1 Ana Dawuda u da̱sa̱ngi a kpa'a ku ni, ɗa Vuzavaguɗu u nekei ni ida̱shi ma̱ta̱na̱ n irala i na yi uka̱ra̱'i n a̱yi, 2 ɗa u danai keneki Natan, <<La̱na̱, gogo na mpa ɗa na a kuvuka a kpa'a ku nɗanga n sida, ama akpati vu uzuwakpani vu Ka̱shile ɗa ɗe a̱ Ma̱va̱li.>> 3 Ɗa Natan u danai mogono, <<Ya'an ili na yi a̱ ka̱ɗu ka̱ nu, adama a na Vuzavaguɗu wi ta̱ koɓolo n avu.>>

4 Ama n kayin ka nanlo ɗa Vuzavaguɗu u ya'in kadanshi n Natan, u danai, 5 <<Bana vu dana kagbashi ka̱ va̱ Dawuda, <Ili i na Vuzavaguɗu u danai i ɗanna. Avu ɗa vuza na va kuma'aka mu kpa'a ku na n kuda̱sa̱ngu? 6 Ili i na i ɗikai a makyan ma na mu utuka̱i aza a Isaraila a iɗika i Masar, ali a̱ kuta̱wa̱ anana, n sa'wa kuda̱sa̱ngu a kpa'a ba, ama mi ta̱ a̱ kuka̱ra̱sa̱ a̱ ubuta̱ u ma̱va̱li tsu ubuta̱ wi ida̱shi u va̱. 7 A̱ ubuta̱ u na n ka̱na̱i kuka̱ra̱sa̱ n aza Isaraila ra̱ka̱, dana mu n sa'wa ta̱ kuya'an kadanshi n vuza te a̱ ka̱tsuma̱ ka aza e kelime a Isaraila vuza na n zagbai u tono n uma a̱ va̱ aza a Isaraila n danai, <<Yiɗa̱i i zuwai ɗa i kpa̱ɗa̱i kuma'aka mu kpa'a ku nɗanga n Sida?>> > >>

8 <<Dana kagbashi ka̱ va̱ Dawuda, <Ili i na Vuzavaguɗu Mala'imili ma danai i ɗanna, n ɗika wu ta̱ a̱ ubuta̱ u kaguɓa avu maku, adama a na vo okpo mogono ma uma a̱ va̱ aza a Isaraila. 9 Kpamu n yongo ta̱ koɓolo n avu a ubuta̱ u na vu banai dem, ɗa mu unai irala i nu ra̱ka̱. N zuwa wu ta̱ vu ciya̱i kula ku gbayin uteku tsu ula aza a gbagba'in a aduniyan. 10 Mi ta̱ e kuneke aza a Isaraila ubuta̱ u ka̱ci ke le, ka̱ta̱ n zuwa le ɗe a̱ ubuta̱ wa wo okpo u le. Babu vuza na u kugbandarasa le, uma a gbani-gbani o kudoku a gbandarasa le uteku tsu na a kiwanai kuya'ansaka le ba, 11 ili i na i ɗikai a makyan ma na n zagbai aza e kelime adama a na o tono n uma a̱ va̱ aza a Isaraila. Mi ta̱ e kuneke ɗa̱ ma̱ta̱na̱ e ekiye a irala i ɗa̱. Mpa Vuzavaguɗu n danai, mi ta̱ a kuzuwa kpa'a ku nu ko okpo kpa'a ku tsugono. 12 A makyan ma na baci ayin a̱ nu o kotsoi ɗa vu bankai ukpisa̱, mi ta̱ a̱ kuɗa̱ngusa̱ vuza yoku a̱ ka̱tsuma̱ ka ntsukaya n nu u lya'a tsugono a̱ una̱ u nu. Ka̱ta̱ n zuwa tsugono ci ni tsu tsurukpa. 13 A̱yi ɗa vuza na u kuma'a A̱'isa̱ a gbayin adama a kula ku va̱, ka̱ta̱ n zuwa tsugono ci ni ci lya'a kelime ali ayin babu uteku. 14 Mi ta̱ o kokpo esheku a̱ ni, ka̱ta̱ a̱yi tamkpamu wo okpo maku ma̱ va̱. U ya'an baci ili i gbani-gbani, mi ta̱ a kuzuwa uma a takacikai yi. Uma a ɗa o ko okpo mashashawun ma̱ va̱.7:14 Ishp 89:26-27; 2 Ar 6:18; A Ib 1:5 15 Mi a̱ kukpa̱ɗa̱ kuyotsongu yi ucigi u va̱ u babu kukotso ba, tsu na n ya'ankai Shawulu, vuza na n takpai adama a na m bonuko wu mogono. 16 Kpa'a ku nu koɓolo n tsugono tsu nu ci ta̱ a kulya'a kelime ali ayin babu uteku, kakuba ko tsugono tsu nu ki ta̱ o kuyongo ali ayin babu uteku.> >> 17 Ɗa Natan u tonokoi Dawuda ili ra̱ka̱ i na we enei a̱ ubuta̱ u kene ku ni.

