1 Ana Egbere vu iɗika i Sheba u panai tsu na Sulemanu wu uta̱i kula n tsu na wi a nwalu n Vuzavaguɗu, ɗa u ta̱wa̱i kukondo yi n keci ku gbagba'in. 2 U yawai a Urushelima n ka̱bunda̱i ka uma o kutono yi n arakuma e le ucaniki n ili i wali koɓolo n azanariya n a̱bunda̱i ali n atali a singai-singai dem. Ɗa u banai u danai Sulemanu ili i na wi n i ɗa a̱ ka̱ɗu ka̱ ni ra̱ka̱. 3 Sulemanu wu ushuki keci ku vuka ka ra̱ka̱, babu ili i na i ya'in mogono atakaci a̱ kushuku punu. 4 Ana Egbere vu Sheba u panai kuyeve ku Sulemanu ra̱ka̱, kpamu wu enei kefeku ka na u ma'i, 5 n ilikulya i na a̱ tsu tuka̱ Sulemanu a kanna lakam, n tsu na nkoshi m gba̱ra̱-gba̱ra̱ ma ulinga u ni i a̱ ida̱shi, n tsu na i a kuya'anka yi ulinga, n aza a na e ci neke yi ili i kuso'o, n alyuka e kune'e ku kusongu a na Sulemanu va u ya'in a̱ a̱'isa̱ a Vuzavaguɗu, ɗa u ya'in mereve.

6 Ɗa u danai mogono ma, <<Ili i na m panai ra̱ka̱ na ɗe a̱ likuci i va̱ adama a kadanshi ka singai n kuyeve ku nu dem mayun ɗa, 7 Mi ishi mu ushuku n ili i nampa ba, sai na n ta̱wa̱i me enei n a̱shi a̱ va̱. Mayun ɗa, i na a danai mu kagimi ka'a. Kuyeve ku nu koɓolo n uciyi dem u la'a ta̱ i na m panai. 8 Inda tsu na uma a̱ nu i m ma̱za̱nga̱, n tsu na aza a ulinga a̱ nu i feu m ma̱za̱nga̱, ele na i kashani ɗevu ayin tutu a kupana kadanshi ka ukuna kuyeve ka̱ nu. 9 Una̱singai u ɗa a kubana u Vuzavaguɗu Ka̱shile ka̱ nu, a̱yi na u u panai uyo'o u nu ɗa u zuwai nu a kakuba ko tsugono ka aza a Isaraila. Ana wo okpoi Vuzavaguɗu u ciga ta̱ aza a Isaraila ali ayin babu n uteku, ɗaɗa i zuwai ɗa u zuwai nu mogono adama a na vu ya'an afada a asingai n a usuɓi kpamu.>>

10 Ɗa Egbere va u nekei mogono ngura ma azanariya ali amangatawaun n kamanga (120), koɓolo n ili i wali n a̱bunda̱i n atali a singai-singai. Babu vuza na u sa'wai kutuka̱ n ili i wali tsu na Egbere vu Sheba u tuka̱i mogono Sulemanu. 11 Antsu a Hiram a̱ ta̱wa̱i n azanariya na ɗe Ofiri, a Ofiri va a̱ tuka̱ ta̱ nu nɗanga n almugu n a̱bunda̱i koɓolo n atali a singai. 12 Ɗa mogono ma ya'in ulinga nu nɗanga n almugu, adama a na u doku katsura ka̱ a̱'isa̱ a Vuzavaguɗu a koɓolo n kefeku ko mogono ka. Ɗa kpamu u ya'ankai ulinga a̱ ubuta̱ u kuya'an umolu n ugogi adama a awashi. Babu kpamu nɗanga n almugu n na o doku a̱ tuka̱i ko e enei ali a̱ kuta̱wa̱ anana.

13 Ɗa Sulemanu mogono u nekei Egbere vu Sheba ili i na u cigai dem, babu bi'i i na u nekei ni a̱ ka̱tsuma̱ ki ili i tsugono. Ɗa u lazai u bonoi a iɗika i ni n agbashi a̱ ni.

14 A̱ ka̱ya̱ dem Sulemanu u tsu isa ta̱ azanariya a na a yawai ngura amangatawa̱nta̱li n amangatatsu n ta̱li (666), 15 babu punu bi'i utafu wa aza a tsulaga tsu gbagba'in n aza a wawa'a, koɓolo nu ngono ma aza Arabiya n anan gomuna a iɗika a.

