1 Isufu u yikpa̱i e keven ki ikyamba ye esheku ɗa wo oɓongi ka'a ɗa u ka̱na̱i ma̱shi. 2 Ɗa Isufu u ya'in kadanshi n aza ulinga wa̱ a̱guma̱ a lapula keven ke esheku, ta lo ka kushama. 3 Ɗa keven ka ka ya'in ayin amangere (40), adama a na ta a̱guma̱ aza a Masar a̱ kusa̱nka̱ ili kushama i nannai. Ɗa a ya'in kpalu ku ni ali ayin amangatatsunkupa (70).

4 A ayin a na ayin a̱ ma̱shi a shanai, ɗa Isufu u danai kpa'a ku mogono ma Firi'auna, <<Ya'ankai mu ili i singai i nampa i danaka mu Firi'auna adama e esheku a̱ va̱. 5 <Kafu esheku a̱ va̱ a̱ kuwa̱ u folono mu ta̱ n ya'anka yi uzuwakpani, mi ta̱ a kubana kuciɗa̱ngu yi a kasaun ka na u foɓusoi na ɗe a iɗika i Kana'ana. Mi ta̱ ufolu u nu ka̱sukpa̱ mu m bana n ciɗa̱ngu esheku a̱ va̱ ka̱ta̱ m bono.> >>

6 Ɗa mogono mu ushuki, <<Wala vu bana vi ciɗa̱ngu eshevu tsu na vi ya'ankai ni uzuwakpani.>>

7 Ɗa Isufu u lazai adama a na u bana u ciɗa̱ngu esheku. Ayin a na u banai ɗa aza a̱ gba̱ra̱-gba̱ra̱ a Firi'auna m Masar o soki ni, 8 n aza a kpa'a a̱ ni n aza ni dem a bansai. Sai muku n kuzuwa ku le ku ɗa a̱ ka̱sukpa̱i ɗe o Goshen. 9 Aza o yoku a kumbai keke va anaka, aza o yoku odoku ɗa a banai ɗe koɓolo, uma n a̱bunda̱i ɗa a banai.

10 Ana a yawai a ulanga u kulapa utalu u Ata a kasana n Kuyene ku Urudu ɗa a̱ shika̱i lo ka̱u. Ɗa a ya'in lo ayin e cindere a kuya'an kpalu ke esheku a̱ Isufu. 11 A ayin a na aza a Kana'ana e enei tsu na a ya'in kpalu ka a̱ ubuta̱ u kulapa utalu u Ata, ɗa a danai, <<Kpalu ku nampa ku suɗukpa ta̱ ka̱u a̱ ubuta̱ wa aza a Masar.>> Adama a nannai ɗa e ne'i kula ku ubuta̱ wa, Ebelu-mizarim, ɗaɗa kpalu ka aza a Masar. Ta ɗe wi a upashi u Urudu.

12 Ɗa muku n ali n Yakubu n ya'ankai esheku e le i na u danai le a ya'an 13 A ɗikai keven ki ikyamba ka̱ ni ɗa a̱ ciɗa̱ngi ka'a a ubuta̱ wa asaun a Makapele a kasana ka Mamure a̱ ka̱ba̱nga̱ ka̱ ka̱ciɗa̱ ka na Ibirahi u tsulai a ekiye a Ifirayimu vuza va aza a Hitiya 14 Ana Isufu u kotsoi ka̱ciɗa̱ ke esheku ɗa u lazai o kubono a Masar n aza a̱ ni dem n aza a na o tonoi ni a kubana a̱ ubuta̱ u ka̱ciɗa̱ wa.

15 Ana esheku e le a̱ kuwa̱i, ɗa Isufu nu nkoshi n ni n danai, <<Gogo na Isufu u dana baci ya'an u tsupa kawuya ka na ci ya'ankai ni?>> 16 Ɗa a̱ su'uki Isufu n kadanshi a danai, <<Kafu esheku a̱ tsu a̱ kuwa̱ u dana ta̱, 17 ci ece wu, <Cinukpa n unushi u na aza a̱ nu a ya'ankai nu tsu na cau a takacikai nu.> Gogo na reme ka̱ɗu cinukpaka tsu unushi u na a̱ tsu agbashi a̱ Ka̱shile ke eshevu ci ya'ankai nu.>> Isufu u shika̱i ka̱u ana u panai kadanshi ka nampa. 18 Ɗa aza a̱ ni a banai ɗa a̱ kuɗa̱ngi kelime ka̱ ni ɗa a danai, <<A̱ tsu ɗa na kelime ka̱ nu agbashi a̱ nu.>>

19 Ama ɗa Isufu u danai, <<Panai wovon ba! Mpa Ka̱shile ka'a? 20 Ko a na i sheshekei mu kawuya, ama Ka̱shile ko bonoko ta̱ ka'a ka singai, adama a na wi isa wuma wa aza a̱bunda̱i a na yi e kene anana. 21 Adama a nannai ka̱ta̱ i pana wovon ba. Mi ta̱ a kinda ɗa̱ m muku n ɗa̱,>>

22 Ta ɗe Isufu m kpa'a ke esheku o yongoi a Masar. Isufu u ya'an ta̱ a̱ya̱ amangatawun n kupa (110) aduniyan. 23 U yongo ta̱ ali ɗa we enei muku mi Ifirayimu m muku mu ntsukaya n ni. U yongo ta̱ n wuma ali ɗa wi isai muku m Makiri m Manasa u wo'i le e ekiye a̱ ni.

24 Ɗa Isufu u danai aza a̱ ni, <<Mi ta̱ ɗevu n ukpa̱, ama Ka̱shile ki ta̱ a kinda ɗa̱ ka̱ta̱ wu uta̱ka̱ ɗa̱ a iɗika i nampa, ka̱ta̱ u banka ɗa̱ a iɗika i na u ya'ankai Ibirahi n Ishaku n Yakubu uzuwakpani.>> 25 Ɗa Isufu u zuwai aza a̱ ni a ya'anka yi akucina. <<Ayin a na baci Ka̱shile ka̱ ta̱wa̱i wa̱ ɗa̱ yi ta̱ a̱ kupura̱ etele a̱ va̱ i walaka.>>

26 Ɗa Isufu u kuwa̱i a Masar. Wi ta̱ n a̱ya̱ amangatawun n kupa (110). Ɗa a̱ tsungi keven ka̱ Isufu a̱guma̱ a na a̱ kusa̱nka̱ kushama, ɗa a zuwa ka'a akpati vu kuzuwa keven.