18 Ɗa Mogono Dawuda u uwai a̱ ubuta̱ u na a zuwai akpati vu uzuwakpani vu Vuzavaguɗu va, ɗa u da̱sa̱ngi e e kelime ka Vuzavaguɗu u ya'in avasa, u danai. Yayi Mpa, Vuzavaguɗu vuzagbayin, kpamu anan yayi aza a kpa'a ku va̱, ali ɗa vu nekei mu tsugbayin tsu nampa? 19 Kpamu me ene ta̱ adanshi kanampa ka yawa ba, Vuzavaguɗu Ka̱shile, vi ya'an ta̱ kpamu kadanshi adama a kpa'a ku kagbashi ka̱ nu, vu danai kumaci ku ni ki ta̱ o kuyongo ayin n a̱bunda̱i. Ta vu ci ya'anka vuma nannai Vuzavaguɗu Ka̱shile? 20 Yiɗa̱i kpamu mpa Dawuda u kudana wu? Adama a na vu yeve mu ta̱ kagbashi ka̱ nu, Vuzavaguɗu Ka̱shile. 21 Adama a uzuwakpani u nu, koɓolo kpamu nu ucigi u ka̱ɗu ka̱ nu, ɗa vi ya'in ili i gbagbain i nampa ɗa kpamu vu ka̱sukpa̱i mu n yevei i ɗa. 22 Avu vuzagbayin ɗa vi ka̱u, Vuzavaguɗu Ka̱shile. Babu vuza na wi tsu nu, babu kpamu Ka̱shile ko yoku sai avu ende'en, uteku tsu na tsu panai n atsuvu a̱ tsu. 23 Babu uduniyan u yoku a duniya u na wi tsu uma a̱ nu aza a Isaraila. Aza a na avu Ka̱shile vu shiba̱i okpo uma a̱ nu. vu zuwai e yevei nu, vu ya'ankai uma a̱ nu ili i mereve i gbagbain, ɗa kpamu vu lokoi uduniyan u yoku kelime ka uma a̱ nu a na vu shiba̱i a iɗika i Masar. 24 Vu zagbakai ka̱ci ka̱ nu aza a Isaraila okpoi uma a̱ nu ali ayin babu uteku. Ɗa avu Vuzavaguɗu, vu okpoi Ka̱shile ke le.

25 <<Gogo na, Vuzavaguɗu Ka̱shile, shatangu uzuwakpani u nu u na vu ya'ankai kagbashi ka̱ nu m kpa'a ku ni, ka̱ta̱ kpamu vu zuwa ka'a ka shamgba ayin babu uteku, kpamu vu ya'an uteku tsu na vu dansai. 26 Ya'an e neke kula ku nu tsugbayin ayin babu uteku. Ali uma a dana, <Vuzavaguɗu Mala'imili a̱yi ɗa Ka̱shile ka aza a Isaraila.> Ka̱ta̱ kpa'a ku kagbashi ka̱ nu Dawuda kutsurukpa. 27 Vuzavaguɗu Mala'imili, Ka̱shile ka aza a Isaraila, vu ka̱sukpa̱ ta̱ kagbashi ka̱ nu ke yevei ili i nampa, vu danai, <Mi ta̱ a kuzuwa kpa'a ku nu ku lya'a kelime.> Adama a nannai ɗa kagbashi ka̱ nu ka̱ ciya̱i utsura u kuya'an avasa a nampa wa̱ nu. 28 Vuzavaguɗu Ka̱shile, avu ɗa Ka̱shile, a makyan dem vu tsu shatangu ta̱ kadanshi ka̱ nu, kpamu avu vu ya'anka ta̱ kagbashi ka̱ nu uzuwakpani wu ili i singai i nampa ya. 29 Gogo na n folono wu ta̱, zuwaka kagbashi ka̱ nu n kpa'a ku ni ra̱ka̱ una̱singai, u ciya̱ kulya'a ku kelime ali a kubana ayin babu uteku. Adama a na avu Vuzavaguɗu Mala'imili, avu ɗa vi ya'in kadanshi, adama a na avu vu zuwaka ta̱ kpa'a ku kagbashi ka̱ nu una̱singai, u ɗa wi ta̱ tana o kokpo yi n una̱singai ali a kubana ayin babu uteku.>>