32
1 Gaɗi panakai mu, n ciga ta̱ n ya'an kadanshi.
Ya'an aduniyan a pana ka̱la̱ka̱tsu ka̱ va̱.
2 Ya'an kuyotsongusu ku va̱ ku yo'o tsu mini ma zuva,
ka̱ta̱ kelentsu ka̱ va̱ ko ɗoro uteku tsu ciza,
uteku ci ija'ashi a̱ ubuta̱ wi itoponi i mita̱,
uteku tsu mini ma̱ a̱bunda̱i ma na mi o kuyo'o a gaɗi vi ica̱shi.
3 Adama na mpa mi ta̱ a kusala ukuna u kula ku Vuzavaguɗu,
cikpai tsugbayin tsu Ka̱shile ka̱ ɗa̱.
4 A̱yi katali ka'a, ulinga u ni u singai u ɗa,
uye u ni kpamu ra̱ka̱ wi ta̱ mejege.
Ka̱shile ka mayun, vuza na u ci ya'an kawuya ba,
a̱yi vuza ciɗa ɗa n ka mayun kpamu.
5 Ama ele a ya'anka yi ta̱ kawuya e kelime ka̱ ni,
ele muku n ni n ɗa ba,
adama a̱ una̱mgbi u le, uma a gbani-gbani kpamu.
6 A̱ɗa̱ ta yi a kuya'anka Vuzavaguɗu nannai,
a̱ɗa̱ alau aza unambi wu ugboji?
Ashe a̱yi eshekpu a̱ ɗa̱ a ɗa ba, vuza na u ya'in ɗa̱,
vuza na u ya'in ɗa̱ ɗa kpamu u zuwai ɗa̱?
7 Ciɓai n ayin a cau,
sheshei ka̱ta̱ i la̱na̱ tsukaya tsu cau tsu na tsu lazai.
Ecei esheku a̱ ɗa̱ ka̱ta̱ u tonuko ɗa̱,
ecei kpamu nkoshi m gba̱ra̱-gba̱ra̱ i ta̱ a kudana ɗa̱.
8 Ayin a na Mala'imili me pecekei aduniyan uka̱ni u le,
ana u peciki uma ra̱ka̱,
u kiɗaka ta̱ kumaci dem uteku u ni,
derere vu ka̱bunda̱i ka̱ muku mi Isaraila,
9 Adama na upecu u Vuzavaguɗu u ɗaɗa uma a̱ ni,
Yakubu ɗa upecu wu uka̱ni u ni.
10 <<U cinai ni ɗe e meremune,
a magbanda a̱ ubuta̱ u na wi babu uma, a iɗika i na i kuwa̱i.
Ɗa u kanzai ni, ɗa u la̱na̱i ni
uteku tsu muku n a̱shi n ni,
11 Uteku tsu mashangi ma na mi a kuyotsongu muku ni uteku tsu na a ku'imkpa,
u tsu ɗimkpa ta̱ zuva vu muku n ni,
u bapa evelyu a̱ ni ka̱ta̱ u kikpatsa le
ka̱ta̱ u ɗika le zuva va evelyu a̱ ni.
12 Vuzavaguɗu koci a̱yi ɗa u tonoi n a̱yi
babu komoci ka̱ ka̱ma̱li ko yoku ka na ko yongoi n a̱yi.
13 U zuwai ni u kumbai a gaɗi va aginda,
ɗa u lya'atangi ni n ili i kashina.
Ɗa u ɓa̱na̱i ni n ishigi i na yi a katali
m mani'in ma zaitu ma na mu uta̱i a kakpanlai,
14 koɓolo m mani ma̱ ka̱guta̱ ma anaka n ma nlala,
n ushuma u na wi a ngiri n a̱giri,
n kobomburon nu nga̱ji m Bashan,
n alkama vu na vu la'i n kuga'an.
Ɗa o so'i ma̱kya̱n ma na ma shilyamgbai ma singai.
15 <<Ama Jeshuru*32:15 Jeshuru Kula ku ɗaɗa <<Vuza vu usuɓi>> ɗaɗa kpamu kula ku yoku ka aza a Isaraila u ya'in ikyamba ɗa u ya'in ugbamukaci,
u ya'in ikyamba, ɗa kpamu u shanai ɗa u gboroi,
u ka̱sukpa̱i Ka̱shile ka na ka ya'in ni,
ɗa u iwain kakpanlai, Kishi ka̱ ni.
16 Ɗa a zuwai ni cishe'e n omoci a̱ ma̱li e le,
ɗa a zuwai ni wupa adama a ukuna wu unata u le.
17 E nekei alyuka a̱ wunla̱i u gbani-gbani u na wi Ka̱shile ba,
wa a̱ma̱li a na e yevei ba,
n a̱ma̱li a savu a na a̱ ta̱wa̱i n ka̱ca̱pa̱,
a na ikaya i ɗa̱ i tsu pana wovon ba.
