Tsuɓari
Kuɓa̱yuwa̱
Ukuna u Katagarda ka nampa.
Katagarda ka Tsuɓari ka nampa ki ta̱ a kadanshi ka ukuna u kusheshe. Kaɗani ka ko yotsongu ta̱ ukuna tsu na makyan ma wuma u vuma wi, n tsu na u ɗa wi n kuripula̱sa̱, m maꞋiwansanai ma na e yevei ba, n ili ya atakaci ra̱ka̱ i na i kotsoi kadanshi a kudansa,<<Ili dem gbani ɗa.>> U fuɗa u yeve uye u Ka̱shile ba, a̱yi na wi n ili ra̱ka̱ ekiye a̱ ni ba. N nannai dem, u nekei uma odoki uma a dakaka kutoni, a pana kpamu uyoꞋo u kuneꞋe ku Ka̱shile makyan ba ci lo.
UgaꞋan ba kusheshe ku nanlo ki ta̱ a̱ kutuka̱ n una̱mgbuka̱tsuma̱ ko vuza u takpa asuvu. Ama a na wo okpoi a uwakai n katagarda ka nampa punu a katagarda ka ciɗa, u yotsongu ta̱ uneki u ka̱ɗu n kuyotsongusu ku katagarda ka ciɗa ki ta̱ n a̱bunda̱i ka̱u, ali wi ta̱ a kadanshi ka̱ munla̱i n ukpa̱ɗi u kuyeve. Uma n a̱bunda̱i a̱ tsu ciya̱ ta̱ kadanshi ka na ka tsu vaꞋanku le a̱ɗu i baci a̱ kula̱na̱ kadanshi ko (Tsuɓari) Adama a na wo okpo le tsu mindatsu. Ɗa kpamu e yevei katagarda ka ciɗa ka nampa ka na ka tsu yotsongu kusheshe ku nampa, ɗa kpamu u tuka̱i n kuzuwa ku ka̱ɗu u Ka̱shile vuza na u tsu neke wuma u na u laꞋi n kugaꞋan.
Ili i na yi punu udari a katagarda ka nampa
Wuma wi ta̱ n kakuna? 1:1--2:26
Kadanshi adama wuma 3:1--11:8
Ukocishi u kadanshi 11:9--12:8
Kagbati 12:9-14
1
Wuma ili i gbani ɗa
1 Kadanshi ka malum, kolobo ka Dawuda, mogono a Urushelima.
2 Gbani ɗa, ili dem gbani ɗa. malum ma danai.
Ili ra̱ka̱ gbani ɗa. Ili dem gbani ɗa.
3 Yiɗa̱i vuma u ciya̱i a̱ ka̱tsuma̱ ka kataci ka̱ ni
ka na wi a kuyaꞋan a aduniyan?
4 Tsukaya tsu laza, ka̱ta̱ tsukaya tsu yoku tsu ta̱wa̱,
ama aduniyan i ta̱ lo ko wannai.
5 Kanna ka tsu uta̱ ta̱ ka̱ta̱ kpamu kanna ka̱ yikpa̱,
ka̱ta̱ ka dakaka o kubono a̱ ubuta̱ u na ka̱ uta̱i kpamu.
6 Wunla̱i u tsu lapa ta̱ a kubana a uɓonɗakai
ka̱ta̱ kpamu u kpatala u kubono a uɓongaɗi,
ka̱ ka̱na̱ kuka̱ra̱Ꞌa̱, n u bonoi a̱ ubuta̱ u na wu uta̱i.
7 Nyeneke ra̱ka̱ n ci yene ta̱ a kubana mala,
n nannai dem mala ma shana ba.
A̱ ubuta̱ u na nyeneke tsu uta̱,
ta ɗe o tsu bono kpamu.
8 Ili dem i tsu tuka̱ ta̱ n woꞋi,
tsu na vuma u kufuɗa kugisanku ba.
A̱shi o tsu oꞋwo n kindi ba,
atsuvu feu o tsu oꞋwo n kupana ba.
9 Ili i na i gita̱i ɗe n cau, i ɗaɗa kpamu i doku i bonoi,
ili i na a yaꞋin ɗe n cau, i ɗa kpamu o kudoku a yaꞋan
ko ili i savu aduniyan nampa ba.
10 Ili yoku yi ta̱ lo i na vuza u kudana,
<<La̱na̱ biꞋi, na va̱ ili i savu i ɗa>>?
I ɗa yi ta̱ lo m megeshe
kafu ayin a̱ tsu.
11 Babu vuza na u kuciɓa n ili i na i lazai,
ali n ili i na kpamu i kuta̱wa̱,
aza a na a̱ kuta̱wa̱ n ka̱ca̱pa̱
i a kuciɓa n ili i na i gita̱i ba.
Ugboji gbani ɗa
12 Mpa malum, n lyaꞋa ta̱ tsugono tsa aza a Isaraila punu a Urushelima. 13 Ɗa n zuwai ka̱ci ka̱ va̱ adama a na n la̱nsa̱ ugboji n kuyeve ki ili ra̱ka̱ i na yi aduniyan a nampa. Ɗa me enei ili i na Ka̱shile ka zuwakai vuma yi ta̱ n kataci. 14 Ɗa me enei ili ra̱ka̱ i na i a kuyaꞋan aduniyan, ra̱ka̱ gbani ɗa, yi o kutono wunla̱i.
15 ili i na baci i ka̱nza̱i, yi kubonoko mejege ba,
e ci kece i na yi lo ba. 16 Ɗa n danai ka̱ci ka̱ va̱, <<La̱na̱ n ciya̱ ta̱ ugboji u na n laꞋi yaba dem vu na u lyaꞋi tsugono a Urushelima kafu mpa, mayun n ciya̱ ta̱ ugboji n kuyeve ka a̱bunda̱i.>> 17 Ɗa n zuwai ka̱ci ka̱va̱ adama a na n yeve ugboji n ujari koɓolo n tsulau, ama nannai dem ɗa me enei kutono ku wunla̱i ku ɗa.
18 Adama a na ugboji wa̱ a̱bunda̱i u tsu tuka̱ ta̱ n una̱mgbuka̱tsuma̱,
kuyeve ka̱ a̱bunda̱i ku zuwa ta̱ ka̱ɗu ka vuma kuna̱mgba̱.