1 Ana ilo, ɗa Dawuda u lya'i aza a Filisitiya n kuvon, ɗa u bonokoi le agbashi a̱ ni. Ɗa wu isai likuci i Metegu-Amah ekiye aza a Filisitiya.

2 Ɗa kpamu Dawuda u lya'i aza a Mowabu n kuvon, ɗa u gerei le adaru-adaru a vaki a iɗika. Ɗa u ɗikai kawin u gisanki le, ugisanki u kawin kure dem u zuwai una le, ugisanki u kawin kutatsu u ka̱sukpa̱i le n wuma. Ɗa aza a Mowabu okpoi agbashi a Dawuda, a̱ ka̱na̱i ku ta̱wa̱sa̱ka̱ yi n utafu.

3 Ɗa Dawuda u lya'i Hadadezeru kolobo ka Rehobu mogono ma Zoba n kuvon. Ili i nampa ya i gita̱ ta̱ a makyan ma na Hadadezeru wi a nwalu a kubana e kuyene ku Yufiretu, Adama a na u doku u bonoko n utsura u ni ɗe. 4 Ɗa Dawuda wu isai akumbi odoku o mogono ma Zoba ka̱kpa̱n n amangatawencindere (1,700) n osoji a iɗika a̱kpa̱n kamanga (20,000). Ɗa Dawuda u gbatyasai ene odoku e le ra̱ka̱, ama ɗa u ka̱sukpa̱i o yoku adama ekeke odoku amangatawun (100). 5 Ama ana osoji aza a Siriya vu Dimaska a̱ ta̱wa̱i adama a na a̱ ɓa̱nka̱ Hadadezeru mogono ma Zoba, ɗa Dawuda wu unai osoji a̱kpa̱n kamanga n ere (22,000) e le. 6 Ɗa Dawuda va u zuwai a̱tsura̱ osoji a̱ ni a Siriya vu Dimaska, ɗa aza a Siriya okpoi agbashi a̱ ni, ɗa a̱ ka̱na̱i ku ta̱wa̱sa̱ka̱ yi n utafu. Vuzavaguɗu u tsu neke ta̱ Dawuda ulya'i a̱ ubuta̱ dem u na u banai. 7 Ɗa Dawuda u pura̱i nra̱ga̱ ma azanariya m aza e kelime n Hadadezeru ɗa u bankai a Urushelima. 8 Ɗa kpamu u pura̱i iyum i shili n a̱bunda̱i ya aza a Beta m Berotayi vu likuci i tsugono tsu Hadadezeru.

9 Ana mogono Toyi ma aza a Hamata u panai arabali a danai Dawuda u lya'a ta̱ osoji a Hadadezeru n kuvon ra̱ka̱, 10 ɗa u suki kolobo ka̱ ni Joram*8:10 Joram Va a̱ ubuta̱ u yoku e ci ɗeke yi ta̱ Hadoram. u mogono Dawuda adama a na u kya̱sa̱ yi, ɗa kpamu u cikpai ni adama a na Dawuda u shilika̱ ta̱ n Hadadezeru ɗa kpamu u ciya̱i ulya'i, Toyi u ya'an ta̱ nannai adama a na a̱yi Hadadezeru wi ta̱ o kuvon n a̱yi ayin tutu. A̱yi Joram va u tuka̱i ta̱ ucanuku wa azurufa n azanariya koɓolo n iyum i shili. 11 Ɗa mogono Dawuda we erengi ucanuku wa u Vuzavaguɗu ra̱ka̱ uteku tsu na u ya'in n azurufa koɓolo n azanariya a na u pura̱i a uduniyan u na u lya'i n kuvon. 12 Uduniyan wa ele ɗa Edom m Mowabu n Amon n aza a Filisitiya, n aza a Ameleki. Ɗa kpamu we erengi ucanuku u na u pura̱i u Hadadezeru kolobo ka Rehobu mogono ma Zoba.

13 Ɗa Dawuda u ya'in kula ana u bonoi n ubuta̱ u kuvon, wu unai uma a Edom a̱kpa̱n kupa n kula̱i (18,000) a̱ ka̱ra̱'a̱ ka mkpaɗi. 14 Ɗa Dawuda u zuwai a̱tsura̱ osoji a̱ ni a iɗika i Edom ra̱ka̱. Ɗa aza a Edom okpoi agbashi a̱ ni. Vuzavaguɗu u nekei Dawuda ulya'i a̱ ubuta̱ u na u banai dem.

15 Ɗa Dawuda u lya'i tsugono wa aza a Isaraila ra̱ka̱. Ɗa u ya'in kasingai n ukuna wu usuɓi a̱ ubuta̱ u uma ra̱ka̱. 16 Jowabu vuza na e ci ɗeke a̱na̱ku a̱ ni Zeruya, a̱yi ɗa kovonshi vo osoji. Johoshafatu kolobo ka Ahiludu wo okpoi kaɗani ka tsumani. 17 Zadoku kolobo ka Ahitubu koɓolo n Ahimeleki kolobo ka Abiyata ele ɗa anan ganu. Seraya ɗa kaɗani. 18 Benaya kolobo ka Jehoyida, a̱yi ɗa vuza kelime va aza a Keritiya n aza a Peletiya, ɗaɗa osoji a kindi ku Dawuda. Ɗa olobo a Dawuda tamkpamu okpoi anan ganu.