18 Ɗa i vakangi kakpanlai ka na ka matsai ɗa̱,
ɗa i cinukpai n Ka̱shile ka na ke nekei ɗa̱ wuma.
19 <<Vuzavaguɗu we enei nannai ɗa u iwain le
adama a wupa u na muku mo olobo ni nkere n ni a zuwai ni.
20 Ɗa u danai, <Ya'an n sokongu a̱shi a̱ va̱ we le,
ka̱ta̱ me ene uteku tsu na ukocishi u le u kokpo,
adama na ele tsukaya tsu gbani-gbani tsu ɗa,
muku mu unambi wu usuɓi.
21 A zuwai mu n ya'an cishe'e n ili i na yi Ka̱shile ba,
a zuwai mu kuya'an wupa n a̱ma̱li e le.
N kuzuwa le ta̱ a ya'an tsurala n uduniya u na wi uma ba,
ka̱ta̱ kpamu n zuwa le a ya'an wupa n uduniya u na wi n ugboji ba.32:21 Rom 10:19
22 Adama na wupa u va̱ u dyaɓa ta̱ tsa akina,
kpamu a ɗa ta na a̱ ka̱na̱ ta̱ kukula̱ ali a̱ ubuta̱ wa̱ a̱kpisa̱.
A ɗa i ta̱ a kulya'a aduniyan koɓolo n ica̱'a̱shi i ni dem,
wi ta̱ o kusongu le ali a kubana a̱ kumi'i ku kusan.
23 << <Mi ta̱ o kuɓolonku le ndukpa̱,
ka̱ta̱ n kotso aya a̱ va̱ ra̱ka̱ we le.
24 Kambulu ki ta̱ a kuna le,
atakaci a̱ mɓa̱la̱ i ta̱ a kuna le,
ndukpa̱ n wuya mi ta̱ o kukoɗoso le.
Ka̱ta̱ n su'uku le nnama m gbani-gbani n kakamba,
n ili i tsukono i na i tsu rono a̱tsuma̱ e le a iɗika.
25 Uma a na i pulai kotokobi ki ta̱ a kuna le,
aza a na i asuvu a i'uwa wovon u ɗa wa kuna le,
u ɗa wi ta̱ a kuna nkere n olobo,
koɓolo nu nreɓu nu nkoshi.
26 Ɗa n danai, <<Mi ta̱ e kubetuwe le,
n zuwa a cinukpa n ele a̱ ka̱tsuma̱ ka uma aduniyan,>>
27 ama mi a̱ kuka̱sukpa̱ irala i le i ka̱ga̱,
ka̱ta̱ a dana,
<<Nu utsura we ekiye u tsu u ɗa ci lya'i,
Vuzavaguɗu ɗa u ya'in ka'a ba.>> >
28 <<Adama na aza a Isaraila uduniyan u ɗa u na wi babu ugboji,
uma a babu kuyeve.
29 Ishi baci i n ugboji, ishi ta̱ e kuyeve ili i nampa,
ka̱ta̱ e yeve uteku na o kukotsoso.
30 Nini ɗai vuma vu te u kufuɗa wo loko uma ka̱kpa̱n (1,000),
ko kpamu uma e re a zuwa uma a̱kpa̱n kupa (10,000) a suma,
sai de Kakpanlai ke le ke denge le baci,
ko kpamu Vuzavaguɗu u nekei le.
31 Adama a na kakpanlai ke le ki uteku tsu Kakpanlai ka̱ tsu ba,
ko irala i tsu feu e yeve ta̱ nannai.
32 Adama a na itacishi i le yu uta̱ ta̱ a̱ ubuta̱ wi itacishi i Sodom,
a ashina itacishi i Gomora.
Umaci u le wi ta̱ tukpa n tsukono,
koɓolo n okono,
33 ma̱kya̱n me le tsukono tsu oko tsu ɗa,
tsukono tsu gbani-gbani tsu keyenku.
34 << <Ashe mpa n zuwa ili i nampa ya usokongi ba,
ɗa m paɗarai i ɗa o mopon ma̱ va̱ ba?
35 Ka̱ va̱ ka'a n tsupa, mpa ta na mi ta̱ a kutsupa,
ayin i ta̱ lo a̱ kuta̱wa̱ an ene e le e kuderece,
kanna ka atakaci ke le ka yawa ta̱ ɗevu,
ukpa̱'a̱ u le wi ta̱ a̱ kuta̱wa̱ an ugipi u a̱shi.32:35 Rom 12:19
36 Vuzavaguɗu wi ta̱ e kuneke uma a̱ ni uba̱ruwi,
ka̱ta̱ u pana asuvayali a agbashi a̱ ni,
ayin a na baci we enei utsura u le u kotsoi
ɗa we enei babu vuza na u buwai, kagbashi ko vuza gbani.32:36 A Ib 10:30
37 Ka̱ta̱ u dana, gogo na te a̱ma̱li e le i,
kakpanlai ke kusheɗeku ke le?
