33
Musa u zuwakai kumaci ka aza a Isaraila una̱singai
1 Nava ɗaɗa una̱singai u na Musa vuma vu Ka̱shile u ya'ankai aza a Isaraila kafu u kuwa̱. 2 Ɗa u danai,
<<Vuzavaguɗu wu uta̱ ta̱ a kusan ku Sinai ɗa u cipa̱i
tsu na kanna ka̱ tsu uta̱ a Siyaru,
ka̱ta̱ kutashi ku ni ku akana ɗe a kusan ku Param.
U ta̱wa̱ ta̱ n ka̱bunda̱i ka aza a ciɗa,
m melentsu ma akina a kakambu ku usingai ka̱ ni.
3 Mayun a̱yi ɗa vuza na wi a kuciga uma a̱ ni,
uma a ciɗa ra̱ka̱ i ta̱ ekiye a̱ ni.
E kelime ke ene a̱ ni a ɗa kpamu a̱ tsu kuɗa̱ngu,
wa̱ ni u ɗa kpamu i a̱ kuciya̱ odoki.
4 Wila̱ u na Musa u nekei tsu,
ili yu uka̱ni i kumaci ku Yakubu i ɗa.
5 Vuzavaguɗu wo okpoi mogono ma aza a Jeshuru
a makyan ma na nkoshi m gba̱ra̱-gba̱ra̱ o ɓolongi
koɓolo n kumaci ka aza a Isaraila.>>
6 Musa u dansai ukuna u nampa adama a Ruben, <<Ya'an Ruben u ya'an n wuma ka̱ta̱ u kuwa̱ ba,
ama uma a̱ ni o okpo kenu.>> 7 Ɗa u dansai kakuna adama a Yahuda,
<<Vuzavaguɗu pana ma̱shi ma aza a Yahuda,
ka̱ta̱ vu ɓolongu le okpo una̱ u te,
ka̱ta̱ kpamu vu neke yi utsura we ekiye adama o kuvon,
ɓa̱nka̱ yi adama a irala i ni.>> 8 Adama a kumaci ka aza e Levi tamkpamu ɗa u danai,
<<Tumi koɓolo n Yurim i ɗa̱,
i vuza na i ɓa̱nka̱i ɗa.
I kondoi ta̱ a Masaha,
i shilika̱i n a̱yi a mini ma kuyene ku Mariba.
9 U danai esheku a̱ ni n a̱na̱ku,
<Mpa n ci cikpa le ba.>
U ciga a̱ za̱ a̱ ni ba
be le u keɓece muku n ni.
Ama u ɓa̱na̱ ta̱ kadanshi ka̱ nu,
ɗa kpamu ka̱na̱i uzuwakpani u nu.
10 Ɗa o yotsongi Yakubu ukuna u nu,
n wila̱ u nu wa aza Isaraila,
ɗa e nekei nu kune'e ki ili i ma̱gula̱ni,
n alyuka o kusongu a katalikalyuka ka̱ nu.
11 Zuwaka kuyeve ku ni ra̱ka̱ una̱singai,
ka̱ta̱ vu cikala ulinga we ekiye u ni.
Una utsura wi irala i le,
n utsura u ni sapu a̱ kuwa̱ ka̱ta̱ a̱ kpa̱ɗa̱ kuɗa̱nga̱ kpamu.>>
12 Adama a Bayami tamkpamu, ɗa u danai,
<<Ka̱sukpa̱ macigi ma Vuzavaguɗu mo yongo m ma̱ta̱na̱ mayin wa̱ ni,
adama na Vuzavaguɗu u kanza le ta̱ kanna dem,
a̱yi ɗa vuza na ucigi u Vuzavaguɗu u da̱sa̱ngi avangatsu a̱ ni.>>
13 Adama a̱ Isufu kpamu ɗa u danai,
Ya'an Vuzavaguɗu u zuwaka iɗika i ni una̱singai,
n kune'e ku singai n ciza,
m mini ma na mi punu a ɗaka vi iɗika,
14 n ili i kashina i singai i na kanna ka̱ tsu ɓa̱nka̱ ka̱ta̱ i matsa mayin,
koɓolo n i singai i na a̱ ci ciya̱ o wotoi dem,
15 koɓolo n kune'e ku singai ku umaci wu nsansa n ayin a cau,
n una̱singai wa̱ a̱bunda̱i u na u tsu uta̱ a̱ ubuta̱ wa aginda a na o kukotso ba,
16 Koɓolo n kune'e ku singai ki iɗika tsu na i ɗa yi gbaga vi ni,
koɓolo n kasingai ka vuza na wi ida̱shi a maɗanga ma na mi a kulya'a n akina.
