4
Kayinu n Habila
1 Ɗa A̱da̱mu u vaki n vuka vi ni Hawa, ɗa u ya'in ka̱tsuma̱, ɗa u matsai Kayinu.*4:1 Udani <<Kayinu>> n kadanshi ka aza a Yahuda wi ta̱ a kudana tsu <<Za̱kuciya̱.>> Ɗa u danai, <<Vuzavaguɗu u ɓa̱nka̱ mu ta̱, ɗa n ciya̱i kolobo.>> 2 Ayin a na i lo, ɗa u matsakai ni vangu ɗa u ne'i ni kula Habila.
Ana u gbonguroi ɗa wo okpoi maguɓi, a̱yi Kayinu tamkpamu wo okpoi kacimbi. 3 A ayin a vukya'a, ɗa Kayinu u bankai Vuzavaguɗu n kune'e ki ili i kashina i ni. 4 Ama a̱yi Habila u zagbai mokyon ma singai ma na a̱ gita̱i kumatsa. Ɗa u kiɗai, ɗa u bankai Vuzavaguɗu nu mɓurusa. Ɗa ta na Vuzavaguɗu wi isai alyuka a̱ ni. 5 Ama u pana uyo'o u Kayinu n alyuka a̱ ni ba. Ɗa Kayinu u ya'in wupa, ka̱ɗu ka̱ ni ka̱ na̱mgba̱i.
6 Ɗa Vuzavaguɗu we ecei ni, <<Yiɗa̱i i zuwai ɗa vi ya'in wupa? Yiɗa̱i i zuwai ɗa asuvu a̱ nu a̱ na̱mgba̱i? 7 Ashe vi ya'an baci ili i singai a kisa i ɗa ba? Vu lapula baci ba, unushi u ɗa lo a̱ utsutsu a kuvana wu, adama a na u lya'a utsura u nu. Ama u ga'an ta̱ vu la'a u ɗa.>>
8 Ɗa Kayinu u danai vangu vi ni Habila, <<Ya'an tsu bana a kakamba.>> Ele ɗe a kakamba, ɗa Kayinu u ga̱la̱i Habila.
9 Ayin a na i lo, ɗa Vuzavaguɗu we ecei Kayinu, <<Te ɗai ambu wi?>>
Ɗa Kayinu wu ushuki, <<Mpa n yeve ba. Mpa ɗa kindi ka vangu va̱?>>
10 Ɗa Vuzavaguɗu u danai, <<Yiɗa̱i i zuwai ɗa vi ya'in nannai? Adama a na mpasa n ambu mi ta̱ a malapa mu una̱ punu a iɗika a̱ kuta̱wa̱ wa̱ va̱. 11 Gogo na iɗika i na i ɓa̱yuwa̱i adama a na yi isa mpasa n ambu e ekiye a̱ nu, i ya'anka wu ta̱ una̱. 12 Ubuta̱ u na vu banai dem, ko vi ya'an ulinga nini, iɗika ya yo kudoku ya matsa ili ba. Uteku n anana vo okpo ta̱ vuza vu ka̱ka̱ra̱sa̱ punu a iɗika.>>
13 Ɗa Kayinu u danai Vuzavaguɗu, <<Atakaci a̱ va̱ a la'a ta̱ utsura u va̱. 14 Gogo na vu loko mu ta̱ a iɗika ya, mi ta̱ o kokpo usokongi a̱ ubuta̱ u nu, ka̱ta̱ mo okpo ka̱ka̱ra̱shi punu a aduniyan, vuza na we enei mu dem wi ta̱ a kuna mu.>>
15 Ɗa Vuzavaguɗu wu ushuki u danai, <<Ta nannai ba! Vuza na baci dem wu unai Kayinu mi ta̱ feu a kutakacika yi ali kucindere.>> Ɗa Vuzavaguɗu u zuwakai ni urotu adama a na vuza na de dem u cinai ni ka̱ta̱ wu una yi ba. 16 Ɗa Kayinu u ka̱sukpa̱i kelime ka Vuzavaguɗu ɗa u lazai u banai u da̱sa̱ngi a iɗika i Nodu a Kasana ka Adini.
Ntsukaya n Kayinu
17 Ɗaɗa Kayinu u vaki n vuka vi ni ɗa u ya'in ka̱tsuma̱ u matsai maku ɗa u ne'i ni kula Anuhu. Ayin a nanlo a̱yi a kuma'a likuci ɗa u nekei likuci ya n kula ku maku ma̱ ni Anuhu. 18 Ɗa a matsakai Anuhu maku ɗa u nekei ni kula Iradu, ɗa Iradu u matsai Mehaluja ɗa Mehaluja u matsai Metusela esheku a Lameji.
19 Lameji u zuwai a̱ma̱ci e re vuza te kula ku ni ku ɗa Ada kula ku vuza te Zila. 20 Ɗa Ada u matsai Jabalu, a̱yi ɗa esheku a aza a na o kuyongo a̱ a̱pa̱m n a guɓai kuzuwa ku le. 21 Vuza ni ɗa Jabalu vuza na wi esheku a awa'i a umolu n a̱liki a ishari. 22 Ɗa Zila u matsai Tubula-kayinu vuza na u ci yima ila̱nga̱ n iyum. Taku vu Tubala-kayinu a̱yi ɗa Nama.
23 Kanna ke te Lameji u danai a̱ma̱ci e re a̱ ni,
<<Ada n Zila, panakai mu,
a̱ɗa̱ a̱ma̱ci a Lameji,
n sa'wa ta̱ kuna kolobo ko yoku
adama a na u uka mu ta̱ muna.
24 I baci a kuna uma e cindere adama a vuza na wu unai Kayinu,
I ta̱ a kuna uma amangatatsunkupa n uma e cindere adama a vuza na baci wu unai Lameji.>>
25 Ɗa A̱da̱mu u doku u vaki n vuka vi ni, ɗa u ya'in ka̱tsuma̱. Ɗa u matsai maku mo yoku, ɗa vuka vi ne'i ni kula Shitu.†4:25 Udani u kula <<Shitu>>, n kadanshi ka aza a Yahuda, kula ku ɗaɗa <<Shilekene.>> U danai, <<Ka̱shile ke neke mu ta̱ maku mo yoku, adama a na Habila u buwa lo ba, Kayinu wu una yi ta̱.>> 26 Shitu feu u matsai maku mo kolobo, ɗa u ne'i ni kula Enos.
A ayin a nanlo a ɗa uma a̱ ka̱na̱i kuɗeke kula ku Vuzavaguɗu.