KUTA̱
Kuɓa̱yuwa̱
Kula Kuta̱ <<Ki ta̱ a kadanshi ka mepecemgbenei,>> Kpamu ki ta̱ a kadanshi ka gbayin ku ukuna u tsumani tsa aza a Isaraila, ka na a yaꞋin kadanshi ka̱ ni punu a katagarda ka nampa: Kuta̱ ka aza a Isaraila a iɗika ya aza a Masar, a̱ ubuta̱ u na a̱ ishi ɗe a tsugbashi. Katagarda ka ki ta̱ n ugboku u na̱shi: Ugboku u iyain u ɗaɗa u ka̱sukpi wa aza a Ibirahi a̱ ubuta̱ u tsugbashi, ugboku u ire u ɗaɗa, nwalu n le a kubana a Kusan ku Sinai, ugboku u tatsu u ɗaɗa, uzuwukpani u Ka̱shile n uma a̱ ni a Kusan ku Sinai, u na u nekei le kofon ki ida̱shi i uma n ida̱shi i wila̱ wi iɗika koɓolo n kutoni. Ugboku u na̱shi u ɗaɗa, kumaꞋa n kulapula ku ubuta̱ u kutoni ka aza a Isaraila, n wila̱ adama a ganu n kutoni ku Ka̱shile.
A̱ ka̱tsuma̱ ki ili dem, katagarda ka nampa ka dansa ta̱ i na Ka̱shile ka yaꞋin, uteku tsu na u ɓa̱nka̱i agbashi, ɗa u zuwai le o okpo uma a aduniyan n a̱pa̱ e kelime.
Vuza mere a kaci ka kadanshi a̱yi ɗa Musa, Vuma na Ka̱shile ka zagbai wu utuka̱ n uma a̱ ni a iɗika ya aza Masar. Ukuna u gbayin wu uyevi a katagarda ka, u ɗaɗa udari u wila̱ kupa u na wi a masala ma kamanga.
Ili i na yu udari a katagarda ka nampa
A̱ utukai aza a Isaraila a ugbashi 1:1--15:21
Tsugbashi a iɗika i Masar 1:1-22
Umaci u Musa n uɗa̱ngi u ni 2:1--4:31
Musa n Haruna a banai a cinai mogono ma Masar ɗa a yaꞋankai ni kadanshi 5:1--11:10
Ka̱ɗiva̱ ko moloko n kuta̱ ki iɗika i Masar 12:1--15:21
A mala ma Shili a kubana a Kusan ku Sinai 15:22--18:27
Wila̱ koɓolo n Uzuwukpani 19:1--24:18
A̱Ꞌisa̱ a ciɗa koɓolo n wila̱ u kutoni 25:1--40:38
1
Atakaci a uma a Isaraila
1 Na va ɗaɗa ula a̱ muku mo olobo n Yakubu aza na a banai a iɗika i Masar n esheku e le, yaba dem n aza a kpaꞋa ku ni. 2 Ele ɗa Ruben, n Saminu, n Levi, koɓolo n Yahuza, 3 n Isaka, n Zabalun, koɓolo m Bayami, 4 n Dan, n Nafutali, n Gadu, koɓolo n Ashera. 5 Dem vu le ele ɗa tsukaya amangatatsunkupa, koɓolo n Isufu vuza na ta ɗe wi ida̱shi a Masar va.
6 M megeshe ɗe ɗa Isufu n aza a̱ ni n uma a na o yongoi a ayin a nanlo dem a̱ kuwa̱i. 7 Ama ɗa aza a Isaraila a̱ ka̱na̱i kumatsansanai ali ɗa a yimkpai n a̱bunda̱i. Ɗa iɗika dem i shanai n ele, ɗa o okpoi aza a utsura a na va kucina a̱ ubuta̱ dem.
8 A̱ya̱ n a̱bunda̱i a lazai ɗa mogono ma savu ma lyaꞋi tsugono a Masar vuza na u saꞋwai kuyeve Isufu n ili i na u yaꞋin ba. 9 Ɗa u danai uma a̱ ni, <<La̱na̱i, aza a Isaraila a yimkpa ta̱ n a̱bunda̱i, ali i a kuciga ku laꞋa tsu utsura. 10 Ta̱wa̱i tsu la̱nsa̱i uye u na tsa kushamkpa le, ɗa baci ba i ta̱ a ku laꞋa tsu a̱ ka̱bunda̱i. Ta̱wa̱ baci kuvon kuɗa̱nga̱, i ta̱ a kufuɗa o ɓolongu una̱ n irala i tsu ka̱ta̱ a̱ shilika̱ n a̱ tsu ali a suma a̱ Ka̱sukpa̱ka̱ tsu iɗika ya.>> 11 A ayin a nanlo ɗa aza a Masar, a zuwai aza a̱ kula̱na̱ agbashi e neke aza a Isaraila ulinga wu utsura. Ɗa a zuwai le a maꞋakai FiriꞋauna likuci i Pitom n Ramase, ubuta̱ u na u kuzuwa ucanuku. 12 Ama tsu na i o kudoku le atakaci a ulinga ɗa ta na feu ele i o kudoku kuyimkpasaka n ka̱bunda̱i nannai. Adama a ili i nanlo, ɗa aza a Masar o doku a panasakai wovon wa aza a Isaraila ka̱u. 13 Ɗa aza a Masar o doku e nekei le ulinga n a̱bunda̱i babu asuvayali. 14 A zuwai wuma u le wo okpoi n atakaci ka̱u, a̱ ubuta̱ u kuna̱na̱ ciꞋin n kuyaꞋan ki iputa̱ n ulinga wa ashina e le u na u buwai dem. A pana asuvayali e le ba, ko kenu. 15 Ɗa mogono ma Masar ma danai Sifira m Puwa, aza a na a̱ tsu ka̱na̱ limata ya a̱ma̱ci ya aza a Ibirahi, 16 <<Yi baci a̱ kuka̱na̱ limata i vuka va aza a Ibirahi i zuka mekere ma baci i ka̱sukpa̱ yi n wuma, kolobo ka baci ta na yu una.>> 17 Ama a̱ma̱ci e re a nampa a panai wovon u Ka̱shile, o tono kadanshi ko mogono ba, ɗa a̱ ka̱sukpa̱i olobo a n wuma. 18 Ɗa mogono ma Masar ma me ɗekei aza a̱ kuka̱na̱ limata a ɗa we ecei le. <<Yiɗa̱i i zuwai ɗa i yaꞋin nannai, i ka̱sukpa̱i muku n ali ma n wuma?>> 19 Ɗa a̱ ushuki, <<Vuzagbayin, a̱ma̱ci aza Ibirahi i tsa a̱ma̱ci a aza a Masar ba, i ta̱ n ugbamiwasuvu, a tsu matsa ta̱ kpamu muku n le kafu ci yawa.>> 20 Adama a nanlo ɗa Ka̱shile ka zuwakai aza a̱ kuka̱na̱ limata ya una̱singai, ɗa aza a Isaraila o doki n ka̱bunda̱i n utsura kpamu. 21 Adama a na aza a kula̱na̱ limata a pana ta̱ wovon u Ka̱shile, ɗa Ka̱shile ke nekei le limata i ka̱ci ke le.
22 Ɗa FiriꞋauna u nekei aza a̱ ni dem kadanshi ka nampa, <<Maku mo kolobo ma aza a Ibirahi ma na baci a matsai dem a vakangu maꞋa o Kuyene ku Nilu, ama a̱ ka̱sukpa̱ muku mi nkere n wuma.>>