Ka̱sukpa̱ una̱singai u nampa ra̱ka̱ u cipa̱ a kaci ka Isufu,
a̱ cipa̱ u vuza na a zagbai mogono a̱ ka̱tsuma̱ ka̱ aza a̱ ni.
17 Tsugbayin ci Isufu ci ta̱ an kobomburon ka na a̱ gita̱i kumatsa,
avana a̱ ni, i ta̱ tsa avana a kyanci.
N ele ɗa u kusuwa̱n uduniyan,
ali n aza a na i a uteku wa aduniyan.
Ta ka̱bunda̱i ka̱ a̱kpa̱n kupa ka aza a Ifirayimu ki nannai,
n ka̱bunda̱i ka̱ a̱kpa̱n ka aza a Manasa.
18 Adama a Zabalun tamkpamu ɗa u danai,
ya'an ma̱za̱nga̱ avu Zabalun a nwalu*33:18 nwalu La̱na̱ Ugi 49:13 n nu,
ka̱ta̱ avu tamkpamu Isaka vu yongo m ma̱ta̱na̱ a̱ a̱va̱li a̱ nu.
19 I ta̱ e kuɗeke uma a kubana a kusan,
ka̱ta̱ ɗe a ya'an alyuka a usuɓi,
adama a na i ta̱ a̱ kuciya̱ uciyi a̱ ubuta̱ u mala,
n uciyi u na wi usokongi a kayala.
20 Adama a Gadu kpamu ɗa u danai,
<<Vuza vu una̱singai u ɗa a̱yi na u doki Gadu ka̱bunda̱i ki iɗika.
Ɗa Gadu u da̱sa̱ngi ɗe an kawu,
adama a na u saza ekiye ali a kubana o moko ma kaci.
21 U zagbakai ka̱ci ka̱ ni iɗika i singai,
adama a na ta ɗe a zuwakai vuzagbayin ugboku u ni.
Ana aza e kelime a uma o ɓolongi,
ɗa u ya'in ukuna wu usuɓi u Vuzavaguɗu,
ɗa u tonoi wila̱ u na e nekei aza a Isaraila.>>
22 Adama a Dan kpamu ɗa u danai,
<<Dan wi ta̱ tsu maku ma kawu
a kaɗikpangusu a Bashan.>>
23 Adama a Nafutali kpamu ɗa u danai,
<<Avu Nafutali, vi ta̱ tukpa n kasingai ka Vuzavaguɗu,
kpamu vi ta̱ tukpa n una̱singai u ni,
vi ta̱ a kulya'a uka̱ni wu ukambu u ɗaka ali a kubana a mala ma̱ Ga̱lili.>> 24 Adama Ashera kpamu ɗa u danai,
Ashera a̱yi ɗa maku ma na ma la'i n una̱singai a̱ ka̱tsuma̱ ka aza a̱ ni dem,
ka̱sukpa̱ wo okpo macigi ma̱ aza ni,
ka̱sukpa̱ yi u kuma ene a̱ ni m mani'in.
25 Ya'an utsutsu u likuci i nu u ya'an utsura tsu viyum n viyum vi shili.
Ka̱ta̱ utsura u nu wo okpo derere n ayin a wuma u nu.
26 <<Babu vuza yoku uteku tsu Ka̱shile ka Jeshuru†33:26 Jeshuru Kula ku te ku ɗa n Isaraila.,
a̱yi na u tsu uta̱ gaɗi adama na u ɓa̱nka̱ ɗa̱,
a̱yi na u tsu uta̱ gaɗi n tsugbayin ci ni.
27 Ka̱shile ku Uba̱nga̱ri a̱yi ɗa ubuta̱ wi ida̱shi u nu,
kpamu utsura u babu uteku u ni wi ta̱ a̱ kuɓa̱nka̱ wu,
wi ta̱ o kulokoko wu irala i nu,
ka̱ta̱ u dana, <Unai le.>
28 Uteku tsu nampa tsu ɗa uma a Isaraila a̱ kuda̱sa̱ngu m ma̱ta̱na̱,
ka̱ta̱ tsukaya ci Yakubu ci ciya̱ ukanji,
a iɗika i na yi n ishina m ma̱kya̱n ma savu,
a̱ ubuta̱ u na gaɗi u tsu matsa ciza.
29 Una̱singai u ɗa, a̱ɗa̱ aza Isaraila
yayi wi tsu ɗa̱,
a̱ɗa̱ uma a na Vuzavaguɗu wi isai?
A̱yi ɗa ma̱ra̱ga̱ ma̱ ɗa̱ n ka̱ɓa̱nki ka̱ ɗa̱,
n kotokobi ka tsugbayin ka̱ ni.
Irala i ɗa̱ yi ta̱ a kukuɗa̱nku ɗa̱,
ka̱ta̱ a̱ɗa̱ i dasa le.>>