38 A̱ma̱li a na a takumai ushuma wa alyuka u le,
ɗa o so'i ma̱kya̱n me kune'e ku kuso'o me le?
Ya'an a̱ ɗa̱nga̱ ka̱ta̱ a̱ ɓa̱nka̱ le.
Ya'an e neke ɗa̱ ubuta̱ u kusheɗeku.
39 << <La̱na̱i gogo na, an wo okpoi mpa n ka̱ci ka̱ va̱, mpa ɗa a̱yi,
babu ka̱ma̱li ko yoku ka na ki lo sai mpa.
N tsu una ta̱ ka̱ta̱ kpamu n ɗa̱ngusa̱ n wuma,
N tsu zuwa ta̱ muna, ka̱ta̱ kpamu n potsotongu,
babu vuza na wi n utsura u na wa ki isa vuza e ekiye a̱ va̱.
40 Adama a na n ɗa̱ngusa̱ ta̱ ekiye a̱ va̱ zuva ɗa n kucinai n wuma u va̱.
Ɗa baci de mi n wuma a kubana uteku,
41 ayin a na baci m gboroi kotokobi ka kutasa ka̱ va̱,
ɗa n remei ka'a e ekiye a̱ va̱ adama a na n ya'an afada,
n kuya'an ta̱ katsupu a̱ ubuta̱ wi irala i va̱
ka̱ta̱ n ya'an katsupa wa aza a na a iwain mu.
42 Mi ta̱ a kuzuwa aya a̱ va̱ o so'o mpasa ali m maka le,
kotokobi ka̱ va̱ kpamu ka takuma inyama nu mpasa n uma a na a unai,
n aza na e remei a̱ ubuta̱ u kuvon
n tsugbayin tsa aza e kelime a irala.>
43 <<Ya'in ma̱za̱nga̱, a̱ɗa̱ uduniyan, ya'in ma̱za̱nga̱ koɓolo n uma a Vuzavaguɗu,
adama a na wi ta̱ a ku tsupaka agbashi a̱ ni mpasa n le,
u kutsupa ta̱ irala i ni.
Ka̱ta̱ u shikpa unushi wi iɗika i ni n uma.>>
44 Musa u ta̱wa̱i koɓolo n Jesuwa kolobo ka Nun, ɗa u dansai ukuna wi iɗani i vishipa vu nampa atsuvu a uma. 45 An Musa u kotsoi kudansa kakuna ki iɗani ka nampa ra̱ka̱ a̱ ubuta̱ wa aza a Isaraila, 46 U danai le, <<Remei kadanshi ka̱ wila̱ ka na n kecekei ɗa̱ na anana a̱ a̱ɗu a̱ ɗa̱ ra̱ka̱. Ka̱ta̱ i pi'isaka muku n ɗa̱ n tono ka'a mayin. 47 Ba kadanshi ka'a gbani nannai koci ba, ka ɗaɗa wuma u ɗa̱. N ka'a ya̱ kuciya̱ wuma wu ugaɗi a iɗika i na yi a kuciga kupasa Kuɗolu ku Urudu ku isa.>>
Musa wi ta̱ a̱ kukuwa̱ a kusan ku Nebo
48 A kanna ka nanlo ka ɗa Vuzavaguɗu u danai Musa, 49 <<Kumba gaɗi a kubana Abarim a kusan ku Nebo a iɗika i Mowabu a kinda upashi u Jeriko, ka̱ta̱ ve ene Kana'ana, iɗika i na n cigai kuneke uma a Isaraila yo okpo ubuta̱ wu uka̱ni u le. 50 Ɗe a kusan ku na vu kumbai va, ta ɗe va̱ kukuwa̱ ka̱ta̱ vu tono ikaya i nu, derere uteku tsu na Haruna vuza nu u kuwa̱i a kusan ku Horu u tonoi ikaya i ni. 51 Adama a na dem vu ɗa̱ i nusaka mu ta̱ a̱ a̱shi a aza a Isaraila ɗe a̱ mini ma Mariba vu Kadeshi a agbata a Zinu. Adama a na i iwan ta̱ kuyotsongu ukuna u ciɗa a̱ ka̱tsuma̱ ka aza a Isaraila. 52 Uteku tsu nampa, vi ta̱ e kene iɗika ya da'angi, ama vi a ku'uwa punu a iɗika i na me kuneke aza a Isaraila ba.>>