16 Mogono Sulemanu u luwa̱i nra̱ga̱ m gbagba'in ma azanariya ali amangatawenre (200), ma̱ra̱ga̱ dem a ya'in i ta̱ n a̱miki a na a yawai shekelu amangatawa̱nta̱li (600). 17 Ɗa kpamu u ya'in nra̱ga̱ n wawa'a n na a̱ luwa̱i n azanariya ali amangatawantatsu (300), dem vi le n a̱miki a na a yawai shekelu vu na̱shi. Ɗa mogono ma zuwai le e kefeku ka na u ya'in nu nɗanga n na a kapai a̱ kutsun ku Lebano.

18 Ɗa mogono ma ya'in kakuba ko tsugono ka gbayin ɗa a kalai ka'a n anga a kagiwa ɗa u kumai anga a n azanariya. 19 Kakuba ka ki ta̱ n adasukpatsu a̱ ta̱li, ɗa ka̱ca̱pa̱ ka a ya'in ni ma̱kurugu gaɗi. A akambu e re a kakuba ka ɗa a zuwakai ka'a ubuta̱ u kukiyangu ekiye, n ululu i kawu lo kashani akambu e re dem. 20 Ululu a ikawu kupa n e re uzuwi lo a idasakpatsu i ta̱li ya, ululu ikawu akambu e re a kadasukpatsu dem. Babu ubuta̱ u na a sa'wai kuya'an kakuba ko tsugono tsu nanlo. 21 Nkoko'o n ku so'o ko mini m mogono Sulemanu ra̱ka̱ a ya'an ta̱ n ɗa n azanariya, ili yu ulinga i kefeku ka na a ya'in nu nɗanga n kutsun ku Lebano dem a ya'an ta̱ i ɗa n azanariya feu koci. Babu i na a ya'in n azurufa, adama a na e ene ta̱ azurufa i n a̱miki a ayin a Sulemanu ba. 22 Mogono ma mi ta̱ n antsu n a̱bunda̱i a tsulaga punu a mala ma koɓolo n antsu a Hiram. A̱ya̱ a tatsu dem o tsu bono ta̱ n ucanuku wa azanariya, azurufa, anga agiwa, ali nu nkalu n ajinna feu.

23 Mogono Sulemanu u la'a ta̱ ngono n na m buwai a aduniyan dem uciyi koɓolo n kuyeve. 24 Aduniyan ra̱ka̱ a tsu ciga ta̱ a̱ ta̱wa̱ kula̱na̱sa̱ odoki u Sulemanu adama a na a pana kadanshi ke kuyeve ka na Ka̱shile ke nekei ni a̱ ka̱ɗu. 25 A̱ ka̱ya̱ dem yaba dem vu na baci wi a̱ kuta̱wa̱ u tsu ta̱wa̱ n ili i kune'e ya azanariya, n ya azurufa, n akashi, n ucanuku u kuvon, n ili i wali, koɓolo n odoku, nu mkparagi feu. 26 Sulemanu u ɓolongi ekeke o odoku koɓolo n odoku a, wi ta̱ n ekeke o odoku ka̱kpa̱n ke te n amangatawa̱na̱shi (1,400), n odoku a̱kpa̱n kupa n e re (12,000). U foɓoi le a̱ likuci i na o tsu foɓo ekeke o odoku, o yoku kpamu na ɗe koɓolo n a̱yi a Urushelima. 27 Mogono mo bonokoi azurufa o okpoi ili i gbani tsa atali a Urushelima, nɗanga n sida feu u bonokoi n ɗa n a̱bunda̱i tsu nɗanga mu ma̱biri n na n tsu gbonguro a̱ ubuta̱ wa aginda a Yahuda. 28 Odoku a Sulemanu ta ɗe a̱ uta̱ka̱i aɗa a iɗika i Masar koɓolo n iɗika i Kuwe, aza a tsulaga a gbagba'in o mogono a ɗa a tsulai le a iɗika i Kuwe. 29 A tsula ta̱ ekeke odoku dem a iɗika i Masar ali Azurufa amangatawa̱nta̱li (600), a tsulai odoku feu dem amangatawun n amangerenkupa (150). Ɗa o okpoi aza a na e kudenke ngono ma aza a Hitiya koɓolo nu ngono ma aza a Siriya.