a Lebano koɓolo kpamu n iɗika i na yi a̱ ubuta̱ u tsugono u ni dem.

20 Uma o yoku a buwa ta̱ punu a iɗika ya, aza a na i aza a Isaraila a ɗa ba, ele ɗa aza a Amoriya n aza a Hitiya n aza a Periziya n aza a Hiviya n aza a Jebusiya, 21 ele ɗa ntsukaya n na n buwai iɗika ya, aza a na aza a Isaraila a fuɗa unai ba, Sulemanu u zagba le ta̱ okpo agbashi a ulinga a̱ ni, ali tana anana ɗaɗa ulinga u na i a kuya'an. 22 Ama Sulemanu u bonoko vuza va aza a Isaraila kagbashi ba, ɗa kucikpa u bonokoi le osoji, n anan taji a̱ ni, n aza a̱ gba̱ra̱-gba̱ra̱ a̱ ni, n aza e kelime ko osoji, koɓolo n ovonshi a na i aza e kelime a ekeke o odoku n akumbi e le. 23 Ele ɗa kpamu aza a gbagba'in a kinda ulinga u na Sulemanu wi n u ɗa, i ta̱ ali uma amangatawantawun n amangerenkupa (550), ele na i kula̱na̱ uma a na i a kuya'an ulinga wa.

24 Sulemanu wu uta̱ka̱i vuka vi ni mekere ma Firi'auna punu a̱ likuci i Dawuda, ɗa u bonokoi ni e kefeku ka savu ka na u ma'akai ni. Ɗa kpamu u ma'i nsongolimo lo. 25 A̱ ka̱ya̱ dem kutatsu ku ɗa Sulemanu u ci ya'an alyuka e kune'e ku kusongu n alyuka e kune'e ki ida̱shi i ma̱ta̱na̱ a gaɗi vu katalikalyuka ka na u ma'akai Vuzavaguɗu. U ya'in kpamu alyuka o kusongu a ili i ma̱gula̱ni a kubana u Vuzaguɗu, nannai ɗa u kotsoi ulinga wa̱ a̱'isa̱ wa. 26 Mogono Sulemanu u ya'in kpamu antsu a Eziyon-gebe, ɗevu Ilatu a Edom a̱ ka̱kina̱ ka Mala ma Shili. 27 Ɗaɗa Hiram u suki a fuɗi a antsu a bana a ya'an ulinga ɗe koɓolo n uma a Sulemanu. 28 Ɗa antiki antsu a kubana a Ofiri, ɗa o bonokoi nu ngura ma azanariya ali amangatawa̱na̱shi n kamanga (420) ɗa e nekei Sulemanu.