1 Kanna ke te ɗa Dawuda u ya'in keci, u danai, <<Vuza wi ta̱ lo a kpa'a ku Shawulu vuza na u buwai n wuma, an ma kuya'anka yi kasingai, adama a Janata?>> 2 A makyan ma nanlo ma kagbashi ka kpa'a ka Shawulu ko yongo ta̱ lo tana, vuza na e ci ɗeke Ziba. Ɗa e ɗekei ni u bana a̱ ubuta̱ u Dawuda. Ɗa mogono me ecei ni,<<Avu ɗa Ziba?>>

Ɗa u danai,<<Vuzagbayin, mpa ɗa kagbashi ka̱ nu.>>

3 Ɗa mogono me ecei ni u danai, <<Vuma vi yoku u buwa lo a kpa'a ku Shawulu an ma kuya'anka yi kasingai ka̱ Ka̱shile ba?>>

Ɗa Ziba wu ushuki mogono, <<Kolobo ka Janata ka buwa ta̱ lo. Ama ka̱kutsuma̱ ka'a.>>

4 Ɗa mogono Dawuda we ecei u danai, <<Te ɗai wi?>>

Ɗa Ziba wu ushuki u danai, <<Wi ta̱ ɗe a kpa'a ku Makiru kolobo ka Amiyelu, a̱ likuci i Lodeba.>> 5 Ɗa Mogono Dawuda ma̱ suki a bana a̱ ta̱wa̱ n a̱yi ɗe a kpa'a ku Makiru kolobo ka Amiyelu ɗe a̱ likuci i Lodeba. 6 Ana Mefiboshetu kolobo ka Janata, matsukaya ma Shawulu u yawai u Dawuda, ɗa u kuɗa̱ngi ali iɗika u ya'in ikya̱shi.

Ɗa Dawuda u danai, <<Mefiboshetu.>>

Ɗa wu ushuki, <<Vuzagbayin, wuma u nu u geshe, kagbashi ka̱ nu ka na.>>

7 Ɗa Dawuda u danai ni, <<Ka̱ta̱ vu pana wovon ba, mi ta̱ a kuya'anka wu kasingai adama esheku a̱ nu Janata. Mi ta̱ o kubonoko wu n iɗika ya akaya a̱ nu Shawulu ra̱ka̱, ka̱ta̱ avu a̱ ka̱ci ka̱ nu vu lya'a ilikulya i va̱ ayin dem.>> 8 Ɗa Mefiboshetu u doku u kuɗa̱ngi u kya̱sa̱i mogono, ɗa u danai, <<Mpa ɗa ya, an va kuneke mu tsugbayin, mpa n la'a ta̱ meshe'e ma na ma̱ kuwa̱i?>>

9 Ɗa Mogono Dawuda u ɗekei Ziba, kagbashi ka Shawulu, u danai ni, <<N neke ta̱ Mefiboshetu matsukaya ma Shawulu vuzagbayin vu nu ili ra̱ka̱ i na yi i kpa'a ku Shawulu. 10 Ama avu n olobo a̱ nu n agbashi a̱ nu, yi ta̱ a̱ kuka̱na̱ kucimbasa ka muku n Shawulu, ka̱ta̱ i ta̱wa̱sa̱ka̱ le n i na i cimbai adama a na a̱ ciya̱ ilikulya'a. Ama Mefiboshetu wi ta̱ a kulya'a ilikulya'a i va̱ ayin tutu.>> Ziba tana wi ta̱ n olobo kupa n a tawun n agbashi kamanga. 11 Ɗa Ziba u danai Mogono, <<Kagbashi ka̱ nu ki ta̱ a kuya'an ili derere uteku tsu na vuzagbayin mogono ma danai ni u ya'an.>> Ɗa Mefiboshetu u lya'i ilikulya i kpa'a ku Dawuda an muku n mogono. 12 Mefiboshetu wi ta̱ n kolobo ka na e ci ɗeke kula Mika. Ɗa aza na i ida̱shi a kpa'a ku Ziba ra̱ka̱ o okpoi agbashi a Mefiboshetu. 13 Mefiboshetu u da̱sa̱ngu ta̱ a Urushelima, u tsu lya'a ta̱ ilikulya'a i ni a kirukpa ku mogono ayin tutu. A̱yi ta na ka̱kutsuma̱ ka'a e ene e re dem.