5
A ayin a̱ A̱da̱mu a Kubana a Ayin a̱ Nufu
1 Na va ɗaɗa tsumani tsu muku ma̱ A̱da̱mu.
A ayin a na Ka̱shile ka ya'in vuma u ya'an yi ta̱ n iyoci i Ka̱shile. 2 U ya'in le vuka n vali, ɗa u zuwakai le una̱singai. Ana u ya'in le u ɗekei le <<Uma.>>
3 Ayin a na A̱da̱mu wi n a̱ya̱ amanga̱ta̱linkupa*5:3 La̱na̱ kapashi ka 48 kuɓa̱yuwa̱ a̱ ubuta̱ u na a ya'in kadanshi ki ilamba n Cishingini. (130), ɗa u matsai maku ma na mo yotsoi ni, ɗa u ne'i ni kula Shitu. 4 Ana A̱da̱mu u matsai Shitu ɗa u yongoi a̱ya̱ amangatawunkunla̱i (800) kpamu, ɗa ayin a nanlo, u doku u matsai muku mu nkere n olobo. 5 A̱da̱mu u ya'an ta̱ a̱ya̱ amangatawunkuci n kamangankupa (930), ɗa u kuwa̱i.
6 Shitu wi ta̱ n a̱ya̱ amangatawun n a tawun (105), ɗa u matsai Enos. 7 Ana u matsai Enos, ɗa u doku u ya'in a̱ya̱ amangatawunkunla̱i n e cindere (807) ɗa ayin a nanlo, u doku u matsai muku mu nkere n olobo. 8 Shitu u ya'an ta̱ a̱ya̱ amangatawunkuci n kupa n e re (912), ɗa u kuwa̱i.
9 Enos wi ta̱ n a̱ya̱ amanga̱na̱shinkupa (90), ɗa u matsai Kenan. 10 Ana u matsai Kenan, ɗa Enos u doku ɗa u ya'in a̱ya̱ amangatawunkunla̱i n gendu (815). A̱ ka̱tsuma̱ ka ayin a nanlo, u matsai muku mo olobo ni nkere. 11 Enos u ya'an ta̱ a̱ya̱ amangatawunkuci n a tawun (905), ɗa u kuwa̱i.
12 Ana Kenan u yawai a̱ya̱ amangatatsunkupa (70), ɗa u matsai Mahalale. 13 Ana a matsai Mahalale, ɗa u doku ya'in a̱ya̱ amangatawunkunla̱i n amangere (840). A̱ ka̱tsuma̱ ka ayin a nanlo, u doku u matsai muku mo olobo ni nkere. 14 Kenan u ya'an ta̱ a̱ya̱ amangatawunkuci n kupa (910), ɗa u kuwa̱i.
15 Ana Mahalale u yawai a̱ya̱ amangatatsu n a tawun (65), ɗa u matsai Jaredu. 16 Ana u matsai Jaredu, ɗa Mahalale u doku u ya'in a̱ya̱ amangatawunkunla̱i n kamangankupa (830). A̱ ka̱tsuma̱ ka ayin a nanlo, u matsai muku mo olobo nu nkere. 17 Mahalale u ya'an ta̱ a̱ya̱ amangatawunkunla̱i n amanga̱na̱shinkupa n a tawun (895), ɗa u kuwa̱i.
18 Ana Jaredu wi n a̱ya̱ amankunla̱i n e re (162), ɗa u matsai Anuhu. 19 Ana u matsai Anuhu, ɗa u doku u ya'in a̱ya̱ amangatawunkunla̱i (800). A̱ ka̱tsuma̱ ka ayin a nanlo, u doku ɗa u matsai muku mo olobo ni nkere. 20 Jaredu u ya'an ta̱ a̱ya̱ amangatawunkuci n amangatatsu n e re (962), ɗa u kuwa̱i.
21 Ana Anuhu u yawai a̱ya̱ amangatatsu n a tawun (65), ɗa a matsakai ni Metusela. 22 Ana a matsai Metusela, ɗa Anuhu u doku u ya'in a̱ya̱ amangatawantatsu (300). A ayin a nanlo, u doku ɗa u matsai muku mo olobo ni nkere. 23 Anuhu u ya'an ta̱ a̱ya̱ amangatawantatsu n amangatatsu n a tawun (365). 24 Anuhu u yongo ta̱ o kutono Ka̱shile, ɗa u lazai adama a na Ka̱shile ka ɗika yi ta̱ a kubana gaɗi.
25 Ayin a na Metusela wi n a̱ya̱ amangatawun n amanga̱na̱shi n e cindere kuci n e cindere (187), ɗa a matsakai ni Lameji. 26 Ana a matsai Lameji, Metusela u doku u ya'in a̱ya̱ amangatawencindere n amanga̱na̱shi n e re (782) ɗa u doku u matsai muku mo olobo ni nkere. 27 Metusela u ya'an ta̱ a̱ya̱ amangatawunkuci n amangatatsu n kuci (969), ɗa u kuwa̱i.
28 Ana Lameji u yawai a̱ya̱ amankuci n e re (182), ɗa a matsakai ni kolobo. 29 U ne'i maku ma̱ ni kula Nufu.†5:29 Udani u kula <<Nufu>> n kadanshi ka aza a Yahuda ku ɗaɗa <<Jebekene.>> U danai, <<Adama a na a̱yi ɗa u kutuka̱ n wuvuki wu ulinga u na ci a kuya'ansa, adama a na Vuzavaguɗu u ya'anka ta̱ iɗika ya una̱.>> 30 Ana a matsai Nufu, ɗa Lameji u doku u ya'in a̱ya̱ amangatawantawun n amanga̱na̱shinkupa n a tawun (595), wi ta̱ kpamu m muku mo olobo ni nkere. 31 Lameji u ya'an ta̱ a̱ya̱ amangatawencindere n amangatatsunkupa n e cindere (777), ɗa u kuwa̱i.
32 Ayin a na Nufu u yawai a̱ya̱ amangatawantawun (500) ɗa u matsai muku n tatsu, Shem, Ham n Jafe.