2
Kupana ku uyoꞋo gbani ɗa
1 Ɗa n danai ka̱ɗu ka̱ va̱,<<YaꞋan zuwai ka̱ci va̱ kulyaꞋa ku uyoꞋo, adama a na n yeve tsu na u ɗa wi.>>Ama ɗa n yevei na lo feu ukuna u gbani u ɗa. 2 Ɗa n danai,<<Izoshi tsulau tsu ɗa, kpamu yiɗa̱i kupana kuyoꞋo ki a̱ kutuka̱?>> 3 N sheshe ta̱ a̱ ka̱ɗu ka̱ va̱, tsu na n kulyaꞋa uyoꞋo n kusoꞋo ku ma̱kya̱n, mo oɓongi tsulau a makyan ma na mi a̱ kula̱nsa̱ ugboji. N cigai n ciya̱ uyoꞋo u na uma a̱ ci ciya̱ aduniyan a̱ ka̱tsuma̱ ka ayin a wuma e le.
4 Ɗa n yaꞋin ili i gbagbaꞋin, m maꞋakai ka̱ci ka̱ va̱ iꞋuwa, ɗa n ca̱Ꞌi ashina a itacishi. 5 N cimbai a ashina n ubuta̱ u kuvuka, ɗa n ca̱Ꞌi icuꞋu yi nɗanga n tsu matsa kakau punu. 6 Ɗa n ga̱va̱i ayivan, adama a na n tsunku nɗanga ma mini. 7 Ɗa n tsulakai ka̱ci ka̱ va̱ agbashi ali n a̱ma̱ci, mi ta̱ kpamu m muku ma agbashi n na a matsakai mu a kpaꞋa ku va̱. Mi ta̱ n ushiga wa anaka n a̱bunda̱i, nu nkyon nu nraɗika n na n laꞋi aza a na n cinai punu a̱ ida̱shi a Urushelima. 8 M ɓolonki ka̱ci ka̱va̱ azurufa n azanariya, mi ta̱ n kazuwi ku ucanuku u singai wu ngono n uɓon u tsugono tsu va̱. Ɗa n la̱nsa̱i aza a ishipa ali n a̱ma̱ci adama a na a yaꞋansaka mu ishipa, n ili i na i tsu zuwa kupana ku uyoꞋo, n a̱ma̱ci a pulai n a̱bunda̱i a na n zuwai. 9 Ɗa mo okpoi vuzagbayin n laꞋi yaba dem vu na n cinai punu a̱ ida̱shi a Urushelima. Dem n nannai mpa n ugboji u va̱.
10 N sa̱nka̱ a̱shi a̱ va̱ ili i na a cikalai dem ba,
n sa̱nka̱ ka̱ɗu ka̱ va̱ kupana uyoꞋo ba.
ka̱ɗu ka̱ va̱ ka pana ta̱ uyoꞋo wi ili ra̱ka̱ i na n yaꞋin,
na va̱ ɗaɗa katsupu ka kataci ka ulinga u va̱
11 Ama a na n la̱na̱i ulinga u na n yaꞋin n ekiye a̱ va̱,
n ili i na n yaꞋin kataci adama a na n ciya̱,
ɗa me enei ili ya ra̱ka̱ gbani ɗa, yi ta̱ o kutono wunla̱i,
babu kodokpotsu ka na vi a̱ kuciya̱ aduniyan a nampa.
Ugboji n tsulau gbani ɗa
12 Ɗa n sheshei adama a na m gbaɓa ugboji,
n ujari n tsulau.
Yiɗa̱i i buwai i na mogono ma na ma̱ kuta̱wa̱ ma kuyaꞋan,
i na mpa n yaꞋin ba?
13 Ɗa me yevei ugboji u laꞋa ta̱ tsulau,
tsu na kutashi kulaꞋi ka̱yimbi.
14 Vuza vu ugboji u tsu ene ta̱ ubuta̱ u na wi a kubana,
ama kalau ki ta̱ a nwalu a̱ ka̱yimbi tukpa̱m,
ama ɗa me enei ili i te i ɗa ra̱ka̱ i ci ciya̱ le.
15 Ɗa n sheshei a̱ ka̱ɗu ka̱ va̱,
n danai,<<Ili i na i ciya̱i kalau, yi ta̱ feu a̱ kuciya̱ mu.
Nannai va yiɗa̱i n ciya̱i a na mo okpoi vuza vu ugboji?>>
Ɗa n danai ka̱ci ka̱ va̱,
<<Ili i nampa ya feu gbani ɗa.>>
16 Adama a na vuza vu ugboji va n kalau ka, a kubana e megeshe a kuciɓa n e le ba,
a ayin a̱ kuta̱wa̱ ra̱ka̱ vu le i ta̱ a ku cinukpa n a̱ le.
Tsu na vuza vu ugboji u ku kuwa̱ ta feu kalau nannai.
Kataci gbani ɗa
17 Ɗa n iwain wuma, adama a ili i na i a kuyaꞋan aduniyan yi ta̱ a̱ kula̱nga̱sa̱ mu ka̱ɗu. Ili ra̱ka̱ gbani ɗa, kutono ku wunla̱i ku ɗa koci. 18 Ɗa n iwain ulinga u na n yaꞋin ra̱ka̱ aduniyan a nampa, adama a na mi ta̱ a̱ ku ka̱sukpa̱ i ɗa u vuza na wi a ku ta̱wa̱ ka̱ca̱pa̱ ka̱ va̱. 19 Ya yi u yevei ko vuza na u ku ta̱wa̱ ka̱ca̱pa̱ ka̱ va̱ wi ta̱ ko okpo vuza vu ugboji ko kalau? Dem n nannai wi ta̱ a kulyaꞋa uka̱ni wu ulinga u na n yaꞋin kataci ka̱ kula̱nsa̱ a aduniyan. Nava feu gbani ɗa. 20 Ɗa m takpai ka̱ɗu ka̱ va̱ a ulinga u na n yaꞋin a aduniyan a nampa ra̱ka̱. 21 Adama a na vuza wi ta̱ a kuyaꞋan ulinga n ugboji n kuyeve, n kufuɗa ku ni, n nannai dem ka̱ta̱ u ka̱sukpa̱ vuza yoku vuza na u takacikai kula̱nsa̱ ba. Nava feu gbani ɗa n ili i gbani-gbani. 22 Yiɗa̱i vuma lima̱ u kuciya̱ a̱ ka̱tsuma̱ ku ulinga u na u yaꞋin, n kataci ka na u yaꞋin aduniyan? 23 Adama a na ayin a̱ ni ra̱ka̱ kataci kaꞋa n una̱mgbuka̱tsuma̱, ko n kayin ka̱ɗu ka̱ ni ki a ivaꞋin ba. Nava feu gbani ɗa.
24 Vuma wi lo n ili i na i laꞋi u lyaꞋa u soꞋo u pana uyoꞋo wu ulinga u ni ba. Na lo feu kuneꞋe ku Ka̱shile ku ɗa, 25 adama a na n a̱yi ɗa baci ba, yayi u kulyaꞋa u soꞋo u pana uyoꞋo? 26 Vuza na u zuwai Ka̱shile ma̱za̱nga̱, a̱yi ɗa Ka̱shile ka̱ tsu neke ugboji, n kuyeve koɓolo m ma̱za̱nga̱, ama u vuza vu unushi Ka̱shile ke ci neke yi ta̱ kataci ko kuɓolongu uciyi adama a na u neke vuza na u luwai Ka̱shile. Nava feu gbani ɗa, kutono ku wunla̱i ku ɗa koci.